സിനിമാ മേഖലയില് പതിവായ കാസ്റ്റിങ് കൗച്ചില് മലയാള സിനിമാ ലോകവും പുറകിലല്ലയെന്ന് നടി പത്മപ്രിയ. മലയാളത്തിലും ലൈംഗിക പീഡനങ്ങള് നടക്കുന്നുണ്ട്. കൊച്ചിയിലെ നടിയുടേതിന് സമാനമായ അനുഭവങ്ങള് അതിജീവിച്ച നടിമാരെ അറിയാം. ചിലര് ഭയന്ന് പുറത്തു പറയാറില്ല. ചിലര് ചാന്സ് നഷ്ടപ്പെടുമെന്ന് ഭയന്ന് എല്ലാം സഹിക്കും. ഒപ്പമുള്ളവരെ വിശ്വസിച്ചാണ് അഭിനയിക്കാന് പോകുന്നത് പക്ഷേ ചൂഷണം ചെയ്യുന്ന അവസ്ഥയുണ്ടെന്ന് താരം പറയുന്നു.
ചിലര് പീഡനത്തിന് ഇരയാകുന്നുണ്ട് എന്നാല് ചിലത് മാനഭംഗത്തിന്റെ പരിതിയില് വരുന്നതല്ല. എങ്കിലും ഷൂട്ടിങ് സെറ്റില് വെച്ച് ചിലര് നടിമാരുടെ നിതംബത്തില് ഉരസി പോകും. തോളില് പിടിച്ച് മോശമായ സംഭാഷണങ്ങള് പറഞ്ഞിട്ട് പോകും. ചിലര് മോശം മെസ്സേജുകള് അയയ്ക്കും. ഇതൊക്കെ ഫീല്ഡില് സ്ഥിരമായി നടക്കുന്ന കാഴ്ചയാണ്. പ്രതികരിച്ചാല് ഒരു സോറി പറയും അതില് കൂടുതലൊന്നും പ്രതീക്ഷിക്കരുത്.
ഒരു സിനിമയില് പ്രധാന വേഷം ലഭിക്കാന് സംവിധായകന്റെയോ നിര്മ്മാതാവിന്റെയോ കിടക്ക പങ്കിടേണ്ടി വരുന്ന നടിമാരെക്കുറിച്ച് കേട്ടിട്ടുണ്ട്. സമ്മതിച്ചില്ലെങ്കില് സ്ഥാനം നഷ്ടപ്പെടുമെന്ന് പേടിയുള്ളവര് സമ്മതിക്കുന്നു. അല്ലാത്ത നടിമാര് അവസരം നഷ്ടമാകുന്നു. നടി മാത്രമാണോ അപ്പോള് മോശക്കാരിയാകുന്നത്. വിളിച്ചവരും മോശക്കാരല്ലേ? എന്ന് പത്മപ്രിയ ചോദിക്കുന്നു.
പുതുമുഖ നടിമാര് മാത്രമാണ് പീഡനത്തിനിരയാകുന്നതെന്ന് വിചാരിക്കരുത്. പേരും പ്രശസ്തിയു, സിദ്ധിച്ച പ്രമുഖ നടിമാരും കിടക്ക പങ്കിടാന് മുന്നിരയിലുണ്ട്. കാരണം അവര്ക്ക് സിനിമയില് സ്ഥിരപ്രതിഷ്ഠ നേടണമെന്ന ആഗ്രഹമുണ്ട്. ഇപ്പോള് നിന്നാലും സ്ഥായിയായ നിലനില്പ്പുണ്ടാകുമെന്ന് ഇവര്ക്ക് ഉറപ്പുണ്ടോ?. ഇനിയും ഇത് തുടരുമെന്ന് പുരുഷന്മാര് വിചാരിക്കും. പക്ഷേ ഇപ്പോഴത്തെ പുതുതലമുറ നടിമാര് ഇതിന് തയ്യാറല്ല.
ഇത്തരം കാര്യങ്ങള്ക്ക് തയ്യാറാകാത്തതുകൊണ്ടാണ് തന്നെ ഒഴിവാക്കിയതെന്നും താരം പറഞ്ഞു. നല്ല സ്ക്രിപ്റ്റു നോക്കി മാത്രമാണ് ഞാന് അഭിനയിക്കുന്നതെന്ന് അവര്ക്കറിയാം, അഭിനയം കഴിഞ്ഞാല് ഒരു ചുംബനം പോലും എന്നില് നിന്ന് ലഭിക്കില്ലെന്ന് അവര്ക്കറിയാം അതുകൊണ്ട് എന്നെ ഒതുക്കിയിട്ടുണ്ടെന്നും പത്മപ്രിയ പറയുന്നു.
