സിര്സ: ബലാത്സംഗകേസില് ജയിലില് കഴിയുന്ന ഗുര്മീത് റാം റഹിം സിങ്ങിന്റെ ദേരാ സച്ചാ സൗധ ആശ്രമത്തിലെ പോലീസ് നടത്തുന്ന റെയ്ഡ് ഒരാഴ്ച നീളുമെന്ന് റിപ്പോര്ട്ട്. കനത്ത സന്നാഹത്തില് പോലീസും സൈന്യവും ആശ്രമത്തില് ഇന്നു രാവിലെയാണ് പരിശോധന ആരംഭിച്ചത്.
ഹൈക്കോടതി നിയമിച്ച റിട്ടയേര്ഡ് ജഡ്ജ് എ.കെ പവറിന്റെ നേതൃത്വത്തിലാണ് പോലീസ് പരിശോധന പുരോഗമിക്കുന്നത്. വ്യാഴാഴ്ച രാത്രി തന്നെ സുരക്ഷാ ഉദ്യോഗസ്ഥരും ഇന്റലിജന്സും ചേര്ന്ന് റെയ്ഡിനായി വ്യക്തമായ പദ്ധതി ആസൂത്രണം ചെയ്തിരുന്നു.
ആശ്രമത്തിനുള്ളിലെ നിരവധി പൂട്ടുകള് പൊളിക്കാനായി 22 കൊല്ലന്മാരും പരിശോധനാ സംഘത്തിനൊപ്പം ഉണ്ട്. ആശ്രമത്തിലെ ക്യാംപസിനുള്ളിലെ പരിശോധനയ്ക്കായി സാറ്റ്ലൈറ്റ് മാപ്പും സുരക്ഷാ ഉദ്യോഗസ്ഥര് ഒരുക്കിയിരുന്നു. 41 കമ്പനി അര്ധസൈനികരെ ആശ്രമത്തിനു ചുറ്റും വിന്യസിച്ചിരിക്കുകയാണ്. ഡോഗ് സ്വകാഡിന്റെ പിന്തുണയോടെയാണിത്.
പഞ്ചാബ്-ഹരിയാന പോലീസാണ് പരിശോധനയ്ക്ക് നേതൃത്വം നല്കുന്നത്. ആള്ദൈവത്തിന്റെ മടയില് നിന്ന് ഞെട്ടിപ്പിക്കുന്ന വിവരങ്ങള് ലഭ്യമാകുമെന്നാണ് സൂചന. പരിശോധനയെ തുടര്ന്ന് സിര്സയില് നിരേധനാഞ്ജ പ്രഖ്യാപിച്ചു.
800 ഏക്കര് സ്ഥലത്തായി നിലകൊള്ളുന്ന സിര്സയിലെ ആശുപത്രി, വിദ്യഭ്യാസ സ്ഥാപനങ്ങള്, റിസോര്ട്ടുകള് തുടങ്ങിയ സ്ഥലങ്ങളിലാണ് പരിശോധന. അനുയായികളോട് സംയമനം പാലിക്കണമെന്ന് പോലീസ് നിര്ദേശം നല്കിയിട്ടുണ്ട്. ഗുര്മീതിന്റെ രഹസ്യ ഗുഹയിലേയ്ക്കാണ് രാജ്യം ഉറ്റുനോക്കുന്നത്. ഗുര്മീത് കുറ്റക്കാരനാണെന്ന് കോടതി വിധി വന്നതിനു പിന്നാലെ അനുയായികള് നടത്തിയ കലാപത്തില് 38 പേരാണ് മരിച്ചത്.
