കായികലോകത്ത് ഇന്ത്യന് മാധ്യമങ്ങള് ഏറെ സംസാരിക്കുന്ന അനില്കുംബ്ളേ വിരാട് കോഹ്ലി പോരിന് കാരണം കരുണ്നായരും കുല്ദീപ് യാദവുമെന്ന് സൂചന. ഇന്ത്യന് ഓസ്ട്രേലിയ ടെസ്റ്റ് പരമ്പരയില് ഇരുവരുടേയും സെലക്ഷന് സംബന്ധിച്ച വിവരമാണ് ഒരേ മനസ്സോടെ പോയിരുന്ന രണ്ടു പേരെയും ഭിന്നിപ്പിച്ചതെന്നാണ് റിപ്പോര്ട്ടുകള്. സാമ്പത്തിക ഇടപാടുകളും പ്രതിഫല തര്ക്കവും ഉള്പ്പെടെ മറ്റ് പല കാരണങ്ങള് ഉയര്ന്നു വന്നിരുന്നെങ്കിലും ഇരുവരേയും തെറ്റിച്ച ത് ഇന്ത്യയും ഓസ്ട്രേലിയയും തമ്മില് ധര്മ്മശാലയിലെ മത്സരം മുതലായിരുന്നു.
ധര്മ്മശാലാ ടെസ്റ്റില് ചൈനാമാന് കുല്ദീപ് യാദവിന് അരങ്ങേറ്റം അനുവദിക്കാന് വേണ്ടി വിരാട് കോഹ്ലി പരിശീലകന് അനില് കുംബ്ളേയുടെ എതിര്പ്പിനെ മറികടന്ന് പ്രവര്ത്തിച്ചു. എന്നാല് ഓസ്ട്രേലിയയ്ക്കെതിരേ കഴിഞ്ഞ മത്സരങ്ങളില് റണ്സ് കണ്ടെത്താന് വിഷമിച്ച കരുണ് നായരെ ഉള്പ്പെടുത്താനായിരുന്നു കുംബ്ളേയ്ക്ക് താല്പ്പര്യം. ഈ തര്ക്കമായിരുന്നു പ്രധാന പ്രശ്നമായതെന്നാണ് സൂചന. ഇരുവരും തമ്മിലുള്ള പ്രതിഫലത്തിന്റെ കാര്യത്തിലുള്ള തര്ക്കവും പ്രശ്നത്തിന് കാരണമായി.!
ബിസിസിഐ എ ഗ്രേഡ് കളിക്കാര്ക്ക് 9.5 കോടി രൂപ നല്കിവരുമ്പോള് അതിനനുസൃതമായി പരിശീലകരുടെ വരുമാനവും കൂട്ടണമെന്ന് കുംബ്ളേ ആശിച്ചിരുന്നു. നിലവില് 6.5 കോടി പ്രതിഫലം കിട്ടുന്ന പരിശീലകന് ഒരു കോടി വര്ദ്ധനവ് കൂടി നല്കണമെന്ന് കുംബ്ളേ വാദിച്ചു. ടീം നന്നായി കളിച്ചാല് അതിന്റെ ഗുണം നായകന് മാത്രമായിരിക്കരുത് പരിശീലകന് കൂടിയാകണമെന്നു കുംബ്ളേയുടെ നിലപാടുകളുമെല്ലാം നായകന്റെ ഇഷ്ടക്കേട് സമ്പാദിച്ചു.
ഇതിന് പുറമേ ഇരുവര്ക്കും സ്വന്തമായുള്ള പ്ളേയര് മാനേജ്മെന്റ് കമ്പനികളിലെ വിഷയങ്ങളും നായകനും കോച്ചും തമ്മിലുള്ള മൂപ്പിളമയില് നിര്ണ്ണായകമായി. പരിശീലകന്റെയും കളിക്കാരുടെയും കരാര് സംബന്ധിച്ച കാര്യത്തില് ചില നിര്ദേശങ്ങള് കുംബ്ളേ നേരത്തേ ബിസിസിഐ യോഗത്തിന് മുന്നില് വെച്ചതും തര്ക്കത്തിന് അടിവരയിടുന്ന കാര്യങ്ങളായിരുന്നു.
ടീം മികച്ച പ്രകടനം നടത്തുമ്പോള് 30 ശതമാനം ബോണസ് കൂടി നല്കണമെന്നും പറഞ്ഞു. താരങ്ങളുടെ വാര്ഷീക പ്രതിഫലം കായികക്ഷമതയുടെ അടിസ്ഥാനത്തില് ആയിരിക്കണമെന്നും പ്രതിഫലത്തിന്റെ 20 ശതമാനം തുക കായികക്ഷമതാ നിലവാരത്തിന്റെ അടിസ്ഥാനത്തില് താരങ്ങള്ക്കു ലഭ്യമാക്കണം. ലോകകപ്പ് വിജയിച്ചാല് താരങ്ങള്ക്ക് രണ്ടു കോടി വീതവും ചാംപ്യന്സ്ട്രോഫ, ട്വന്റി20 ലോകകപ്പ് വിജയങ്ങള്ക്ക് ഒരു കോടീ രൂപ വീതം നല്കണമെന്നും കുംബ്ളേ ആവശ്യപ്പെട്ട്. ബാറ്റിംഗ് പരിശീലകന് സഞ്ജയ് ബംഗാറിന്റെ പ്രതിഫലം 2.25 കോടി രൂപയും ബൗളിംഗ് പരിശീലകന് ആര് ശ്രീധറിന്റേത് 1.75 കോടിയായും ഉയര്ത്തണമെന്നും കുംബ്ളേ ആവശ്യപ്പെട്ടു. താരങ്ങളുടെയും പരിശീലകരുടേയും കരാറുകള് പുന:ക്രമീകരിക്കുന്നത് സംബന്ധിച്ച് ബിസിസിഐ ഇടക്കാല ഭരണസമിതി മുമ്പാകെ കഴിഞ്ഞമാസം സമര്പ്പിച്ച റിപ്പോര്ട്ടിലായിരുന്നു കുംബ്ളേ ഈ നിര്ദേശങ്ങള് മുന്നോട്ട് വെച്ചിരുന്നത്.
അതേസമയം 1990 ല് തുടര്ച്ചയായി ഇന്ത്യ പരാജയപ്പെട്ടപ്പോള് പരിശീലകന് കപില്ദേവിനെ പുറത്താക്കാന് ചുക്കാന് പിടിച്ച കളിക്കാരില് ഒരാളായിരുന്നു കുംബ്ളേയെന്നും റിപ്പോര്ട്ടുണ്ട്. കുംബ്ളേ രാജി വെച്ചതിന് പിന്നാലെ വെസ്റ്റിന്ഡീസ് പര്യടനത്തിനായി എത്തിയ ഇന്ത്യന് ടീമിന്റെ ആദ്യ കളി മഴയില് ഒലിച്ചുപോയി. എങ്കിലും പരമ്പര ജയിക്കേണ്ട ബാധ്യത ഇപ്പോള് നായകന് കോഹ്ലിക്ക് മുകളിലാണ്.
