ന്യൂഡല്ഹി: ശ്രീലങ്കയ്ക്കെതിരായ മൂന്നാം ടെസ്റ്റില് വിരാട് കോഹ്ലിക്ക് ഇരട്ട സെഞ്ചുറി. പരമ്പരയില് കോഹ്ലി നേടുന്ന രണ്ടാം ഇരട്ട സെഞ്ചുറിയാണിത്. ഒരു ദിവസം മുന്നേ മൂന്ന് മത്സരങ്ങളില് നിന്ന് ഹാട്രിക് സെഞ്ചുറി കുറിച്ചതിനു പിന്നാലെയാണ് ആറാം ഡബിള് സെഞ്ചുറി തന്റെ പേരില് കുറിച്ചത്. ഏകദിന ശൈലിയില് ബാറ്റ് വീശിയ കോഹ്ലി 238 പന്തില്നിന്നാണ് ഡബിള് നേട്ടത്തിലെത്തിയത്. ടെസ്റ്റില് കോഹ്ലി നേടുന്ന ആറാം ഇരട്ട സെഞ്ചുറിയാണ്.
കോഹ്ലിയുടെ ആറാം ഡബിള് സെഞ്ചുറിയോടെ വിന്ഡീസ് ഇതിഹാസം ബ്രയാന് ലാറയുടെ ടെസ്റ്റ് കരിയറിലെ അഞ്ച് ഡബിള് സെഞ്ചുറികള് കോഹ്ലി മറികടന്നു. ഇതോടെ കോഹ്ലി സച്ചിന് തെണ്ടൂല്ക്കറുടെ ആറ് ടെസ്റ്റ് ഡബിള് സെഞ്ചുറികള്ക്കൊപ്പമെത്തി. വീരേന്ദ്രര് സെവാഗിനു നാലു ഡബിള് സെഞ്ചുറികളും, രണ്ട് ട്രിപ്പിള് സെഞ്ചുറികളുമുണ്ട്.
കോഹ്ലിയുടെ മികവില് ഇന്ത്യ കൂറ്റന് സ്കോറിലേക്ക് നീങ്ങുകയാണ്. 109 ഓവറില് നാല് വിക്കറ്റ് നഷ്ടത്തില് 500 റണ്സെടുത്തിട്ടുണ്ട്. കോഹ്ലിക്കൊപ്പം 41 റണ്സുമായി രോഹിത് ശര്മയാണ് ക്രീസിലുള്ളത്. 23 റണ്സ് വീതമെടുത്ത ശിഖര് ധവാന്റെയും ചേതേശ്വര് പൂജാരയുടെയും 155 നേടിയ മുരളി വിജയുടെയും ഒരു റണ്സെടുത്ത അജിങ്ക്യ രഹാനയുടെയും വിക്കറ്റുകളാണ് ശനിയാഴ്ച ഇന്ത്യക്കു നഷ്ടപ്പെട്ടത്.
സെഞ്ചുറി നേടിയ കോഹ്ലി ടെസ്റ്റില് 5000 റണ്സ് നേട്ടവും പിന്നിട്ടിരുന്നു. അതിവേഗം അയ്യായിരം റണ്സ് പിന്നിടുന്ന ഇന്ത്യന് താരങ്ങളില് നാലാം സ്ഥാനമാണ് കോഹ്ലിക്ക്. 105 ഇന്നിംഗ്സില്നിന്നാണ് അദ്ദേഹത്തിന്റെ നേട്ടം.
