വാഷിംഗ്ടണ്: എച്ച്1ബി വിസയില് ജോലി ചെയ്യുന്നവരുടെ ജീവിതപങ്കാളിക്കും യു.എസില് ജോലി ചെയ്യാന് അനുമതി നല്കുന്ന നിയമം നിര്ത്തലാക്കുന്നു. ബരാക് ഒബാമയുടെ ഭരണകാലത്ത് കൊണ്ടുവന്ന നിയമമാണ് ട്രംപ് ഭരണകൂടം നിര്ത്തലാക്കുന്നത്. എച്ച്1ബി വിസയില് ജോലി ചെയ്യുന്നവരുടെ ജീവിത പങ്കാളിക്ക് എച്ച്4 ആശ്രിത വിസയില് ജോലി ചെയ്യാന് ഒബാമ ഭരണകൂടം 2015ല് അനുമതി നല്കിയിരുന്നു. ഇത് നിര്ത്തലാക്കാനാണ് ട്രംപ് ഭരണകൂടത്തിന്റെ നീക്കം.
2018ല് നിയമം റദ്ദാക്കും. അമേരിക്കന് കമ്പനികളില് അമേരിക്കന് പൗരന്മാരെ തന്നെ നിയമിക്കുക എന്ന ട്രംപ് ഭരണകൂടത്തിന്റെ നയം അനുസരിച്ചാണ് പുതിയ നീക്കം. നിയമത്തില് മാറ്റം വരുമെന്ന് ഹോംലാന്ഡ് സെക്യുരിറ്റി ഡിപ്പാര്ട്ട്മെന്റ് സ്ഥിരീകരിച്ചു. എച്ച്1ബി. എല്1 വിസകള്ക്ക് ശമ്പളപരിധി ഇരട്ടിയിലേറെയായി ഉയര്ത്തുന്നതും തൊഴില് വിസയില് എത്തുന്നവരുടെ ജീവിതപങ്കാളികള്ക്ക് തൊഴില് കാര്ഡുകള് നല്കുന്നതും നേരത്തെ ട്രംപ് ഭരണകൂടം നിര്ത്തലാക്കിയിരുന്നു.
വിദേശ വിദ്യാര്ത്ഥികള്ക്ക് പഠനം പൂര്ത്തിയാക്കി കഴിഞ്ഞ് കൂടുതല് കാലം അമേരിക്കയില് ചെലവഴിക്കാന് അനുമതി നല്കുന്ന നിയമം നേരത്തെ ട്രംപ് സര്ക്കാര് റദ്ദാക്കിയിരുന്നു. ട്രംപ് ഭരണകൂടത്തിന്റെ പുതിയ നീക്കം മലയാളികളടക്കം ഇന്ത്യക്കാരെ ബാധിക്കുന്നതാണ്. എച്ച്1ബി വിസയിലൂടെ ഇന്ത്യയില് നിന്നും ചൈനയില് നിന്നും നിരവധി പേരാണ് അമേരിക്കയില് ജോലിക്ക് എത്തുന്നത്. കഴിഞ്ഞ വര്ഷം എച്ച്4 ആശ്രിത വിസയിലൂടെ 41,000 പേരും ഈ വര്ഷം ജൂണ് വരെ 36,000 പേരും യു.എസില് ജോലിക്ക് എത്തിയിരുന്നു.
