ചെന്നൈ : ജയലളിതയുടെ മരണത്തിന് ശേഷം തമിഴ്നാട്ടില് ഉടലെടുത്ത രാഷ്ട്രീയ പ്രതിസന്ധി വീണ്ടും മുറുകുന്നു. ജയിലില് കഴിയുന്ന എഐഎഡിഎംകെ ജനറല് സെക്രട്ടറി വി.കെ ശശികലയെ അനുകൂലിക്കുന്ന 19 എംഎല്എമാര് തമിഴ്നാട് മുഖ്യമന്ത്രി എടപ്പാടി പളനിസ്വാമിക്ക് പിന്തുണ പിന്വലിച്ചതായി ഗവര്ണര് സി. വിദ്യാസാഗര് റാവുവിനെ അറിയിച്ചതോടെയാണ് പ്രതിസന്ധി മുറുകിയിരിക്കുന്നത്.
ശശികലയുടെ മരുമകന് ടിടിവി ദിനകരന്റെ നേതൃത്വത്തില് ഇന്ന് രാവിലെയാണ് എംഎല്എമാര് രാജ്ഭവനിലെത്തി ഗവര്ണറെ കണ്ടത്. സര്ക്കാരില് വിശ്വാസം നഷ്ടപ്പെട്ടുവെന്നും അതിനാല് പളനിസ്വാമി സര്ക്കാരിനെ പുറത്താക്കണമെന്നും എംഎല്എമാരുടെ സംഘം ഗവര്ണര്ക്ക് നിവേദനം നല്കി. രാവിലെ ദിനകരന്റെ സവതിയില് നടന്ന ചര്ച്ചയ്ക്ക് ശേഷമായിരുന്നു എംഎല്എമാര് ഗവര്ണറെ സന്ദര്ശിച്ചത്. ഭരണകക്ഷി ന്യൂനപക്ഷമായ സാഹചര്യത്തില് മുഖ്യമന്ത്രിയെ നീക്കണമെന്നാണ് ഇവരുടെ ആവശ്യം.
എടപ്പാടി പളനിസ്വാമിയുടെ നേതൃത്വത്തിലും മുന് മുഖ്യമന്ത്രി ഒ.പനീര്ശെല്വത്തിന്റെ നേതൃത്വത്തിലുമുള്ള പാര്ട്ടിയിലെ രണ്ടു പക്ഷങ്ങള് ലയിച്ചതായി ഇന്നലെ (തിങ്കളാഴ്ച) യാണ് പ്രഖ്യാപിച്ചത്. 233 അംഗ നിയമസഭയില് 134 എംഎല്എമാരാണ് എഐഎഡിഎംകെയ്ക്ക് ഉള്ളത്. ഭൂരിപക്ഷം തെളിയിക്കാന് 117 എംഎല്എമാരുടെ പിന്തുണയാണ് വേണ്ടത്.
