ഹൈദരാബാദ്: ഇന്ത്യയോടുള്ള സ്നേഹവും നന്ദിയും പ്രകടിപ്പിച്ച് അമേരിക്കൻ പ്രസിഡന്റ് ഡൊണാൾഡ് ട്രംപ്. തെലങ്കാനയിലെ ഹൈദരാബാദിൽ ഒരു പ്രധാന റോഡിന് തന്റെ പേര് നൽകിയതിനാണ് ട്രംപ് സമൂഹമാധ്യമമായ 'ട്രൂത്ത് സോഷ്യൽ' വഴി ഇന്ത്യക്ക് നന്ദി അറിയിച്ചത്. ഈ രീതിയിൽ ആദരിക്കപ്പെടുന്ന ആദ്യത്തെ യുഎസ് പ്രസിഡന്റാണ് താനെന്നും ട്രംപ് കുറിച്ചു.
ഹൈദരാബാദിലെ യുഎസ് കോൺസുലേറ്റിനോട് ചേർന്നുള്ള റോഡിനാണ് തെലങ്കാന സർക്കാർ അടുത്തിടെ 'ഡൊണാൾഡ് ട്രംപ് അവന്യൂ' എന്ന് പേരിട്ടത്. തെലങ്കാന ഉപമുഖ്യമന്ത്രി മല്ലു ഭട്ടി വിക്രമാർകയും ഇന്ത്യയിലെ യുഎസ് അംബാസഡർ സെർജിയോ ഗോറും ചേർന്ന് ഈ ആഴ്ച ആദ്യം റോഡിന്റെ നാമകരണ ഫലകം അനാച്ഛാദനം ചെയ്തിരുന്നു. ഈ ചടങ്ങിന്റെ ചിത്രം പങ്കുവെച്ചുകൊണ്ടാണ് ട്രംപ് തന്റെ സന്തോഷം പങ്കുവെച്ചത്.
മൈക്രോസോഫ്റ്റ്, ഗൂഗിൾ, ആമസോൺ തുടങ്ങിയ ലോകപ്രശസ്ത അമേരിക്കൻ ഐടി കമ്പനികളുടെ ഓഫീസുകൾ സ്ഥിതി ചെയ്യുന്ന പ്രധാന ഐടി ഹബിന് തൊട്ടടുത്താണ് ഈ പുതിയ 'ഡൊണാൾഡ് ട്രംപ് അവന്യൂ' എന്നുള്ളത് ഈ നാമകരണത്തിന് കൂടുതൽ തിളക്കമേകുന്നു. അമേരിക്കയോടുള്ള ആദരസൂചകമായും ഇന്ത്യ-യുഎസ് ബന്ധത്തിൽ ഹൈദരാബാദിനുള്ള പ്രാധാന്യത്തിന്റെ അംഗീകാരമായുമാണ് റോഡിന് ഈ പേര് നൽകിയതെന്ന് തെലങ്കാന സർക്കാർ വ്യക്തമാക്കി. എന്തായാലും ഹൈദരാബാദിന്റെ മണ്ണിൽ സ്വന്തം പേര് പതിഞ്ഞത് അമേരിക്കയിലും വലിയ രീതിയിൽ ചർച്ചയായിക്കഴിഞ്ഞു.
