തിരുവനന്തപുരം: മാസപ്പടി കേസിൽ പിണറായിയുടെ വീട്ടിൽ സമൻസ് പതിച്ചത് അന്യായമാണെന്നും പിടികിട്ടാപ്പുള്ളിയോടെന്ന പോലെയുള്ള പെരുമാറ്റമാണിതെന്നും സിപിഎം നേതാവും മുൻ മന്ത്രിയുമായ വി ശിവൻകുട്ടി. ഇ ഡി ഉദ്യോഗസ്ഥർ സമൻസുമായി എത്തിയപ്പോൾ പ്രതിപക്ഷ നേതാവ് കണ്ണൂരിലായിരുന്നു. അദ്ദേഹത്തിന്റെ സ്റ്റാഫ് സമൻസ് കൈപ്പറ്റാൻ വിസമ്മതിച്ചതിനെ തുടർന്നായിരുന്നു ഭിത്തിയിൽ പതിപ്പിച്ചത്.
എന്നാൽ, സുപ്രീംകോടതി കേസ് പരിഗണിക്കുന്നതിനു മുമ്പേ ഇഡി അനാവശ്യ ധൃതി കാണിക്കുകയാണെന്ന് ശിവൻകുട്ടി കുറ്റപ്പെടുത്തി. പിണറായിയോ മകളോ ഭാര്യയോ വീട്ടിലില്ലാത്ത സമയത്താണ് ഇ ഡി ഇങ്ങനെ ചെയ്തത്. സമൻസ് കൈപ്പറ്റാൻ സ്റ്റാഫിനെ നിർബന്ധിച്ചു. പിടികിട്ടാപ്പുള്ളിയോടെന്ന പോലെയാണ് ഇ ഡിയുടെ നീക്കങ്ങളെന്നും ശിവൻകുട്ടി കുറ്റപ്പെടുത്തി. പിണറായിയുടെ ബേക്കറി ജംഗ്ഷനിലുള്ള വീട്ടിലാണ് ഇ ഡി ഉദ്യോഗസ്ഥർ സമൻസ് പതിച്ചത്.
അതേസമയം, സമൻസ് തപാലിൽ അയച്ചാൽ കൈപ്പറ്റാതിരിക്കാനുള്ള സാധ്യതയുള്ളതിനാലാണ് ഇ ഡി ഉദ്യോഗസ്ഥർ നേരിട്ടെത്തി സമൻസ് പതിപ്പിച്ചത്. ഒക്ടോബർ 23-ന് ചോദ്യം ചെയ്യലിന് കൊച്ചിയിലെ ഓഫീസിൽ ഹാജരാകാനാണ് സമൻസ്. എന്നാൽ, നിയമസഭാ സമ്മേളനം നടക്കുന്നതിനാൽ ഹാജരാവാൻ സാധിക്കില്ല എന്ന് മറുപടി നൽകാനാവും സാധ്യത.
Comments