ഷാര്ജ: ബി.ജെ.പി പിടിച്ചെടുക്കാന് ശ്രമിക്കുന്ന അവസാന കോട്ടയാണ് കേരളമെന്ന് പ്രമുഖ മാധ്യമപ്രവര്ത്തകന് രാജ്ദീപ് സര്ദേശായി. എന്നാല് കേരള സമൂഹം അതിനെ ധീരമായി നേരിടുകയാണെന്നും അദ്ദേഹം പറഞ്ഞു. ഷാര്ജ അന്താരാഷ്ട്ര പുസ്തകോത്സവത്തില് സംസാരിക്കുകയായിരുന്നു സര്ദേശായി. സ്വതന്ത്രമായ മാധ്യമപ്രവര്ത്തനത്തിന് വിഘാതം സൃഷ്ടിക്കുന്ന രാഷ്ട്രീയക്കാരെയും കോര്പ്പറേറ്റുകളേയും ബഹിഷ്കരിക്കുന്ന രീതി മാധ്യമങ്ങള് സ്വീകരിക്കണമെന്നും രാജ്ദീപ് സര്ദേശായി പറഞ്ഞു.
ഇന്ത്യന് ടെലിവിഷന് ചാനലുകള് മസാലക്കൂട്ടുകള്ക്ക് പിന്നാലെ പായുകയാണിപ്പോള്. അന്വേഷാത്മക മാധ്യമപ്രവര്ത്തനം പോലും ചിലരുടെ താല്പ്പര്യങ്ങള്ക്ക് വേണ്ടി വിലപേശുന്നതിന് ഉപയോഗിക്കുന്ന മാധ്യമരീതിയാണ് ഇപ്പോഴുള്ളത്. ചെറു തസ്തികളിലുള്ളവരുടെ അഴിമതി കൊട്ടിഘോഷിക്കുന്നവര് തലപ്പത്തുള്ള അഴിമതി മൂടിവയ്ക്കുകയാണെന്നും അദ്ദേഹം പറഞ്ഞു. അമിത് ഷായുടെ മകനെതിരായ അഴിമതി വാര്ത്തകള് മുഖ്യധാരാ മാധ്യമങ്ങള് മറച്ചുവച്ചത് ഇതിന്റെ ഉദാഹരണമാണെന്നും സര്ദേശായി പറഞ്ഞു.
മാധ്യമസ്ഥാപനങ്ങള് കോര്പ്പറേറ്റുകളുമായി ചേര്ന്ന് സ്പോണ്സേര്ഡ് വാര്ത്ത നല്കാന് മത്സരിക്കുന്ന കാലമാണിത്. അധാര്മിക മാധ്യമപ്രവര്ത്തനം നടത്തുന്ന ചാനലുകളുടെ മേധാവികള് തന്നെ പാര്ലമെന്റില് കയറിയിരുന്ന് ധാര്മ്മികത പ്രസംഗിക്കുന്നതും കാണേണ്ടി വരുന്നുവെന്ന് അദ്ദേഹം പറഞ്ഞു. നിലവിലെ രാഷ്ട്രീയ സാഹചര്യത്തില് 2019 ലോക്സഭാ തെരഞ്ഞെടുപ്പില് ബി.ജെ.പി തന്നെ വലിയ ഒറ്റക്കക്ഷിയാകാനാണ് സാധ്യത. മികച്ച മുന്നണി കൂട്ടുകെട്ടുകള് ഉണ്ടായാല് മോഡിയുടെ ഭരണതുടര്ച്ച അസാധ്യമാകുമെന്നും അദ്ദേഹം പറഞ്ഞു.
രാജ്ദീപ് സര്ദേശായി എഴുതിയ ഡെമോക്രസി ഇലവന്, സാഗരിക ഘോഷ് രചിച്ച ഇന്ത്യാസ് മോസ്റ്റ് പവര്ഫുള് പ്രൈംമിനിസ്റ്റര് എന്നീ പുസ്തകങ്ങള് ഷാര്ജ പുസ്തകമേളയില് പ്രകാശനം ചെയ്തു.
