ഔറംഗബാദ്: എയര് ഇന്ത്യ വിമാനത്തില് കുഴപ്പമുണ്ടാക്കിയതിന് യാത്രാ നിരോധനം നേരിട്ട ശിവസേനാ എംപി രവീന്ദ്രഗെയ്ക്ക്വാദ് വീണ്ടും പോലീസിന് പണിയാകുന്നു. ഇത്തവണ പോലീസുകാരെ കയ്യേറ്റം ചെയ്യാന് ശ്രമിച്ചെന്നാണ് കേസ്. എടിഎമ്മില് നിന്നും പണം ലഭിച്ചില്ലെന്ന കാരണത്താല് ലത്തൂരിലാണ് ഒസ്മാനബാദ് എംപി പ്രശനമുണ്ടാക്കിയത്. തുടര്ന്ന് ഗെയ്ക്ക്വാദിനെതിരേ പോലീസ് കേസെടുത്തു.
ഏപ്രില് 19 ന് നടന്ന മുനിസിപ്പല് കോര്പ്പറേഷന് തെരഞ്ഞെടുപ്പ് പ്രചരണത്തിനായി എത്തിയ ഗെയ്ക്ക്വാദ് ലത്തൂരില് ബസ് സ്റ്റാന്ഡിന് സമീപത്തെ എടിഎം കാലിയായതിനെ ചൊല്ലി എസ്ബിഐ മാനേജരെ ചോദ്യം ചെയ്തിരുന്നു. കാരണം ചോദിച്ചെത്തിയ പോലീസുകാരോട് എംഎംഎ മോശമായി പെരുമാറുകയും തട്ടിക്കയറാന് ശ്രമിച്ചെന്നും കയ്യേറ്റത്തിന് മുതിരുകയും ആള്ക്കാരെ കൂട്ടി പ്രതിഷേധം നടത്തുകയും ചെയ്തു. തുടര്ന്ന് ഇദ്ദേഹത്തിനും ഇദ്ദേഹത്തിന്റെ അനുയായികള്ക്കും എതിരേ അനധികൃതമായി കൂട്ടം ചേരല്, പൊതു സ്ഥലത്ത് മോശമായി പെരുമാറല്, പൊതുജനങ്ങള്ക്ക് ശല്യം സൃഷ്ടിക്കല് എന്നീ വകുപ്പ് ചുമത്തിയാണ് കേസ്.
ബസ് സ്റ്റാന്റിന് സമീപത്ത് ഒരാള് കുഴപ്പമുണ്ടാക്കാന് ശ്രമിക്കുന്നു എന്ന റിപ്പോര്ട്ടിനെ തുടര്ന്ന് തങ്ങള് എത്തിയപ്പോള് എംപി ബാങ്ക് ഉദ്യോഗസ്ഥരോട് കയര്ക്കുന്നതാണ് കണ്ടത്. രംഗം ശാന്തമാക്കാന് ശ്രമിച്ചപ്പോള് മോശമായ വാക്കുകള് ഉപയോഗിച്ച് തങ്ങള്ക്ക് നേരെയും തട്ടിക്കയറി. ഇയാളുടെ അനുയായികള് മുദ്രാവാക്യം മുഴക്കാന് ആരംഭിച്ചതോടെ ഗതാഗതവും തടസ്സപ്പെട്ടു. ആര്ബിഐ യില് നിന്നും പണം വരണമെന്നും എത്രയും പെട്ടെന്ന് തന്നെ എടിഎമ്മില് പണം നിറയ്ക്കുമെന്നും എംപിയ്ക്ക് ഉറപ്പ് നല്കിയിരുന്നതായി ബാങ്ക് മാനേജര് പറഞ്ഞു.
അതേസമയം ഗയ്ക്ക് വാദ് തന്റെ അനുയായികളില് ചിലരെ പണം എടുക്കാന് വിട്ടെന്നും നഗരത്തിലെ പല എടിഎമ്മുകളിലും നോക്കിയിട്ടും ഇവര്ക്ക് പണം കിട്ടിയില്ലെന്നുമാണ് എംപിയെ ന്യായീകരിച്ച ചിലര് പറഞ്ഞത്. എടിഎമ്മുകളില് ഇങ്ങിനെ പണം ഇല്ലാതെ വന്നാല് ആര്ക്കെങ്കിലൂം ഒരു അത്യാവശ്യം വന്നാല് എന്തു ചെയ്യുമെന്ന് മാത്രമാണ് എംപി ഉദ്യോഗസ്ഥരോട് ചോദിച്ചതെന്നും ഇവര് പറഞ്ഞു.
