ന്യൂഡല്ഹി: കായല്കയ്യേറ്റ വിവാദത്തില് രാജി ആവശ്യപ്പെട്ട് ശക്തമായ കോണ്ഗ്രസ് പ്രതിഷേധം തുടരുന്നതിനിടയില് വിവാദനായകന് തോമസ് ചാണ്ടിക്കു വേണ്ടി കോണ്ഗ്രസ് എംപിയും സുപ്രീംകോടതി അഭിഭാഷകനുമായ വിവേക് തന്ഖ കോടതിയില് ഹാജരായി. കോണ്ഗ്രസിന്റെ കേരള നേതാക്കളുടെ എതിര്പ്പിനെ അവഗണിച്ചാണ് തന്ഖ കോടതിയില് എത്തിയത്. തോമസ്ചാണ്ടിക്കു ഹാജരാകരുതെന്ന് കെപിസിസി അദ്ധ്യക്ഷന് എംഎം ഹസന്റെ നിര്ദേശം തന്ഖ തള്ളിക്കൊണ്ടായിരുന്നു അദ്ദേഹം കോടതിയില് എത്തിയത്.
ചാണ്ടിക്ക് വേണ്ടി ഹാജരാകരുതെന്ന നേരത്തേ ടെലിഫോണിലൂടെയാണ് കെപിസിസി അദ്ധ്യക്ഷന് എംഎം ഹസന് അഭ്യര്ത്ഥിച്ചിരുന്നു. കോണ്ഗ്രസ് പ്രതിഷേധം ശക്തമാകുന്ന സാഹചര്യത്തില് വിട്ടു നില്ക്കാനായിരുന്നു ആവശ്യം. എന്നാല് താന് കോണ്ഗ്രസ് നേതാവായിട്ടല്ല കോടതിയില് എത്തുന്നത് എന്നും തോമസ് ചാണ്ടിയുടെ സുഹൃത്ത് എന്ന നിലയിലാണെന്നുമായിരുന്നു ട്വിറ്ററിലൂടെ അദ്ദേഹത്തിന്റെ മറുപടി. തോമസ്ചാണ്ടിക്കെതിരേ നാലു ഹര്ജികളാണ് കോടതിയില് ഉള്ളത്. അതേസമയം തോമസ്ചാണ്ടിക്കായി കോടതിയില് തന്ഖ എത്തുന്ന വിവരം കെപിസിസി നേതാക്കള് ഹൈക്കമാന്റിനെയും അറിയിച്ചിട്ടുണ്ട്.
കേരളത്തിലെ നേതാക്കളുടെ ആവശ്യം തള്ളിയ തന്ഖയ്ക്ക് എതിരേ യൂത്ത് കോണ്ഗ്രസും രംഗത്ത് വന്നിട്ടുണ്ട്. ഹോട്ടലില് നിന്നും കോടതിയിലേക്ക് പോകാന് ഇറങ്ങിയപ്പോള് തന്ഖയ്ക്കെതിരേ പ്രതിഷേധവുമായി യൂത്ത്കോണ്ഗ്രസ് പ്രവര്ത്തകര് എത്തിയിരുന്നു. കാറിന് മുകളിലേക്ക് ചാടിക്കയറുകയും കരിങ്കൊടി കാണിക്കുകയും ചെയ്ത പ്രതിഷേധക്കാരെ പോലീസ് അറസ്റ്റ് ചെയ്തു നീക്കുകയായിരുന്നു. അതിനിടയില് നിര്ണ്ണായക എന്സിപി യോഗം ഇന്ന് ഉച്ചയ്ക്ക് ചേരുന്നുണ്ട്. രാജിക്കാര്യം ചര്ച്ച ചെയ്യാനല്ല യോഗം ചേരുന്നതെന്നാണ് കേരള നേതാക്കള് വ്യക്തമാക്കിയിരിക്കുന്നത്.
