ബംഗ്ലൂര്: തുടര്ച്ചയായ പരാജയങ്ങള് ഏറ്റുവാങ്ങി ബാംഗ്ലൂര് റോയല് ചലഞ്ചേഴ്സ്. ആറു വിക്കറ്റിന്റെ വിജയവുമായി കൊലക്കത്ത പ്ലേ ഓഫില്. സ്വന്തം തട്ടകത്തില് കൊല്ക്കത്തയെ നേരീടാന് ഇറങ്ങിയ ബാംഗ്ലൂരുവിന് തുടക്കത്തിലെ തകര്ച്ചയാണ് നേരിടേണ്ടി വന്നത്. ക്രിസ് ഗെയ്ല്, ക്യാപ്റ്റ്ന് വിരാട് കോഹ്ലി, എ.ബി ഡിവില്ലിയേഴ്സ് തുടങ്ങിയവര് പെട്ടെന്നു കരയ്ക്കുകയറുന്ന കാഴ്ചയാണ് ചിന്നസ്വാമി സ്റ്റേഡിയത്തില് ഇന്ന് കാണാന് സാധിച്ചത്.
15 പന്തില് അര്ധസെഞ്ച്വറിയുമായി റെക്കോര്ഡിട്ട സുനില് നരെയ്ന്റെ ബാറ്റിങ് മികവില് ബാംഗ്ലൂരിന്റെ 159 റണ്സ് വിജയ ലക്ഷ്യം കൊല്ക്കത്ത 29 പന്ത് ബാക്കി നില്ക്കെയാണ് വിജയം സ്വന്തമാക്കിയത്.
ടോസ് നേടിയ കൊല്ക്കത്ത ബാഗ്ലൂരുവിനെ ബാറ്റിങിനയക്കുകയായിരുന്നു. ആദ്യ ഓവറില് ബാംഗ്ലുരുവിന് തകര്ച്ച നേരിടേണ്ടി വന്നു. മൂന്നാം ഓവറില് കോഹ്ലിയുടെയും അഞ്ചാം ഓവറില് ഡിവില്ലിയേഴ്സിന്റെയും വിക്കറ്റ് വീണതോടെ ബാംഗ്ലൂരുവിന്റെ തകര്ച്ചയാണ് കാണാന് സാധിച്ചത്.
തുടര്ന്നെത്തിയ മധ്യനിരയായിരുന്നു രക്ഷാപ്രവര്ത്തനം ഏറ്റെടുത്തത്. മധ്യനിരയുടെ പിന്ബലത്തില് ബാംഗ്ലൂര് 158 എന്ന സ്കോറില് എത്തിയത്. 75 റണ്സടിച്ച് പുറത്താകാതെ നിന്ന് ട്രാവിസ് ഹെഡ്ഡിന്റെയും 52 റണ്സ് നേടിയ മന്ദീപ് സിങിന്റെയും മികവിലാണ് ബാംഗ്ലൂര് ഭേദപ്പെട്ട സ്കോറിലെത്തിയത്.
മറുപടി ബാറ്റിങ്ങിനിറങ്ങിയ കൊല്ക്കത്തയുടെ തുടക്കം തന്നെ മികച്ചതായിരുന്നു. ഓപ്പണര്മാര് തകര്ത്ത് അടിച്ചപ്പോള് സ്കോര്ബോര്ഡ് കുതിച്ചുയര്ന്നു. 37 പന്തില് നിന്നും 105 റണ്സാണ് ഓപ്പണര്മാര് കൂട്ടിച്ചേര്ത്തത്. ഇതിനിടെ 15 പന്തില് നിന്നും 54 റണ്സുമായി ഐപിഎല്ലിലെ ഏറ്റവും വേഗമേറിയ അര്ധസെഞ്ച്വറി നരെയ്ന് സ്വന്തമാക്കി. ലിന് 22 പന്തില് 50 റണ്സ് നേടി പുറത്തായി. ഗ്രാന്ഹോം 31 റണ്സും സ്വന്തമാക്കി. 13 മത്സരങ്ങളില് നിന്നും ബാഗ്ലൂരുവിന്റെ പത്താം തോല്വിയാണിത്.
