ന്യുഡല്ഹി: പദ്മാവതി സിനിമയ്ക്കെതിരെ പ്രതിഷേധിക്കുന്ന കര്ണി സേനയ്ക്കും സംഘപരിവാര് സംഘടനകള്ക്കുമെതിരെ ആഞ്ഞടിച്ച് ബോളിവുഡ് ഗാനരചയിതാവ് ജാവേദ് അക്തര്. രജപൂത്രന്മാര് ഒരിക്കലും ബ്രിട്ടുകാര്ക്കെതിരെ യുദ്ധം ചെയ്തിട്ടില്ലെന്ന് ജാവേദ് അക്തര് പറഞ്ഞു. ഇരുനൂറോളം വര്ഷം ബ്രിട്ടീഷുകാരുടെ പാദസേവ ചെയ്തവരാണ് അവര്. എന്നാല് ഇപ്പോള് ചിത്രത്തിന്റെ പേരില് തെരുവിലിറങ്ങി കൊലവിളി നടത്തുകയാണ് അവരെന്നും ജാവേദ് അക്തര് പറഞ്ഞു.
രാജസ്ഥാനിലെ രജപുത്ര രാജാക്കന്മാരും റാണിമാരും ബ്രിട്ടീഷുകാര്ക്ക് വേണ്ടി പണിയെടുത്തവരാണ്. ബ്രിട്ടീഷുകാരെ സേവിക്കുന്ന സമയത്ത് അവരുടെ അഭിമാനവും അന്തസും എവിടെയായിരുന്നെന്നും ജാവേദ് അക്തര് ചോദിച്ചു. ബ്രിട്ടീഷുകാരെ സേവിക്കാന് അവര് തയ്യാറായത് മുതല്, അവര് എന്താണാ ആവേണ്ടത് അത് തന്നെയാണ് ആയിട്ടുള്ളതെന്നും അദ്ദേഹം കൂട്ടിച്ചേര്ത്തു.
അതേസമയം ജാവേദ് അക്തറിന്റെ പ്രസ്താവനയ്ക്കെതിരെ രജപുത്രരുടെ കര്ണി സേന രംഗത്ത് വന്നു. അക്തര് രാജസ്ഥാനില് പ്രവേശിക്കുന്നത് തടയുമെന്നും രാജസ്ഥാനില് പ്രവേശിക്കാന് ശ്രമിച്ചാല് തെരുവിലിട്ട് അടിക്കുമെന്നും കര്ണിസേന സംസ്ഥാന പ്രസിഡന്റ് മഹിപാല് സിംഗ് പറഞ്ഞു. ഇനി പ്രഭാഷണത്തിനായി പോലും രാജസ്ഥാനില് കാലുകുത്താന് അക്തറിനെ അനുവദിക്കില്ലെന്നും കര്ണി സേന വ്യക്തമാക്കി.
