ആറ്റിങ്ങല്: കാറിലെത്തിയ സംഘം തട്ടിക്കൊണ്ടു പോകാന് ശ്രമിച്ചുവെന്ന വിദ്യാര്ത്ഥിനിയുടെ കഥ വിശ്വസിച്ച് പോലീസും, വീട്ടുകാരും, നാട്ടുകാരും പരക്കം പാഞ്ഞത് മണിക്കൂറുകളോളം. ഒരു തുമ്പു പോലും കണ്ടെത്താന് സാധിക്കാതെ വന്നപ്പോള് പോലീസ് നടത്തിയ വിശദമായ ചോദ്യം ചെയ്യലിനൊടുവില് ആ കള്ളക്കഥ പൊളിഞ്ഞു.
ട്യൂഷന് പോകാനുള്ള മടികൊണ്ട് പെണ്കുട്ടി മെനഞ്ഞെടുത്തത് സീരിയലിനെ വെല്ലും കഥയാണ് അതിന് പ്രചോദനമായതും സീരിയല് തന്നെ.
നഗരത്തില് സ്കൂളില് പഠിക്കുന്ന പെണ്കുട്ടി രാവിലെ ഏഴു മണിയോടെ ട്യൂഷനു പോകാനായി വീട്ടില്ഇ നിന്നും ഇറങ്ങി. എന്നാല് കുറച്ചു സമയങ്ങള്ക്കു ശേഷം പെണ്കുട്ടി കരഞ്ഞുകൊണ്ട് ഓടിക്കിതച്ചു വീട്ടിലെത്തി. കാറിലെത്തിയവര് തന്നെ തട്ടിക്കൊണ്ടു പോകാന് ശ്രമിച്ചുവെന്നും, ബാഗ് കൊണ്ട് അടിച്ച ശേഷം ഓടി രക്ഷപ്പെടുകയായിരുന്നുവെന്നും പെണ്കുട്ടി പറഞ്ഞു. ഉടന് തന്നെ വീട്ടുകാര് റെസിഡന്സ് അസോസി്യേഷനേയും, പോലീസിനേയും വിവരം അറിയിക്കുകയായിരുന്നു.
തുടര്ന്ന് പോലീസ് മറ്റു സ്റ്റേഷനുകളിലേയ്ക്കും വിവരം കൈമാറി. സംഭവം പരന്നതോടെ ആളുകള് തടിച്ചുകൂടുകയും ചെയ്തു. പിന്നാലെ റോഡില് സ്ഥാപിച്ചിട്ടുള്ള സിസിടിവി ദൃശ്യങ്ങള് വെച്ച് പരിശോധന നടത്തിയെങ്കിലും പെണ്കുട്ടി പറഞ്ഞതുപോലെയുള്ള വാഹനം കണ്ടെത്താനായില്ല. അതോടെ കുട്ടിയെ പോലീസ് വിശദമായി കാര്യങ്ങള് ചോദിച്ചു. കൂട്ടുകാരിയുടെ അമ്മൂമ്മ കുട്ടി അവിടെ ചെന്നിരുന്നില്ലെന്നും അറിയിച്ചതോടെ പെണ്കുട്ടിയേയും, അമ്മൂമ്മയേയും ഒരുമ്മിച്ച് നിര്ത്തി കാര്യങ്ങള് തിരക്കിയതോടെയാണ് കഥ പൊളിഞ്ഞത്. ട്യൂഷന് പോകാനുള്ള മടി കാരണം സ്വയം കഥ മെനയുകയായിരുന്നുവെന്ന് പെണ്കുട്ടി അവസാനം സമ്മതിച്ചു. അതോടെ പെണ്കുട്ടിയെ വീട്ടുകാര്ക്കൊപ്പം കേസെടുക്കാതെ അയച്ചു. സീരിയലാണ് തനിക്ക് കഥ മെനയാന് പ്രചോദനമായതെന്ന് പെണ്കുട്ടി പറഞ്ഞുവെന്ന് പോലീസ് അറിയിച്ചു.
