ന്യൂഡല്ഹി : തെരഞ്ഞെടുപ്പ് കമ്മിഷനെ വിമര്ശിച്ച് എഴുത്തുകാരന് എന്.എസ് മാധവന് രംഗത്ത്. മനസില് കരുതിയ സ്ഥാനാര്ത്ഥിക്കല്ല വോട്ട് ചെയ്തതെന്ന് കണ്ടാല് വോട്ടര്ക്ക് പരാതിപ്പെടാന് അവകാശമുണ്ട്. എന്നാല്, വോട്ടിങ് മെഷീനെതിരെ പരാതി ഉന്നയിച്ചാല് ജയിലില് പോകേണ്ടി വരുമെന്ന് പറഞ്ഞ് പേടിപ്പിക്കുമെന്ന് മാത്രമല്ല ഇത്തരം പരാതികളെ ഒരിക്കലും പ്രോത്സാഹിപ്പിക്കാറുമില്ല. ട്വിറ്ററിലൂടെയാണ് എന്എസ് മാധവന് ഇക്കാര്യം വ്യക്തമാക്കിയത്.
വോട്ട് ചെയ്ത ശേഷം മെഷീനില് നോക്കുമ്പോള് മറ്റൊരു സ്ഥാനാര്ത്ഥിക്കാണ് വോട്ടു വീണതെന്ന് കണ്ടാല് സ്വാഭാവികമായും പരാതിപ്പെടാം. എന്നാല്, ഇങ്ങനെ പരാതിപ്പെടുന്നതിന് ചില നൂലാമാലകളൊക്കെയുണ്ട്. ഇതിനിടെ, പരാതിക്കാരനെ തെരഞ്ഞെടുപ്പ് കമ്മിഷന് പലതും പറഞ്ഞ് ഭയപ്പെടുത്തി പിന്മാറ്റാനുള്ള ശ്രമവും നടക്കുമെന്നും അദ്ദേഹം പറഞ്ഞു.
പരാതിക്കാരനോട് ആദ്യം പറയുന്നത് നിങ്ങളുടെ പരാതി തെറ്റാണെന്ന് തെളിഞ്ഞാല് ജയിലില് പോകേണ്ടി വരുമെന്നാണ്. ഇതോടെ സാധാരണക്കാരായ പരാതിക്കാര് പിന്മാറുകയാണ് പതിവ്. ഇതു വകവയ്ക്കാതെ മുന്നോട്ട് പോകുന്നവരോട് ഒരു ഫോമില് ഒപ്പിടാന് ആവശ്യപ്പെടും. ഫോമിലെ വ്യവസ്ഥകള് ഭയപ്പെടുത്തുന്നതാണെന്നും എന്.എസ് മാധവന് പറയുന്നു. ഇതോടെ ശേഷിക്കുന്ന ഒട്ടുമിക്കപ്പേര്കൂടി പിന്മാറും. ഇതുകൊണ്ടൊക്കെയാണ് വിവിപാറ്റ് മെഷീന് വന്നിടത്തൊക്കെ വോട്ടിങ് മെഷീനെതിരെ പരാതി ഉയരാത്തതെന്നും മാധവന് ട്വിറ്ററില് പറയുന്നു.
