ആലപ്പുഴ: നെഹ്റു ട്രോഫി ജലമേളയിലെ സമ്മാനത്തുകയിൽ വൻ വർധനവ് പ്രഖ്യാപിച്ച് സംസ്ഥാന സർക്കാർ. ചുണ്ടൻ വള്ളങ്ങളുടെ മത്സരത്തിൽ ഒന്നാം സ്ഥാനം നേടുന്ന ടീമിനുള്ള സമ്മാനത്തുക 5 ലക്ഷത്തിൽ നിന്ന് 25 ലക്ഷം രൂപയായി ഉയർത്തി.
രണ്ടാം സ്ഥാനക്കാർക്ക് 20 ലക്ഷം രൂപയും മൂന്നാം സ്ഥാനക്കാർക്ക് 15 ലക്ഷം രൂപയും ഇനി മുതൽ ലഭിക്കും. കൂടാതെ നെഹ്റു ട്രോഫി വള്ളംകളിക്കായി സർക്കാർ അനുവദിക്കുന്ന ഗ്രാന്റ് 2 കോടി രൂപയായും വർധിപ്പിച്ചിട്ടുണ്ട്.
1952-ൽ ഇന്ത്യയുടെ ആദ്യ പ്രധാനമന്ത്രി ജവഹർലാൽ നെഹ്റുവിന്റെ ആലപ്പുഴ സന്ദർശനത്തോടെയാണ് നെഹ്റു ട്രോഫി വള്ളംകളിയുടെ ചരിത്രം ആരംഭിക്കുന്നത്. അദ്ദേഹത്തിന്റെ സന്ദർശനത്തിന്റെ ഭാഗമായി പുന്നമടക്കായലിൽ സംഘടിപ്പിച്ച വള്ളംകളിയിൽ നെഹ്റു നേരിട്ട് പങ്കെടുത്തിരുന്നു.
മത്സരത്തിന്റെ ആവേശത്തിൽ ആകൃഷ്ടനായ നെഹ്റു ഡൽഹിയിൽ തിരിച്ചെത്തിയ ശേഷം വെള്ളിയിൽ നിർമിച്ച ഒരു ട്രോഫി സമ്മാനമായി അയച്ചുനൽകി. പിന്നീട് ഈ ട്രോഫി 'നെഹ്റു ട്രോഫി' എന്ന പേരിൽ അറിയപ്പെടുകയും, കേരളത്തിന്റെ ഏറ്റവും പ്രശസ്തമായ ജലോത്സവങ്ങളിലൊന്നായി മത്സരം മാറുകയും ചെയ്തു.
