ദുബൈ: യു.എ.ഇ ആസ്ഥാനമായുള്ള പ്രമുഖ വിമാനക്കമ്പനികളായ എമിറേറ്റ്സും ഇത്തിഹാദും ഖത്തറിലേക്കുള്ള സര്വീസ് അനിശ്ചിത കാലത്തേക്ക് നിര്ത്തി വെയ്ക്കുന്നു. ഖത്തറുമായുള്ള നയതന്ത്ര ബന്ധം യു.എ.ഇ അടക്കമുള്ള അറബ് രാജ്യങ്ങള് വിച്ഛേദിച്ചതിനു പിന്നാലെ ഇന്നു മുതല് നിര്ത്തി വെയ്ക്കുന്ന സര്വീസുകള് എപ്പോള് പുനരാരംഭിക്കുമെന്ന് വ്യക്തമല്ല. എമിറേറ്റ്സ്, ഇത്തിഹാദ്, ഫ്ളൈ ദുബൈ, എയര് അറേബ്യ തുടങ്ങി യു.എ.ഇയിലെ എല്ലാ വിമാനക്കമ്പനികളും ഖത്തറിലേക്കും തിരിച്ചുമുള്ള മുഴുവന് സര്വീസുകളും ഇന്നലെ അവസാനിപ്പിച്ചിരുന്നു.
ദോഹയിലേക്കും അവിടെ നിന്ന് തിരിച്ചും തങ്ങളുടെ വിമാനത്തില് യാത്ര ബുക്ക് ചെയ്തവര്ക്ക് പകരം മാര്ഗങ്ങള് ഒരുക്കുമെന്ന് എമിറേറ്റ്സ് വ്യക്തമാക്കിയിട്ടുണ്ട്. ദോഹയ്ക്കു പകരം സര്വീസ് ഉള്ള തൊട്ടടുത്ത വിമാനത്താവളങ്ങളിലേക്ക് യാത്ര മാറ്റാനും ഉപയോഗിക്കാത്ത ടിക്കറ്റുകള് ക്യാന്സല് ചെയ്ത് മുഴുവന് പണവും ലഭ്യമാക്കാനും അവസരമൊരുക്കും. ഖത്തറിലേക്കുള്ള എമിറേറ്റ്സിന്റെ അവസാന വിമാനം പ്രദേശിക സമയം ഇന്നലെ 2.30ന് ദുബൈയില് നിന്ന് ദോഹയിലേക്ക് യാത്ര ചെയ്തിരുന്നു.
ഖത്തറിനും യു.എ.ഇക്കുമിടയിലെ എല്ലാ സര്വീസുകളും അവസാനിപ്പിക്കുന്നതായി ഇന്നലെ ഉച്ചയോടെ ഇത്തിഹാദ് എയര്വേസും അറിയിച്ചിരുന്നു. മറ്റൊരു അറിയിപ്പുണ്ടാകുന്നതു വരെ ഖത്തര്-ഷാര്ജ മുഴുവന് സര്വീസുകളും ഇന്ന് അവസാനിപ്പിക്കുന്നതായി ഇന്നലെ എയര് അറേബ്യ യും വ്യക്തമാക്കിയിരുന്നു. ദോഹയിലേക്കുള്ള അവസാന വിമാനം ഞായറാഴ്ച വൈകീട്ട് 6.30നും തിരിച്ച് ഷാര്ജയിലേക്കുള്ള അവസാന വിമാനം രാത്രി 7.25നും സര്വീസ് നടത്തി. ജൂണ് അഞ്ചിനു ശേഷം ടിക്കറ്റ് ബുക്ക് ചെയ്ത യാത്രക്കാര്ക്ക് മുഴുവന് തുകയും തിരികെ നല്കുകയോ മറ്റൊരു യാത്ര അനുവദിക്കുകയോ ചെയ്യുമെന്നും കമ്പനി അറിയിച്ചിരുന്നു.
തീവ്രവാദ ഗ്രൂപ്പുകള്ക്ക് സഹായം നല്കുന്നുവെന്നാരോപിച്ച് സൗദി അറേബ്യ, ഈജിപ്ത്, യു.എ.ഇ, ഈജിപ്ത് എന്നീ രാജ്യങ്ങള് ഇന്ന് രാവിലെയാണ് ഖത്തറുമായുള്ള നയതന്ത്ര ബന്ധം വിച്ഛേദിച്ചത്. ഖത്തറിലെ നയതന്ത്ര പ്രതിനിധികളെ തിരിച്ചുവരിക്കുമെന്നും ഖത്തറുമായുള്ള വ്യോമ, നാവിക ഗതാഗതം ഉപേക്ഷിക്കുമെന്നും ഈ രാജ്യങ്ങള് വ്യക്തമാക്കി. തീരുമാനം ഖത്തറിന്റെ വ്യോമ കര ജല ഗതാഗതങ്ങളെയാകെ താറുമാറാക്കിയിരുക്കുകയാണ്.
