കോട്ട: വിദ്യാര്ത്ഥികളുടെ ആത്മഹത്യകള് വന് തലവേദനയായി മാറിയിട്ടുള്ള രാജസ്ഥാനിലെ കോട്ട പ്രദേശത്തെ ട്യൂഷന് സെന്ററുകള് ഒടുവില് ഇതില് നിന്നും മോചനത്തിനായുള്ള മാര്ഗ്ഗം കണ്ടുപിടിച്ചു. ഹോസ്റ്റലിലെ ഫാനുകളില് സ്പ്രിംഗും അലാറവും വെയ്ക്കുക. കോട്ടയിലെ എല്ലാ ഹോസ്റ്റല് ഉടമകളും വരുന്ന ഹോസ്റ്റല് ഉടമകളുടെ അസോസിയേഷനാണ് വഴി കണ്ടു പിടിച്ചിരിക്കുന്നത്.
അമിതഭാരം കയറിയാല് താഴെ വീഴുന്ന രീതിയില് സ്പ്രീംഗ് വെയ്ക്കുക, പ്രത്യേക സാഹചര്യത്തില് വലിയ ശബ്ദം ഉണ്ടാക്കുന്ന അലാറം ഘടിപ്പിക്കുക തുടങ്ങിയവയാണ് വഴികള്. സ്പ്രിംഗും അലാറവും ഘടിപ്പിച്ച ഫാനുകള് നിര്മ്മിച്ചു നല്കാന് ഗുജറാത്തിലെ ഒരു സ്ഥാപനം ഓര്ഡര് സ്വീകരിക്കുകയും ചെയ്തിട്ടുണ്ട്. 20 കിലോയ്ക്ക് മുകളില് ഭാരം താങ്ങിയാല് താഴേയ്ക്കു പോരുന്ന രീതിയിലാണ് ഇത്.
ആത്മഹത്യ ചെയ്തവരില് കൂടുതലും ഫാനില് കെട്ടിത്തൂങ്ങുകയായിരുന്നു എന്ന കണ്ടെത്തലാണ് ഇതിന് പിന്നില്. വിദ്യാര്ത്ഥികളെ മത്സരപ്പരീക്ഷകള്ക്ക് തയ്യാറാക്കുന്ന പരിശീലനകേന്ദ്രങ്ങള് വ്യാപകമായുള്ള കോട്ടയില് ആയിരക്കണക്കിന് വിദ്യാര്ത്ഥികളാണ് വിവിധ കേന്ദ്രങ്ങളില് പരിശീലനം നേടുന്നത്. പഠനഭാരത്തായുള്ള മാനസീക സമ്മര്ദ്ദം താങ്ങാന് കഴിയാതെയാണ് കുട്ടികള് ആത്മഹത്യ തെരഞ്ഞെടുക്കുന്നതെന്നാണ് മന:ശ്ശാസ്ത്ര വിശകലനം.
