ലോകഫുട്ബോളിലെ ജനുവരി ട്രാന്സ്ഫര് വിന്ഡോ അടയുമ്പോള് ആഴ്സണലിന്റെ ചിലിയന് മിഡ്ഫീല്ഡര് അലക്സിസ് സാഞ്ചസിനെ പ്രീമിയര് ലീഗ് വമ്പന്മാരായ മാഞ്ചസ്റ്റര് യുണൈറ്റഡ് റാഞ്ചി. ഞായറാഴ്ച വൈദ്യപരിശോധനയ്ക്കായി എത്തിയ താരത്തിന്റെ കൈമാറ്റം പൂര്ത്തിയായി. ആഴ്സണലാകട്ടെ താരത്തിന്റെ വിടവ് നികത്താന് ലിവര്പൂള്താരം ഹെന്ട്രിക് മഖത്തരിയനെ കൊണ്ടുവരാനുള്ള ശ്രമത്തിലാണ്.
ബ്രസീലിയന് സൂപ്പര്താരം ഫിലിപ്പ് കൊടീഞ്ഞോയെ ബാഴ്സിലോണയ്ക്ക് നല്കുകയും മഖത്തരിയാനെ ആഴ്സണലിന് കൊടുക്കുകയും ചെയ്ത ലിവര്പൂള് മാല്ക്കത്തെ കൊണ്ടുവരാനുള്ള ശ്രമത്തിലാണ്. ഇടതു മിഡ്ഫീല്ഡിലായിരിക്കും മിക്കവാറും അലക്സിസ് സാഞ്ചസിന്റെ പൊസിഷന്. മദ്ധ്യത്തിലോ ഇടതുപാര്ശ്വത്തിലോ കളിക്കാന് ശേഷിയുള്ള താരമാണ് സാഞ്ചസ് എന്നാണ് പരിശീലകന് ജോസ് മൊറീഞ്ഞോ വ്യക്തമാക്കുന്നത്. കഴിഞ്ഞ ദിവസം മാഞ്ചസ്റ്റര് യുണൈറ്റഡിന്റെ ഏഴാം നമ്പര് ജഴ്സിയില് നില്ക്കുന്ന അലക്സിസ് സാഞ്ചസിന്റെ ചിത്രം സാമൂഹ്യമാധ്യമങ്ങള് വഴി പുറത്തു വന്നിരുന്നു. നിലവില് മാഞ്സ്റ്റര് സിറ്റിക്ക് പിന്നില് 12 പോയിന്റ വ്യത്യാസത്തിലാണ് മാഞ്ചസ്റ്റര് യുണൈറ്റഡിന്റെ പ്രീമിയര് ലീഗ് ടേബിളില് സ്ഥാനം. ആഴ്സണലാകട്ടെ ആറാം സ്ഥാനത്തും നില്ക്കുന്നു. നാലാം സ്ഥാനത്ത് ലിവര്പൂളാണ് നില്ക്കുന്നത്.
അലക്സിസ് സാഞ്ചസിനൊപ്പം മറ്റൊരു ചിലയന്താരം അര്ട്ടുറോ വിദാലിനെയും മാഞ്ചസ്റ്റര് യുണൈറ്റഡ് നോട്ടമിട്ടിട്ടുണ്ട്. ജര്മ്മന് ക്ളബ്ബ് ബയേണ് മ്യൂണിക്കിന് കളിക്കുന്ന വിദാലിനെ സീസണ് അവസാനിക്കുന്നതോടെ ഇംഗ്ളണ്ടില് എത്തിക്കാമെന്നാണ് മാഞ്ചസ്റ്റര് കരുതുന്നത്. അതേസമയം ലീഗില് വിഷമിക്കുന്ന മുന് ചാമ്പ്യന്മാര് ചെല്സിയും വിദാലിന് വേണ്ടി രംഗത്തുണ്ട്. താരത്തിന് ഇറ്റലിയില് നിന്നും ചൈനയില് നിന്നും ഓഫറുകള് വന്നിട്ടുണ്ട്. കഴിഞ്ഞ ദിവസം മാഞ്ചസ്റ്റര് യുണൈറ്റഡില് ചേര്ന്ന സാഞ്ചസിനെ വിദാല് അഭിനന്ദിച്ചിരുന്നു.
