കൊച്ചി: കൊച്ചിയില് യുവനിടയെ ആക്രമിച്ച കേസില് സംവിധായകന് നാദിര്ഷായുടെ മുന്കൂര് ജാമ്യഹര്ജി ഇന്ന് ഹൈക്കോടതി പരിഗണിക്കും. അന്വേഷണ സംഘം രണ്ടാമതും ചോദ്യം ചെയ്യാന് വിളിപ്പിച്ചതിനു പിന്നാലെ നാദിര്ഷ ആശുപത്രിയില് ചികിത്സ തേടിയിരിക്കുകയാണ്.
ജാമ്യം നല്കുന്നതിനെ ശക്തമായി എതിര്ക്കാനാണ് പ്രോസിക്യൂഷന്റെ നീക്കം. കേസില് ആദ്യം നടന് ദിലീപിനെ ചോദ്യം ചെയ്യാന് ആലുവ പോലീസ ക്ലബിലേയ്ക്ക് വിളിപ്പിച്ച അതേ ദിവസം തന്നെ ചോദ്യം ചെയ്യാന് നാദിര്ഷായേയും വിളിപ്പിച്ചിരുന്നു. ദിലീപിന്റെ ഉറ്റസുഹൃത്താണ് നാദിര്ഷ. നാദിര്ഷായെ രണ്ടാമത് ചോദ്യം ചെയ്യാന് വിളിപ്പിച്ചതിനു പിന്നാലെ എറണാകുളത്തെ സ്വകാര്യ ആശുപത്രിയില് ചികിത്സ തേടുകയായിരുന്നു.
കേസില് ഉള്പ്പെടുത്തി അറസ്റ്റ് ചെയ്യുമെന്നു പോലീസ് ഭീഷണിപ്പെടുത്തിയെന്നാണു ഹര്ജിയിലെ ആരോപണം. അന്വേഷണവുമായി ഇതുവരെ എല്ലാവിധത്തിലും സഹകരിച്ചിട്ടുണ്ട്. ഈ സാഹചര്യത്തില് തന്നെ അറസ്റ്റ് ചെയ്യുന്നത് ഒഴിവാക്കാന് നടപടിയെടുക്കണമെന്നു നാദിര്ഷ ആവശ്യപ്പെട്ടു. നെഞ്ചുവേദനയുമായി കൊച്ചിയിലെ സ്വകാര്യ ആശുപത്രിയില് ചികിത്സയിലാണ് സംവിധായകന്.
നാദിര്ഷയെ വീണ്ടും ചോദ്യം ചെയ്യേണ്ടി വരുമെന്ന് ആലുവ റൂറല് എസ്.പി: എ.വി. ജോര്ജ് പറഞ്ഞു. അറസ്റ്റ് ചെയ്യുമെന്ന് ആരെയും ഭീഷണിപ്പെടുത്തിയിട്ടില്ലെന്നും എസ്.പി. അറിയിച്ചു.
