ന്യൂഡൽഹി: ഉസ്ബെക്കിസ്ഥാനിൽ മലയാളി മെഡിക്കൽ വിദ്യാർഥിനി സാവരിയ ബസന്ത് കൊല്ലപ്പെട്ട സംഭവത്തിൽ ദേശീയ വനിതാ കമ്മീഷൻ സ്വമേധയാ കേസെടുത്തു. സംഭവത്തിൽ ഏഴ് ദിവസത്തിനകം റിപ്പോർട്ട് സമർപ്പിക്കണമെന്ന് ആവശ്യപ്പെട്ട് കേരള ഡിജിപി റവാഡ ചന്ദ്രശേഖറിന് കമ്മീഷൻ കത്തയച്ചു.
ആക്രമണത്തിനും നിർബന്ധിത മതപരിവർത്തന ശ്രമത്തിനും ഇരയായെന്ന ആരോപണത്തിൽ ദേശീയ വനിതാ കമ്മീഷൻ ഗുരുതര ആശങ്ക രേഖപ്പെടുത്തി. സംഭവത്തിന്റെ എല്ലാ വശങ്ങളും പരിശോധിച്ച് വിശദമായ റിപ്പോർട്ട് നൽകാനാണ് നിർദേശം.
ജൂലൈ 3-നാണ് ഉസ്ബെക്കിസ്ഥാനിൽ പഠിച്ചിരുന്ന ആലപ്പുഴ സ്വദേശിനിയായ മെഡിക്കൽ വിദ്യാർഥിനി സാവരിയ ബസന്ത് കൊല്ലപ്പെട്ടത്. സഹപാഠിയായ സദറുൽ അനവ് ക്രൂരമായി മർദിച്ചതിനെ തുടർന്ന് ഗുരുതരമായി പരിക്കേറ്റ സാവരിയ ആശുപത്രിയിൽ ചികിത്സയിലിരിക്കെയാണ് മരിച്ചത്. സംഭവത്തിന് പിന്നാലെ പ്രതിയെ പ്രാദേശിക പൊലീസ് അറസ്റ്റ് ചെയ്തിരുന്നു. പ്രാഥമിക പോസ്റ്റ്മോർട്ടം റിപ്പോർട്ടിൽ തലയ്ക്കേറ്റ ഗുരുതര പരിക്കാണ് മരണകാരണമെന്ന് കണ്ടെത്തി.
പ്രതിക്കെതിരെ സാവരിയയുടെ ബന്ധുക്കൾ ഗുരുതര ആരോപണങ്ങളും ഉന്നയിച്ചിട്ടുണ്ട്. സാവരിയയെ മതം മാറാൻ പ്രതി നിരന്തരം നിർബന്ധിച്ചിരുന്നതായി സഹപാഠികൾ പറഞ്ഞതായി ബന്ധുക്കൾ ആരോപിച്ചു. മതപരിവർത്തനത്തിന് തയ്യാറാകാതിരുന്നതിന് പിന്നാലെയാണ് ആക്രമണമുണ്ടായതെന്നും അവർ പറഞ്ഞു. പ്രതിക്ക് മാതൃകാപരമായ ശിക്ഷ ഉറപ്പാക്കണമെന്നാവശ്യപ്പെട്ട് കേരള പൊലീസിൽ പരാതി നൽകിയതായും റീ-പോസ്റ്റ്മോർട്ടം ആവശ്യപ്പെട്ടതായും ബന്ധുക്കൾ അറിയിച്ചു.
സംഭവത്തിൽ ക്രൈംബ്രാഞ്ച് അന്വേഷണം പുരോഗമിക്കുകയാണ്. കഴിഞ്ഞ ദിവസം ആഭ്യന്തരമന്ത്രി രമേശ് ചെന്നിത്തല ഹരിപ്പാട്ടെ സാവരിയയുടെ വീട് സന്ദർശിച്ച് കുടുംബാംഗങ്ങളെ കണ്ടിരുന്നു. പ്രതിക്കെതിരെ ശക്തമായ നിയമനടപടി ഉറപ്പാക്കുമെന്ന് മന്ത്രി കുടുംബത്തിന് ഉറപ്പ് നൽകിയിരുന്നു.
