കൊച്ചി: യുവനടിയെ തട്ടിക്കൊണ്ടു പോയ കേസില് ജാമ്യം ലഭിക്കാവുന്ന കുറ്റം മാത്രം ചുമത്തപ്പെട്ടിരിക്കുന്ന അഭിഭാഷകന് പ്രതീഷ് ചാക്കോയ്ക്ക് മേല് കുരുക്ക് മുറുകുന്നു. നിയമസഹായത്തിനപ്പുറത്ത് കുറ്റകൃത്യം മറയ്ക്കാനും മുഖ്യപ്രതി സുനില്കുമാറിനെ പ്രതീഷ് ചാക്കോ സഹായിച്ചിരുന്നോ എന്ന സംശയം ഉയരുന്ന സാഹചര്യത്തില് പോലീസ് ഇയാള്ക്കെതിരേ ഗൗരവമായ കുറ്റകൃത്യങ്ങള് ചുമത്തിയേക്കും.
കേസ് അന്വേഷണത്തില് പ്രധാന തെളിവായ മൊബൈല്ഫോണിന്റെ കാര്യത്തില് പോലീസിനെ വഴി തെറ്റിക്കുന്ന മൊഴി നല്കി പ്രതീഷ്ചാക്കോ പോലീസിന് വലിയ തലവേദനയായി മാറിയിരിക്കുകയാണ്. മൊബൈല്ഫോണിന്റെ കാര്യത്തില് ചോദ്യം ചെയ്യലില് ഇയാള് മൊഴി മാറ്റിമാറ്റി പറഞ്ഞ് പോലീസിനെ വഴി തെറ്റിക്കുകയാണ്. മൊബൈല് വിഐപി ഏറ്റുവാങ്ങിയെന്ന് പറഞ്ഞിരുന്ന പ്രതീഷ്ചാക്കോ പിന്നീട് തന്റെ ജൂണിയര് അഭിഭാഷകനെ ഏല്പ്പിച്ചെന്നും ഒടുവില് കത്തിച്ചു കളഞ്ഞെന്നുമാണ് ഇപ്പോള് പറയുന്നത്. ഇങ്ങിനെ മൊഴിമാറ്റി പറയുന്ന സാഹചര്യത്തില് മൊബൈല് പ്രതീഷ് ചാക്കോ നശിപ്പിച്ചിരിക്കാന് ഇടയില്ലെന്നും അയാളുടെ തന്നെ പക്കല് ഉണ്ടായിരിക്കാമെന്നുമാണ് വിരമിച്ച കുറ്റാന്വേഷണ വിദഗ്ദ്ധരുടെ അഭിപ്രായം. നേരത്തേ മൊബൈല് ഗോശ്രീപാലത്തില് നിന്നും കായലിലേക്ക് എറിഞ്ഞെന്ന് ആയിരുന്നു സുനി പോലീസിനോട് പറഞ്ഞിരുന്നത്. നേരത്തേ പോലീസിന്റെ പിടിയില്പെടാതെ കോടതിയില് കീഴടങ്ങാന് സുനി എത്തിയത് പ്രതീഷ്ചാക്കോയുടെ ഓഫീസിലായിരുന്നു.
പോലീസിനോട് മൊബൈല് കായലിലേക്ക് എറിഞ്ഞെന്ന് പറയാന് ആവശ്യപ്പെട്ടതും പ്രതീഷ്ചാക്കോയായിരുന്നു. പിടിയിലായ ശേഷവും സുനിലുമായി പ്രതീഷ് സംസാരിച്ചിരുന്നു. ഒളിവിലായിരുന്ന പ്രതികളെ അഭിഭാഷക വേഷത്തില് കോടതിയില് എത്തിച്ചതിന് പിന്നില് പ്രതീഷ് ആയിരുന്നു. കോടതിയില് പ്രതികളെ അറസ്റ്റ് ചെയ്യാനുള്ള നീക്കത്തെ തടയാന് ശ്രമിച്ചത് പ്രതീഷും ജൂണിയര് അഭിഭാഷകരും ആയിരുന്നെന്നും ആരോപണമുണ്ട്. പ്രതീഷ്ചാക്കോയുടെ ഓഫീസില് നിന്നും സുനിയുടെ ബാഗും വസ്ത്രങ്ങളും കണ്ടെടുക്കുകയും ചെയ്തിരുന്നു.
പ്രധാനപ്രതി സുനി എല്ലാം സസ്പെന്സില് നിര്ത്തുകയും ഗൂഡാലോചനകേസ് പ്രതി ദിലീപ് ചോദ്യം ചെയ്യലിനോട് വേണ്ടത്ര സഹകരിക്കാതിരിക്കുകയും ചെയ്യുന്നു. കേസുമായി ബന്ധപ്പെട്ട മുഴുവന് വിവരങ്ങളും അന്വേഷണ സംഘത്തിന് കൈമാറുമെന്ന ഉറപ്പിലാണ് പ്രതീഷ്ചാക്കോയ്ക്കെതിരേ ജാമ്യം ലഭിക്കാവുന്ന വകുപ്പുകള് മാത്രം ചുമത്തിയത്. പ്രതികളുമായി ബന്ധമുണ്ടെന്ന ആരോപണത്തിന് പിന്നാലെ വക്കാലത്ത് ഒഴിഞ്ഞിരുന്നെങ്കിലും പ്രധാനപ്രതിയെ സംരക്ഷിക്കുന്ന രീതിയില് ഇയാള് ഉറച്ചു നിന്നാല് ഗൂഡാലോചന, തൊണ്ടി നശിപ്പിക്കല്, പ്രതികളെ സംരക്ഷിക്കല് തുടങ്ങിയ ഗൗരവമുള്ള വകുപ്പുകള് പ്രതീഷ്ചാക്കോയ്ക്കെതിരേ ചുമത്തിയേക്കാന് സാധ്യതയുണ്ട്.
