മലപ്പുറം: മുസ്ലിംലീഗിന്റെ തട്ടകമായിരുന്ന താനൂര് നിയമസഭാ മണ്ഡലത്തില്നിന്നും എല്.ഡി.എഫ് സ്വതന്ത്ര്യസ്ഥാനാര്ഥിയായി കഴിഞ്ഞ തവണ വിജയിച്ചുകയറിയ വി. അബ്ദുറഹിമാന് എം.എല്.എ കുഞ്ഞാലിക്കുട്ടിക്കെഴുതിയ തുറന്ന കത്ത് സോഷ്യല് മീഡിയയില് വൈറലാകുന്നു.
റോഹിങ്ക്യന് വിഷയം മുസ്ലിംലീഗ് കേവലം സമുദായ വിഷയം മാത്രമായി ചുരുക്കുകയാണെന്നും ഇതിന്റെ ഭാഗമാണ് വെള്ളിയാഴ്ച മുസ്ലിം പള്ളികളില് പണപ്പിരിവ് നടത്തുമെന്ന പാര്ട്ടി തീരുമാനമെന്നും വി. അബ്ദുറഹിമാന് എം.എല്.എ തന്റെ ഫേസ്ബുക്ക്പേജില് കുഞ്ഞാലിക്കുട്ടിക്കെഴുതിയ തുറന്ന കത്തിലൂടെ പറയുന്നു. മതേതര മുഖമുള്ള പാര്ട്ടിയെന്ന് ആണയിടുന്ന താങ്കളുടെ പ്രസ്ഥാനം എന്തുകൊണ്ട് ജാതിയുംമതവും നോക്കാതെ ഈ വിഷയത്തില് പണപ്പിരിവിന് മുതിരുന്നില്ല, റോഹിങ്ക്യന് അഭയാര്ഥികള് മുസ്ലിമുകള് ആയതിനാല് മുസ്ലിമുകള് മാത്രം സഹായിച്ചാല് മതിയെന്നാണോ, അതോ മറ്റ് മതസ്ഥര്ക്ക് സഹായിക്കില്ലെന്ന് കരുതിയാണോയെന്ന് വി.അബ്ദുറഹിമാന് കത്തിലൂടെ കുഞ്ഞാലിക്കുട്ടിയോട് ചോദിക്കുന്നു.
കത്തിന്റെ പൂര്ണരൂപം താഴെ:
ഇന്ത്യന് മണ്ണില് അഭയാര്ഥികളായി ജീവിക്കുന്ന റോഹിങ്ക്യന് മുസ്ലിമുകളോട് താങ്കളുടെ പാര്ട്ടി കാണിക്കുന്ന സഹാനുഭൂതിയെ സ്വാഗതം ചെയ്യുന്നു. ലോകം മുഴുവന് റോഹിങ്ക്യകളുടെ കണ്ണീരിനൊപ്പം സഞ്ചരിക്കുന്ന കാലഘട്ടമാണല്ലോ ഇത്. ഈ കണ്ണീര് ഇന്ത്യയിലെ ഫാസിസ്റ്റ് ശക്തികളൊഴികെ ബാക്കിയെല്ലാവരെയും വേദനപ്പിക്കുന്നുണ്ടെന്നത് സത്യമാണ്. ആ വേദനയില് അവര്ക്ക് ആശ്വാസമേകാന് ഇന്ത്യയിലെ മതേതര ജനാധിപത്യ വിശ്വാസികള് ഒന്നടങ്കം പ്രാര്ഥിക്കുന്നുണ്ട്.
പക്ഷേ ഈ കൂട്ടത്തിലാരും റോഹിങ്ക്യന് അഭയാര്ഥികളുടെ മതം നോക്കി സഹാനുഭൂതി പ്രകടിപ്പിക്കാന് വന്നവരല്ല. അവരനുഭവിക്കുന്ന വേദനയും, ദുരന്തവും മനസിലാക്കി ഉള്ളില് വേദന നിറഞ്ഞ് അവര്ക്ക് പിന്തുണയുമായി എത്തിയവരാണ്. രാജ്യത്തെ പരമോന്നത കോടതിയും, ഹിന്ദുവും, മുസ്ലിമും, കൃസ്ത്യാനിയും അടക്കമുള്ള ജനവിഭാഗങ്ങളും, വിവിധ സംഘടനകളും, രാഷ്ട്രീയ പാര്ട്ടിയുമെല്ലാം അവരുടെ മതമല്ല നോക്കിയത്. അവരനുഭവിച്ച യാതനകളാണ് കണ്ടത്. അതാണ് റോഹിങ്ക്യകള്ക്ക് വേണ്ടി ശബ്ദമുയര്ത്താനും, അവരുടെ ആശ്വാസത്തിന് തങ്ങളാല് കഴിയുന്നത് ചെയ്യാനും അവരെ പ്രേരിപ്പിച്ചത്.
പക്ഷേ ഇവിടെ താങ്കള് പ്രതിനിധാനം ചെയ്യുന്ന പ്രസ്ഥാനം റോഹിങ്ക്യന് വിഷയം കേവലം സമുദായ വിഷയം മാത്രമായി ചുരുക്കുകയാണ്. വെള്ളിയാഴ്ച മുസ്ലിം പള്ളികളില് പണപ്പിരിവ് നടത്തുമെന്ന് പറഞ്ഞ് റോഹിങ്ക്യന് വിഷയം കേവലം സാമുദായിക വിഷയം മാത്രമാക്കി നിങ്ങള് മാറ്റി. മതേതര മുഖമുള്ള പാര്ട്ടിയെന്ന് ആണയിടുന്ന താങ്കളുടെ പ്രസ്ഥാനം എന്തുകൊണ്ട് ജാതിയുംമതവും നോക്കാതെ ഈ വിഷയത്തില് പണപ്പിരിവിന് മുതിരുന്നില്ല? റോഹിങ്ക്യന് അഭയാര്ഥികള് മുസ്ലിമുകള് ആയതിനാല് മുസ്ലിമുകള് മാത്രം സഹായിച്ചാല് മതിയെന്നാണോ, അതോ മറ്റ് മതസ്ഥര്ക്ക് സഹായിക്കില്ലെന്ന് കരുതിയാണോ?
ഇവിടെ വിഷയം റോഹിങ്ക്യകളുടെ മതമല്ല. അവര്ക്ക് നിഷേധിക്കപ്പെടുന്ന മനുഷ്യാവകാശ ലംഘനമാണ്, അതിന് കൂട്ടു നില്ക്കുന്ന കേന്ദ്ര ഭരണകൂടമാണ്. അതിനെതിരെ രാജ്യത്തെ ജനാധിപത്യമതേതര ശക്തികളെല്ലാം ഒന്നിച്ച് ശബ്ദമയുര്ത്തുമ്പോള് ഇന്ത്യന് യൂണിയന് മുസ്ലിം ലീഗ് ഇതിനെ വെറുമൊരു സമുദായ പ്രശ്നം മാത്രമാക്കി ചുരുക്കുകയാണ്. ജനാധിപത്യമതേതര പാര്ട്ടിയെന്ന് അഭിപ്രായപ്പെടുന്ന മുസ്ലിം ലീഗിന്റെ ഭാഗത്തു നിന്നും എന്തുകൊണ്ടാണ് ഇങ്ങനെയൊരു വിഷയത്തെ സമുദായവല്ക്കരിക്കുന്നതെന്ന് അങ്ങ് വ്യക്തമാക്കണം.
വേങ്ങര തിരഞ്ഞെടുപ്പ് ഫലത്തോടെ മുസ്ലിം സമുദായത്തെ കൂടെ നിറുത്താന് തീവ്ര സമുദായ ചിന്താഗതിയിലേക്കുള്ള പാതയിലാണോ ലീഗെന്ന് പാര്ട്ടി നേതൃത്വം തുറന്നു പറയണം. ആരാധനാലയങ്ങളേയും, ആചാരങ്ങളേയും ചൂഷണം ചെയ്ത് മുസ്ലിം സമുദായത്തിലെ മതേതര വാദികളെ അടക്കം പ്രത്യേക ചട്ടക്കൂടുകള്ക്കകത്തേക്ക് കൊണ്ടുപോകാനുള്ള ശ്രമമാണ് ലീഗ് നടത്തുന്നത്. ഇങ്ങനെ മാത്രമേ തങ്ങളുടെ വോട്ട് ബാങ്ക് ഇവിടെ നിലനിറുത്താനാകൂ എന്ന് ലീഗ് വേങ്ങര ഉപതിരഞ്ഞെടുപ്പോടെ മനസിലാക്കിയിരിക്കുന്നു.
പൊതുസമൂഹം ഒന്നടങ്കം എതിര്ക്കുന്ന ഒരു വിഷയത്തില് തങ്ങളുടെ സമുദായത്തില് നിന്ന് മാത്രമായി പിരിവു നടത്തി റോഹിങ്ക്യകളെ സഹായിക്കാനുള്ള നീക്കം മുസ്ലിം സമുദായത്തെ മറ്റ് മതസ്ഥര് സംശയ ദൃഷ്ടിയോടെ കാണുന്ന സ്ഥിതി വിശേഷമുണ്ടാക്കും. ഇത്തരമൊരു നീക്കം നടത്തുക വഴി മുസ്ലിം ലീഗിന്റെ രാഷ്ട്രീയ ശുദ്ധി തന്നെ ചോദ്യം ചെയ്യപ്പെടുന്ന സ്ഥിതിയാണ് സംജാതമായിരിക്കുന്നത്. രാജ്യം ഒറ്റക്കെട്ടായി നേരിടുന്ന വിഷയങ്ങളില് കുറച്ചു കൂടി വിശാലമായ സമീപനം ഭാവിയിലെങ്കിലും താങ്കളുടെ പാര്ട്ടിയുടെ ഭാഗത്തു നിന്നുണ്ടാകുമെന്ന പ്രതീക്ഷയോടെ നിറുത്തട്ടെ.
