ന്യൂഡല്ഹി: യാത്രികനെ മര്ദ്ദിച്ച് അവശനാക്കി നിലത്തിടുന്ന എയര്ലൈന്സ് ജീവനക്കാരന്റെ വീഡിയോ വൈറലാകുന്നു. ഇന്ഡിഗോ എയര്ലൈന്സ് ജീവനക്കാരനാണ് വിമാനയാത്രികനെ മര്ദ്ദിച്ച് അവശനാക്കിയത്. ഡല്ഹി വിമാനത്താവളത്തിലായിരുന്നു സംഭവം.
ചെന്നൈയില് നിന്ന് ഡല്ഹി വിമാനത്താവളത്തില് എത്തിയ ഇന്ഡിഗോ എയര്ലൈന്സില് നിന്നൂം പുറത്തിറങ്ങി ടെര്മിനലില് ബസിനായി കാത്തു നില്ക്കുകയായിരുന്ന സമയത്താണ് സംഭവം നടന്നതെന്ന് രാജീവ് കറ്റിയാല് പറയുന്നു. ബസില് കയറാനായി നീങ്ങവേ ജീവനക്കാരനോട് അല്പം കയര്ത്തു യാത്രികന് സംസാരിക്കുന്നത് കാണാം. തൊട്ടു പിന്നാലെ ബസില് കയറ്റാതെ തടഞ്ഞ് ക്രൂരമായി മര്ദ്ദിക്കുകയായിരുന്നു. ജീവനക്കാരന് വളരെ മോശമായി തന്നോട് പെരുമാറിയതുകൊണ്ടാണ് തിരിച്ച് കയര്ത്തു സംസാരിച്ചതെന്ന് യാത്രികന് പറയുന്നു.
മര്ദ്ദനത്തിനിടെ നിലത്തു വീണ യാത്രികനെ എഴുന്നേല്പ്പിക്കാതെ നിലത്തിട്ടും മര്ദ്ദിക്കുന്നതായി കാണാം. മറ്റൊരു ജീവനക്കാരനും കൂടെ നില്ക്കുന്നുണ്ട്. വീഡിയോയില് കാണുന്ന ജൂബി തോമസ്, ശിവ് ശര്മ്മ എന്നീ ജീവനക്കാര്ക്ക് വാണിങ്ങ് കത്ത് നല്കി. സ്വയരക്ഷയ്ക്കായി യാത്രികനെ മര്ദ്ദിച്ചത് എന്നാണ് ഇന്ഡിഗോ കമ്പനി നല്കിയ വിശദീകരണം.
