ന്യൂഡല്ഹി: ഭീകരതയ്ക്ക് വളം വെയ്ക്കുന്ന പാകിസ്താന് തീവ്രവാദത്തിനെതിരേ വേണ്ടി വിധത്തില് പ്രതികരിച്ചില്ലെങ്കില് ഇല്ലായ്മ ചെയ്യാന് തങ്ങള്ക്ക് ഇടപെടേണ്ടി വരുമെന്ന് അമേരിക്കന് രഹസ്യാന്വേഷണ വിഭാഗം തലവന്. അതേസമയം അമേരിക്കന് രഹസ്യാന്വേഷണ വിഭാഗത്തെയാണോ അമേരിക്കന് സൈന്യത്തെയാണോ മൈക്ക പോംപിയോ ലക്ഷ്യം വെച്ചതെന്നു വ്യക്തമാക്കിയില്ല.
അമേരിക്കന് പ്രതിരോധ സെക്രട്ടറി ജയിംസ് മാറ്റിസിന്റെ പാകിസ്താന് സന്ദര്ശനത്തിന് രണ്ടു ദിവസം മുമ്പാണ് രഹസ്യാന്വേഷണ വിഭാഗം തലവന്റെ മുന്നറിയിപ്പ്. ഇക്കാര്യം മാറ്റിസ് സന്ദര്ശനത്തിന്റെ ആദ്യം തന്നെ സൂചിപ്പിക്കുമെന്നും പോംപിയോ പറഞ്ഞു. ഡൊണാള്ഡ് ട്രംപിന്റെ സന്ദേശമായി പാകിസ്താന് സന്ദര്ശനത്തില് ആദ്യം തന്നെ ഈ സന്ദേശം പ്രതിരോധ സെക്രട്ടറി പാകിസ്താന് കൈമാറും. തീവ്രവാദത്തെ ഇല്ലായ്മ ചെയ്യാനുള്ള പ്രവര്ത്തനങ്ങള് പാകിസ്താന് കഴിയില്ലെങ്കില് തങ്ങള് അത് ചെയ്യും. സുരക്ഷിതതാവളത്തില് കൂടുതല് വാഴാന് അനുവദിക്കാതിരിക്കുന്നതിന് ആവശ്യമായ എല്ലാം ചെയ്യുമെന്ന് പോംപിയോ പറഞ്ഞു.
ഇസ്്ളാമാബാദ് എത്തിയിരിക്കുന്ന മാറ്റിസ് പാകിസ്താനിലെ ഉന്നത സൈനിക നേതാക്കന്മാരും സര്ക്കാരിലെ നേതാക്കന്മാരുമായും അഫ്ഗാനിസ്ഥാനുമായുള്ള അനുരഞ്ജന വിഷയം ചര്ച്ച ചെയ്യും. അമേരിക്കന് സൈന്യത്തിനും അഫ്ഗാന് ജനതയ്ക്കും എതിരേ നീങ്ങുന്ന അഫ്ഗാന് താലിബാന് നേതാക്കളായ ഹക്കാനി ഉള്പ്പെടെയുള്ള നേതാക്കളെ മറയ്ക്കുന്നത് പാകിസ്താനാണെന്നാണ് അമേരിക്കയുടെ ദീര്ഘനാളായുള്ള ആരോപണം. അമേരിക്കക്കാരെ കൊന്നൊടുക്കാന് ശ്രമിക്കുന്ന തീവ്രവാദി ഗ്രൂപ്പുകള്ക്ക് പാകിസ്താന് സുരക്ഷിത താവളമാണെന്നും അടിയന്തിര നടപടികള് എടുത്തില്ലെങ്കില് സഹായം നിര്ത്തലാക്കുമെന്ന് ട്രംപ് ആരോപിച്ചിരുന്നു.
പാകിസ്താന് ബില്യണ് കണക്കിന് ഡോളറുകള് നല്കിക്കൊണ്ടിരിക്കുന്ന അതേ സമയത്ത് തന്നെ അവര് ആശ്രയം നല്കുന്ന തീവ്രവാദികളോട് പോരാടേണ്ട സ്ഥിതിയും വരന്നു. എന്നാല് അതിന് മാറ്റം വന്നില്ലെങ്കില് പല കാര്യങ്ങളും മാറുമെന്ന് ട്രംപ് ആഗസ്റ്റ് 21 ന് നടത്തിയ പ്രസംഗത്തിലാണ് വ്യക്തമാക്കിയത്. പാകിസ്താനിലെയും അഫ്ഗാനിസ്ഥാനിലെയും ജനങ്ങള്ക്കായി പാകിസ്താന് ഇതുവരെ ഒന്നും ചെയ്തില്ലെന്ന് ട്രംപ് ഭരണകൂടത്തിലെ ഉന്നതരും പറഞ്ഞു.
