ന്യൂഡല്ഹി: ദളിത് കാര്ഡിനെ ദളിത് കാര്ഡ് കൊണ്ടു തന്നെ നേരിടാനായി പ്രതിപക്ഷം മുന് ലോക്സഭാ സ്പീക്കാര് മീരാകുമാറിനെ പ്രസിഡന്റ് സ്ഥാനാര്ത്ഥിയായി കൊണ്ടു വന്നെങ്കിലും 63.1 ശതമാനം വോട്ടുകള് ഇപ്പോള്തന്നെ രാംനാഥ് കോവിന്ദിന് ഉറപ്പ്. തനിച്ച് 48.9 ശതമാനം വോട്ടുകളുള്ള എന്ഡിഎയ്ക്ക് ചില പ്രാദേശിക പാര്ട്ടികളുടെ കൂടി പിന്തുണ കിട്ടുന്നതോടെ വോട്ടുകള് 63 ശതമാനം കടക്കുമെന്നാണ് വിലയിരുത്തല്.
എന്ഡിഎയില് അല്ലാത്ത ജെഡി (യു) (1.91 ശതമാനം), എഐഎഡിഎംകെ (5.39 ശതമാനം), ബിജെഡി (2.99 ശതമാനം), ടിആര്എസ് (2 ശതമാനം), വൈഎസ്ആര്സിപി (1.53 ശതമാനം), ഐഎന്എല്ഡി (0.38 ശതമാനം) എന്നിങ്ങനെയാണ് വാഗ്ദാനം. ഇതില് എഐഎഡിഎംകെ പിന്തുണ കിട്ടുമ്പോള് തന്നെ കോവിന്ദ് മീരയെക്കാള് നേരിയ വ്യത്യാസം കൈവരിക്കും. 2.34 ശതമാനം വോട്ടുകളുളള ശിവസേന തുടക്കത്തില് എതിര്പ്പ് പ്രകടിപ്പിച്ചെങ്കിലും പിന്നീട് പിന്തുണ നല്കാമെന്നായിട്ടുണ്ട്.
ദളിത് വിഭാഗത്തില് നിന്നൊരാളെ രാഷ്ട്രപതിയാക്കണം എന്നതാണ് അജണ്ഡയെങ്കില് പങ്കാളിയാകില്ലെന്നായിരുന്നു ശിവസേനയുടെ നിലപാട്. എന്നാല് പിന്നീട് നടന്ന ചര്ച്ചകള്ക്ക് ശേഷം എന്ഡിഎ സ്ഥാനാര്ത്ഥിയെ പിന്തണയ്ക്കാന് ഉദ്ധവ് താക്കറെ കൂട്ടാക്കിയിട്ടുണ്ട്. അതിനിടയില് സമാജ്വാദി പാര്ട്ടിയും ബഹുജന് സമാജ് പാര്ട്ടിയും കോവിന്ദിന് പിന്തുണ നല്കാമെന്ന് സമ്മതിച്ചിരുന്നു. പ്രതിപക്ഷം ദളിത് സ്ഥാനാര്ത്ഥിയെ നിര്ത്തുന്നില്ലെങ്കില് കോവിന്ദിനെ പിന്തുണയ്ക്കാനായിരുന്നു നിലപാട്. എന്നാല് പ്രതിപക്ഷം മീരയെ ഇറക്കുന്നതോടെ അത് രണ്ടു പാര്ട്ടികളും മാറ്റി.
