തിരുവനന്തപുരം: സ്ത്രീപീഡനക്കേസില് പിടിയിലായ എം വിന്സെന്റിനെ അറസ്റ്റ് ചെയ്തതിനെ തുടര്ന്നുള്ള അക്രമ സംഭവങ്ങളില് നെയ്യാറ്റിന്കര, കാട്ടാക്കട താലൂക്കുകളില് 144 പ്രഖ്യാപിക്കാന് പോലീസ് നിര്ദേശിച്ചു. ഏതാനും ദിവസങ്ങളിലായി ഈ മേഖലകളില് കോണ്ഗ്രസ് സിപിഎം പോര് തെരുവു യുദ്ധമായി മാറിയതോടെ എം വിന്സെന്റിന്റെ ജാമ്യാപേക്ഷ ഇന്ന് പരിഗണിക്കുന്ന സാഹചര്യത്തില് നിരോധനാജ്ഞ പ്രഖ്യാപിക്കാന് കളക്ടറോട് നിര്ദേശിച്ചിട്ടുണ്ട്. സംഘര്ഷങ്ങള് കണക്കിലെടുത്ത് രാവിലെ ഒമ്പതു മണി മുതല് 144 നിലവില് വരും.
കഴിഞ്ഞ ദിവസം നെയ്യാറ്റിന് കര കോടതി വിന്സെന്റിന്റെ ജാമ്യാപേക്ഷ തള്ളിയിരുന്നു. ഇതിന് പിന്നാലെ തിരുവനന്തപുരം സെഷന്സ് കോടതി വിന്സെന്റിന്റെ ജാമ്യാപേക്ഷ ഇന്ന് പരിഗണിക്കുകയും ചെയ്യുന്നുണ്ട്. അതേസമയം നിരോധനാജ്ഞ പ്രഖ്യാപിച്ചാലും ഇന്ന് എംഎല്എ യുടെ വീട്ടിലേക്ക് തീരുമാനിച്ചിരിക്കുന്ന പ്രതിഷേധ മാര്ച്ചിന് മാറ്റമുണ്ടാകില്ലെന്ന നിലപാടിലാണ് സിപിഎം. അതേസമയം ഇന്നലെ സിപിഎം - കോണ്ഗ്രസ് പ്രവര്ത്തകര് തമ്മിലുള്ള ഏറ്റുമുട്ടല് രാത്രി വൈകിയും തുടര്ന്നിരുന്നു. അക്രമം ഇന്ന് വലിയ നിലയിലേക്ക് മാറാന് സാധ്യതയുണ്ടെന്നാണ് ഭീതി.
കോണ്ഗ്രസ് സമരപ്പന്തലില് എത്തി സിപിഎം ആയിരുന്നു ഇന്നലെ സംഘര്ഷം തുടങ്ങിയതെന്നാണ് റിപ്പോര്ട്ട്. ഇത് രാത്രി വൈകിയും നീളുകയായിരുന്നു. പീഡനാരോപണം രാഷ്ട്രീയ പ്രേരിതമാണെന്നും സിപിഎം ആണ് പിന്നിലെന്നുമാണ് കോണ്ഗ്രസ് ആരോപിച്ചത്. എന്നാല് ഇതില് ഒരു ഗൂഡാലോചനയും ഇല്ലെന്നാണ് സിപിഎം വാദം. എല്ഡിഎഫ് എംഎല്എയുടെ വീട്ടിലേക്ക് മാര്ച്ച് പ്രഖ്യാപിച്ചിരിക്കുന്ന സാഹചര്യത്തില് ഇത് മുന്നില് കണ്ടാണ് പോലീസ് നീക്കവും. എംഎല്എയുടെ വീടിനും യുവതിയുടെ വീടിനും ശക്തമായ പോലീസ് കാവലാണ് നല്കിയിട്ടുള്ളത്.
