ചിങ്ങവനം(കോട്ടയം): തോട്ടിലേക്കു മറിഞ്ഞ ടിപ്പര്ലോറിക്കടിയില് ചെളിയില് പൂണ്ടു ഡ്രൈവര്ക്കു ദാരുണാന്ത്യം. ഇടുക്കി കൊച്ചറ പുളിക്കല് ചാക്കോ മത്തായിയുടെ മകന് ഷെറിന് ചാക്കോ (34)യാണു മരിച്ചത്. കാനം കൊന്നയ്ക്കലില് കുടുംബ സമേതം വാടകയ്ക്ക് താമസിക്കുകയായിരുന്നു.
ഇന്നലെ രാവിലെ പത്തരയോടെ ചന്തയ്ക്കു സമീപം വെട്ടിത്തറയില് തോട്ടിലേക്കാണു മറിഞ്ഞത്. മെറ്റല് ചിപ്സുമായി വെട്ടിത്തറയിലെ ഹോളോബ്രിക്സ് നിര്മാണശാലയിലേക്കു പോകുകയായിരുന്നു ഷെറിന്. ഓട്ടോറിക്ഷയ്ക്കു െസെഡ് കൊടുക്കുന്നതിനിടെ തോടിനോടു ചേര്ന്നുള്ള റോഡിന്റെ വശം ഇടിഞ്ഞു വണ്ടി ചരിഞ്ഞു. ലോറിയില്നിന്നു ചാടിയെങ്കിലും ലോഡ് തള്ളിയാല് മറിയില്ലെന്ന ധാരണയില് വീണ്ടും അകത്തു കയറിയതോടെ ലോറി കൂടുതല് ചരിഞ്ഞു.
രക്ഷപ്പെടാന് വാതില് തുറന്നു തോട്ടിലേക്കു ചാടിയ ഷെറിന്റെ മുകളിലേക്കു വണ്ടി മറിയുകയായിരുന്നു. മറിഞ്ഞ ലോറിക്കടിയിലെ ചെളിയില് രണ്ടു മണിക്കൂറോളം കുടങ്ങിക്കിടന്നു. ഇതുകണ്ടു ബിവറേജസ് ഔട്ട്ലെറ്റിലുണ്ടായിരുന്നവര് ഓടിയെത്തിയെങ്കിലും രക്ഷിക്കാനായില്ല. തുടര്ന്നു ചിങ്ങവനം എസ്.ഐഃ അനൂപ് സി.നായരുടെ നേതൃത്വത്തിലെത്തിയ പോലീസ് സംഘവും കോട്ടയത്തു നിന്ന് എത്തിയ അഗ്നിശമന സേനാംഗങ്ങളും ക്രെയിന് ഉപയോഗിച്ചു വണ്ടി ഉയര്ത്താന് ശ്രമിച്ചെങ്കിലും കഴിഞ്ഞില്ല.
രണ്ടു മണിക്കൂറിനു ശേഷം കോട്ടയത്തുനിന്നു രണ്ടു കൂറ്റന് ക്രെയിനുകള് എത്തിച്ചാണു ലോറി ഉയര്ത്തിയത്. കോട്ടയം മെഡിക്കല് കോളജ് ആശുപത്രിയില് പോസ്റ്റുമോര്ട്ടത്തിനു ശേഷം മൃതദേഹം ബന്ധുക്കള്ക്കു വിട്ടുനല്കി. സംസ്കാരം പിന്നീട്. അനുമോളാണു ഭാര്യ. മക്കള്: സോഹന് (5), റിയ (ഒന്ന്)
