ചെന്നൈ: ഭാര്യയുമായി ചേര്ന്ന് നടത്തിയ ഹൈടെക്ക് കോപ്പിയടിക്ക് പിടിയിലായ മലയാളി ഐപിഎസുകാരന് സഫീര് കരീമിന് കഴിഞ്ഞ പരീക്ഷയില് ഏറ്റവും കൂടുതല് മാര്ക്ക് കിട്ടിയത് ധാര്മ്മികബോധവും സത്യസന്ധതയും ഉള്പ്പെട്ട വിഷയത്തില്. ഈ വിഷയങ്ങള് വരുന്ന ജനറല് സ്റ്റഡീസില് 250 ല് 108 മാര്ക്ക് നേടി അന്നത്തെ ഏറ്റവും മികച്ച മാര്ക്കു വാങ്ങിയായിരുന്നു സഫീര്കരീം വിജയിച്ചതെന്നാണ് വിവരം. ഇപ്പോള് ഇയാളുടെ കഴിഞ്ഞ പരീക്ഷകളും സംശയത്തിന്റെ നിഴലിലായിരിക്കുകയാണ്.
2014 ല് 112ാം റാങ്ക് നേടിയ സഫീര് കരീം എഴുത്തുപരീക്ഷയില് 1750 ല് 772 മാര്ക്ക് വാങ്ങിയപ്പോള് അഭിമുഖത്തിന് 275 ല് 178 മാര്ക്കും നേടി മൊത്തം 950 മാര്ക്കോടെയാണ് കയറിയത്. മൂന്നാമത്തെ ശ്രമത്തിലാണ് വിജയിച്ചത്. ഇലക്ട്രോണിക്സ് എഞ്ചിനീയറിംഗ് ബിരുദം നേടിയ ഇയാള് ക്യാറ്റ് പരീക്ഷയില് മികച്ച വിജയം കുറിച്ചിരുന്നു. തുടര്ന്നാണ് സിവില് സര്വീസ് പരീക്ഷ ലക്ഷ്യമിട്ട് ഡല്ഹിയിലെത്തി വിജയം നേടിയത്. റാങ്ക് മെച്ചപ്പെടുത്തി ഐഎഎസിന് ശ്രമിക്കുമ്പോഴാണ് കോപ്പിയടിച്ച് പിടിയിലായത്.
തിങ്കളാഴ്ചയാണ് സഫീര് അറസ്റ്റിലായത്. പ്രൊബേഷന് പൂര്ത്തിയാക്കിയിട്ടില്ലാത്ത സര്വീസില് നിന്നും നീക്കുന്നതിന് നടപടിയെടുക്കുമെന്നാണ് വിവരം. പ്രാഥമിക പരീക്ഷയിലും ഇയാള് കൃത്രിമം കാട്ടിയിട്ടുണ്ടോയെന്ന് സംശയമുണ്ട്. ഹൈദരാബാദില് നിന്നും പിടിച്ചെടുത്ത ഇയാളുടെ ലാപ്ടോപ്പില് നിന്നും ഐഎസ്ആര്ഒ നിയമന പരീക്ഷ, കേരളാ പിഎസ് സി പരീക്ഷ എന്നിവയുടെ ചോദ്യക്കടലാസുകളും കണ്ടെത്തിയിട്ടുണ്ട്. ഇയാളുടെയും സുഹൃത്ത് രാമബാബുവിന്റെയും നേതൃത്വത്തില് നടക്കുന്ന സിവില് സര്വീസ് പരിശീലന കേന്ദ്രം പരീക്ഷാ തട്ടിപ്പുകള് നടത്തിയിരുന്നോയെന്നും പോലീസ് സംശയിക്കുന്നു. രാമബാബുവിനെയും റിമാന്റ് ചെയ്തിരിക്കുകയാണ്.
