തിരുവനന്തപുരം: സംസ്ഥാനത്തെ വിദ്യാർത്ഥി ബസ് കൺസെഷൻ മാനദണ്ഡങ്ങളിൽ മാറ്റം വരുത്തി മോട്ടോർ വാഹന വകുപ്പ്. വിദ്യാർത്ഥികൾക്ക് കൺസെഷൻ ലഭിക്കുന്നതിനുള്ള പ്രായപരിധി 24 വയസ്സിൽ നിന്ന് 27 വയസ്സായി ഉയർത്തി. ഇതോടൊപ്പം കൺസെഷൻ നിരക്കിൽ യാത്ര ചെയ്യാവുന്ന ദൂരപരിധി 40 കിലോമീറ്ററായും വർധിപ്പിച്ചു.
സ്വകാര്യ ബസുകളിൽ വിദ്യാർത്ഥി കൺസെഷനെ ചൊല്ലിയുള്ള തർക്കങ്ങൾ പതിവായ സാഹചര്യത്തിലാണ് പുതിയ പരിഷ്കാരങ്ങൾ നടപ്പാക്കുന്നത്. ഇനി മുതൽ രാവിലെ 6 മണി മുതൽ വൈകിട്ട് 7 മണി വരെയാണ് വിദ്യാർത്ഥികൾക്ക് കൺസെഷൻ നിരക്കിൽ യാത്ര ചെയ്യാൻ അനുമതി.
സർക്കാർ അംഗീകൃത വിദ്യാഭ്യാസ സ്ഥാപനങ്ങളിൽ പഠിക്കുന്ന മുഴുവൻ സമയ വിദ്യാർത്ഥികൾക്ക് മാത്രമായിരിക്കും കൺസെഷൻ ആനുകൂല്യം ലഭിക്കുക. ക്രാഷ് കോഴ്സുകൾ, പാർട്ട് ടൈം കോഴ്സുകൾ എന്നിവ പഠിക്കുന്നവർക്ക് ഈ സൗകര്യം ലഭിക്കില്ലെന്ന് എംവിഡി വ്യക്തമാക്കി.
കൺസെഷൻ വിതരണത്തിലെ സുതാര്യത ഉറപ്പാക്കുന്നതിനായി അപേക്ഷാ നടപടികൾ ഇനി പൂർണമായും ഓൺലൈനാക്കും. 'MVD Leads' മൊബൈൽ ആപ്പ് വഴിയാണ് വിദ്യാർത്ഥികൾ കൺസെഷന് അപേക്ഷിക്കേണ്ടത്.
ആദ്യഘട്ടത്തിൽ വിദ്യാഭ്യാസ സ്ഥാപനങ്ങൾ ആപ്പിൽ രജിസ്റ്റർ ചെയ്യണം. മോട്ടോർ വാഹന വകുപ്പ് പരിശോധന നടത്തി അംഗീകാരം നൽകിയതിന് ശേഷമേ സ്ഥാപനങ്ങൾക്ക് അപേക്ഷാ നടപടികളിൽ പങ്കെടുക്കാനാകൂ. വിദ്യാർത്ഥികൾ സമർപ്പിക്കുന്ന അപേക്ഷ സ്ഥാപനത്തിന് ആപ്പ് വഴി ലഭിക്കുകയും, അപേക്ഷകൻ അതത് സ്ഥാപനത്തിലെ വിദ്യാർത്ഥിയാണെന്ന് ഉറപ്പാക്കിയ ശേഷമായിരിക്കും കൺസെഷൻ അനുവദിക്കുക.
