ദളിത് ന്യൂനപക്ഷ പീഡനം ഹിന്ദു വര്ഗ്ഗീയ അജണ്ഡ 2014 ല് ലോക്സഭാ തെരഞ്ഞെടുപ്പില് നാലില് മൂന്ന് ഭൂരിപക്ഷം നേടിയതിന് ശേഷം ബിജെപി നേരിടുന്ന ആരോപണങ്ങള് ചെറുതല്ല. ഇന്ത്യ മുഴുവനുമായി പിടിച്ചടക്കാനുള്ള ബിജെപിയുടെ നീക്കങ്ങള്ക്കെതിരേ പ്രതിപക്ഷ പാര്ട്ടികള് പ്രതിരോധം തുറന്നുവിട്ടുകൊണ്ടും ഇരിക്കുമ്പോള് ആരോപണങ്ങളെ അതേ രീതിയില് തിരിച്ചടിക്കാന് ബിജെപിയും ഒരുങ്ങുന്നു. ഇന്ത്യയിലെ ആദ്യ ആദിവാസി ഗോത്ര വര്ഗ്ഗ വനിതയെ രാഷ്ട്രപതിയാക്കി ഉയര്ത്തി എതിരാളികളെ നേരിടാന് തയ്യാറെടുക്കുകയാണ് ബിജെപി.
സ്ഥിരീകരണം വന്നിട്ടില്ലെങ്കിലും രാഷ്ട്രപതി സ്ഥാനത്തേക്ക് ബിജെപി പരിഗണിക്കുന്ന പ്രമുഖ പേരുകളില് ജാര്ഖണ്ഡ് ഗവര്ണ്ണറും ഒഡീഷ നേതാവുമായ ദ്രൗപതി മുര്മ്മുവിന്റെ പേരും. എല്കെ അദ്വാനി, മുരളീ മനോഹര് ജോഷി, സുമിത്രാ മഹാജന്, സുഷമ സ്വരാജ്, വെങ്കയ്യാ നായിഡു തുടങ്ങിയ പേരുകള്ക്കൊപ്പമാണ് ദ്രൗപദിയുടെയും പേര് പരിഗണിക്കുന്നത്. 58 ശതമാനം വോട്ടുകള് പ്രതീക്ഷിക്കപ്പെടുന്ന ബിജെപി മുര്മ്മുവിനെ രാഷ്ട്രപതിയാക്കി ഉയര്ത്തിയാല് റെയ്സീന കുന്നില് നിന്നും രാജ്പഥില് ദേശീയപതാക ഉയര്ത്തി റിപ്പബ്ളിക് ദിന പരേഡില് സൈന്യത്തെ സല്യൂട്ട് ചെയ്യാന് എത്തുക ഈ ആദിവാസി ഗോത്ര വനിതയായിരിക്കും.
ഒഡീഷയില് നിന്നുള്ള 58 കാരിയായ ഈ ബിജെപി നേതാവ് സര്ക്കാര് സര്വീസില് നിന്നും രാജിവെച്ചാണ് രാഷ്ട്രീയത്തിലും സാമൂഹ്യ പ്രവര്ത്തനത്തിലും ഇറങ്ങിയത്. ആദിവാസികള്ക്ക് വേണ്ടി നിരന്തരം ശബ്ദമുയര്ത്തിയും പ്രവര്ത്തിച്ചും നേടിയെടുത്ത ജനസമ്മതി റെയ്രംഗ്പൂര് മണ്ഡലത്തില് നിന്നും അവരെ ഒഡീഷാ നിയമസഭയില് എത്തിക്കുകയായിരുന്നു. 1997 മുതല് രാഷ്ട്രീയത്തില് ഇറങ്ങിയ മുര്മൂ റെയ്രംഗ്പൂരില് ജില്ലാ കൗണ്സിലറായി. തൊട്ടു പിന്നാലെ ഇവിടെ വൈസ് ചെയര് പേഴ്സണും. 2000 ല് നാട്ടില് നിന്നു തന്നെ തെരഞ്ഞെടുക്കപ്പെട്ട് നവീന് പട്നായിക്കിന്റെ നേതൃത്വത്തില് അധികാരത്തിലേറിയ ഒഡീഷയിലെ ബിജെഡി - ബിജെപി സഖ്യ മന്ത്രിസഭയിലേക്കാണ് പിന്നെ എത്തിയത്.
പൊതുജനങ്ങള്ക്കായി നടത്തിയ ക്ഷേമ പ്രവര്ത്തനങ്ങള് ഒഡീഷയിലെ ഏറ്റവും മികച്ച ജനപ്രതിനിധിക്കുള്ള പണ്ഡിറ്റ് നീലകണ്ഠ പുരസ്ക്കാരത്തിലേക്കും എത്തിച്ചു. 2019 ലെ പൊതു തെരഞ്ഞെടുപ്പ് ലക്ഷ്യമിട്ട് ഇപ്പോഴെ കരുക്കള് നീക്കുന്ന ബിജെപി മുര്മ്മുവിനെ രാഷ്ട്രപതിയാക്കുന്നതിലൂടെ ഒഡീഷയ്ക്കൊപ്പം ദളിത് ആദിവാസി വിരുദ്ധരെന്ന കളങ്കം കൂടി മായ്ച്ചു കളയാനാണ് ശ്രമിക്കുന്നത്.
