ചെന്നൈ: മദ്രാസ് ഐഐടിയില് മലയാളി വിദ്യാര്ത്ഥിയെ ആക്രമിച്ച് കണ്ണിന് പരിക്കേല്പ്പിച്ച സംഭവത്തിന് പിന്നില് ബിജെപിയുടെ വിദ്യാര്ത്ഥി സംഘടനയായ എബിവിപി പ്രവര്ത്തകരായ ഉത്തരേന്ത്യന് വിദ്യാര്ത്ഥികള്. മര്ദ്ദനത്തില് നൂറിലധികം സഹപാഠികള് കോളേജിന് മുന്നില് കുത്തിയിരിപ്പ് സമരം നടത്തിയും ബീഫ് വിതരണം നടത്തിയും ശക്തമായ പ്രതിഷേധമാണ് നടത്തിക്കൊണ്ടിരിക്കുന്നത്.
ചൊവ്വാഴ്ചയായിരുന്നു മലപ്പുറം സ്വദേശിയായ എയ്റോ സ്പേസ് ഗവേഷക വിദ്യാര്ഥി ആര്. സൂരജിനെ മര്ദ്ദനമേറ്റതിനെ തുടര്ന്ന് ആശുപത്രിയില് പ്രവേശിപ്പിച്ചത്. ഇയാളുടെ വലതു കണ്ണിന് ഗുരുതരമായി പരിക്കേറ്റു. കണ്ണു നീരു വന്ന് വീര്ത്ത നിലയിലാണ്. വിദ്യാര്ത്ഥികളെ മര്ദ്ദിച്ചെന്ന് ആരോപിച്ച് സൂരജിനെതിരേ കോട്ടൂര്പുരം പോലീസ് കേസെടുത്തിട്ടുമുണ്ട്. സൂരജിന ആക്രമിച്ച ഓഷ്യന് എഞ്ചിനീയറിംഗ് വിദ്യാര്ത്ഥി മനീഷ് ഉള്പ്പെടെ എട്ടുപേര്ക്കെതിരേയും കേസ് എടുത്തിട്ടുണ്ട്.
ഞായറാഴ്ച ക്യാമ്പസില് ഇയാളും മറ്റ് ചില സഹപാഠികളും ചേര്ന്ന് കേന്ദ്ര സര്ക്കാരിന്റെ കശാപ്പ് നിയന്ത്രണത്തിനെതിരേ ബീഫ് ഫെസ്റ്റിവല് നടത്തിയിരുന്നു. അംബേദ്കര് പെരിയാര് സ്റ്റഡി സര്ക്കിളിന്റെ സജീവ പ്രവര്ത്തകനായ സൂരജും ഇതില് പങ്കെടുത്തിരുന്നു. ഉത്തരേന്ത്യക്കാരനായ മനീഷ് കുമാറും സംഘവുമാണ് മര്ദനത്തിനു പിന്നിലെന്ന് സഹപാഠികള് പറഞ്ഞു. ചൊവ്വാഴ്ച 2.15 ഓടെയായിരുന്നു സംഭവം.
ഒരു സുഹൃത്തിനൊപ്പം പച്ചക്കറി ഉച്ചഭക്ഷണം കഴിച്ചിറങ്ങിയ സൂരജിന്റെ അരികിലേക്ക് ഏഴെട്ടു പേരുമായി വന്ന് മനീഷ് ബീഫ് ഫെസ്റ്റിവലില് പങ്കെടുത്തോ എന്ന് ചോദിച്ചു കൊണ്ട് തലയുടെ പിന്നില് അടിക്കുകയായിരുന്നു. കൂടെയുണ്ടായിരുന്ന സുഹൃത്തിന് പ്രതികരിക്കാന് കഴിയും മുമ്പ് തന്നെ സംഘം ആക്രമണം നടത്തുകയായിരുന്നു. അക്രമികളില് നിന്നും സൂരജിനെ രക്ഷിച്ച കൂട്ടുകാരനാണ് ആശുപത്രിയില് പ്രവേശിപ്പിച്ചത്.
