ഫുട്ബോളിലെ ക്ളബ്ബ് മാറ്റത്തിന്റെ കാര്യത്തില് ചരിത്രം കുറിച്ച ട്രാന്സ്ഫെര് ഇനി മുതല് ബ്രസീലിയന് താരം നെയ്മര്ക്കൊപ്പമാണെങ്കിലും സ്പാനിഷ് ക്ളബ്ബ് ബാഴ്സിലോണ വിടാനുള്ള ആശയം ജീവിതത്തില് താന് എടുത്ത ഏറ്റവും ദുഷ്ക്കരമായ തീരുമാനങ്ങളില് ഒന്നായിരുന്നെന്ന് നെയ്മറുടെ പ്രതികരണം. ഫ്രഞ്ച് ക്ളബ്ബ് പാരിസ് സെന്റ് ജെര്മെയ്നില് എത്തിയ താരം ക്ളബ്ബില് ചേര്ന്നതിന് തൊട്ടു പിന്നാലെ നടത്തിയ വാര്ത്താസമ്മേളനത്തിലാണ് ഇക്കാര്യം വ്യക്തമാക്കിയത്. മെസിയേയും സുവാരസിനേയുമെല്ലാം പിരിയേണ്ടി വരുന്നത് ദു:ഖകരമായിരുന്നെന്നും പറഞ്ഞു.
ബാഴ്സിലോണ വിടാനുള്ള തീരുമാനം ഒരിക്കലും പ്രതിഫലം മോഹിച്ചായിരുന്നില്ല എന്നും മറിച്ച് കൂടുതല് വലിയ വെല്ലുവിളികള് തേടിയായിരുന്നെന്നും താരം പറഞ്ഞു. എനിക്ക് വേണ്ടത് കൂടുതല് വലിയ വെല്ലുവിളികളാണ്. ക്ളബ്ബിനെ വിജയങ്ങളിലേക്ക് നയിക്കുക എന്നതാണ്. നെയ്മര് പറഞ്ഞു. തന്നെപ്പോലെ തന്നെ ഏറെ മോഹങ്ങളുള്ള ക്ളബ്ബാണ് പാരീസ് സെന്റ് ജെര്മെയ്നും. എന്നിരുന്നാലും ഫുട്ബോള് ലോകത്തിലെ ഏറ്റവും മാരകമായ മുന്നേറ്റ നിരയായ മെസി - നെയ്മര് - സുവാരസ് സഖ്യത്തില് നിന്നും വേര്പെടാന് എടുത്ത തീരുമാനം ജീവിതത്തില് ഏറെ ദുഷ്ക്കരമായിരുന്നെന്ന് താരം പറഞ്ഞു. ബാഴ്സിലോണ നഗരവും ടീമും തന്നെ നന്നായിട്ടാണ് ഏറ്റെടുത്തത്. അവിടെ അനേകം സുഹൃത്തുക്കള് ഉണ്ടായിരുന്നു. അതുകൊണ്ട് തന്നെ ക്ളബ്ബ് വിടാനുള്ള തീരുമാനം അത്ര അനായാസമുള്ള ഒന്നായിരുന്നില്ലെന്ന് താരം പറഞ്ഞു.
'ഒരു കൂട്ടം കൂട്ടുകാരെയാണ് വിട്ടു പോകുന്നത്. ഇനി ഞാന് എന്തുചെയ്യും. എന്ന് മാനസീക സമ്മര്ദ്ദം അനുഭവിച്ച കാലമായിരുന്നു അത്. പക്ഷേ ഫുട്ബോളില് കാര്യങ്ങള് മാറുന്നത് പെട്ടെന്ന് ഒരു നീക്കം ഉണ്ടാകുന്നത് പോലെയാണ്.' താരം പറഞ്ഞു. താരത്തെ പരിചയപ്പെടുത്തുന്ന പരിപാടി വൈകിട്ട് 3.45 നാണ് തുടങ്ങുക. 5.15 ന് താരത്തെ അവതരിപ്പിക്കും. ചടങ്ങിലേക്ക് 45,000 പേരെയാണ് ക്ളബ്ബ് പ്രതീക്ഷിക്കുന്നത്. വെള്ളിയാഴ്ച രാവിലെ സ്വകാര്യ ജെറ്റിലാണ് താരം പാരീസിന്റെ വടക്കുകിഴക്കന് ഭാഗത്തെ ലേ ബോര്ഗറ്റ് വിമാനത്താവളത്തില് എത്തിയത്. പിന്നീട് കാര് മാര്ഗ്ഗം പിഎസ്ജി യുടെ മൈതാനമായ പാര്ക്ക് ഡെസ് പ്രിന്സസ് സ്റ്റേഡിയത്തില് എത്തി. വ്യാഴാഴ്ച ലോകറെക്കോഡ് കൈമാറ്റത്തുകയായ 264 ദശലക്ഷം ഡോളറിയാന് നെയ്മര് പാരീസ് സെന്റ് ജെര്മെയ്നില് ചേര്ന്നത്.
ബാഴ്സിലോണയുടെ കുപ്പായത്തില് റിയല് മാഡ്രിഡിനെതിരേ മിയാമിയില് സൗഹൃദമത്സരത്തില് അവസാനം കളിച്ച നെയ്മര് പക്ഷേ ഫ്രാന്സില് പാരീസ് സെന്റ് ജെര്മെയ്നായി ആദ്യം കളിക്കുന്നത് അമീനസിനെതിരേയാണ്. സീസണ് മുന്നോടിയായുള്ള പരിശീലനം രണ്ടു ദിവസം മുമ്പ് വരെ നടത്തിയിരുന്നു. ഇനി പിഎസ്ജിയുടെ കുപ്പായത്തില് കളിക്കുന്നത് ആകാംഷയോടെ കാത്തിരിക്കുകയാണ് എന്നും താരം പറഞ്ഞു. അഞ്ചു വര്ഷത്തേക്ക് ഒരു വര്ഷം 30 ദശലക്ഷം യൂറോയുടെ കരാറാണ് താരത്തിന് പിഎസ്ജിയില്. ഒപ്പിടുന്നതോടെ ചൈനയിലെ ഷങ്ഹായി ഷെന്ഹുവയില് വര്ഷം 38 ദശലക്ഷം യൂറോ കിട്ടുന്ന കാര്ലോസ് ടെവസിന് തൊട്ടു പിന്നില് ഏറ്റവും കുടുതല് പ്രതിഫലം വാങ്ങുന്ന താരമാകും നെയ്മര്.
റിയല് മാഡ്രിഡില് 23.6 ദശലക്ഷം യൂറോയാണ് ക്രിസ്ത്യാനോ റൊണാള്ഡോയുടെ വാര്ഷിക ശമ്പളം. 105 ദശലക്ഷം യൂറോയ്ക്ക് ഇറ്റാലിയന് ക്ളബ്ബ് യുവന്റസില് നിന്നും ഇംഗ്ളീഷ് ക്ളബ്ബ് മാഞ്ചസ്റ്റര് യുണൈറ്റഡ് ഫ്രഞ്ച് താരം പോള് പോഗ്ബയെ എത്തിച്ചതാണ് നെയ്മറിന്റെ ട്രാന്സ്ഫര് തുക മറികടന്നത്.
