റൊസാരിയോ: അര്ജന്റീനയുടെ സൂപ്പര് ഫുട്ബോളര് ലയണല് മെസിയുടെ പിതാവ് ഹോര്ഹെ മെസി അന്തരിച്ചു. 68 വയസുകാരനായ ഹോര്ഗെ കുറച്ചു നാളുകളായി ചികിത്സയിലായിരുന്നു.
ജന്മനാടായ റൊസാരിയോയിലെ ഒരു മെഡിക്കല് ക്ലിനിക്കില് വെള്ളിയാഴ്ച രാത്രിയായിരുന്നു (പ്രാദേശിക സമയം) അന്ത്യം. മെസിയുടെ കരിയറിലെ വളര്ച്ചയുടെ ഓരോ ഘട്ടത്തിലും ഹോര്ഹെ നിഴലായി കൂടെയുണ്ടായിരുന്നു.
ലോകകപ്പിലെ അള്ജീരിയയ്ക്കെതിരായ മത്സരത്തില് മെസി ഗോളടിച്ചതിനു ശേഷം '' ജീവിതത്തിലെ ബുദ്ധിമുട്ടേറിയ ദിവസങ്ങളിലൂടെയാണ്'' കടന്നു പോകുന്നതെന്നു മെസി പ്രതികരിച്ചിരുന്നു. പിന്നാലെ ഹോര്ഹെയുടെ ആരോഗ്യ നില സംബന്ധിച്ച് കുടുംബം പ്രസ്താവന പുറത്തിറക്കി. ലോകകപ്പിനു ശേഷം പിതാവിനെ കാണാനായി ഇന്റര് മയാമി താരമായ മെസി യു.എസിലെ മേജര് ലീഗ് സോക്കര് മത്സരങ്ങളില്നിന്നു വിട്ടുനിന്നു.
ഉരുക്കു വ്യവസായ മേഖലയില് പ്രവര്ത്തിച്ചിരുന്ന ഹോര്ഹെയാണു മെസിയെ ന്യൂവെല് ഓള്ഡ് ബോയ്സ് ക്ലബില് വിട്ടു കളി പഠിപ്പിച്ചത്. കുട്ടിക്കാലത്ത് മെസിയില് വളര്ച്ചാ പ്രശ്നങ്ങള് കണ്ടതോടെ ഹോര്ഹെയുടെ നേതൃത്വത്തിലാണ് സ്പെയിനിലേക്ക് പരിശീലനത്തിനായി കൊണ്ടുപോയത്. ബാഴ്സലോണയിലെ മെച്ചപ്പെട്ട പരിശീലന സൗകര്യവും ചികിത്സയും ലയണല് മെസിക്ക് ലഭിച്ചതോടെ ഇതിഹാസത്തിന്റെ പിറവിയായി. ഹോര്ഹെയും മെസിയും മാത്രമാണു ബാഴ്സലോണയിലേക്കു വിമാനം കയറിയത്. മാതാവ് ഉള്പ്പെടെയുള്ളവര് റൊസാരിയോയില് തുടര്ന്നു.
2000 ല് 13-ാം വയസിലാണ് ലയണല് മെസി ബാഴ്സലോണയുടെ ഭാഗമാകുന്നത്. തുടര്ന്ന് താരത്തിന്റെ ചികിത്സാ ചെലവുകളും ബാഴ്സ ഏറ്റെടുത്തു. ലയണല് മെസി സ്പെയിനിലെ ജീവിതവുമായി പൊരുത്തപ്പെടുന്നതുവരെ ഹോര്ഹെ ഒപ്പമുണ്ടായിരുന്നു. മെസിയുടെ കരിയര് വളര്ത്താന് ഏജന്റായും ഹോര്ഹെ പ്രവര്ത്തിച്ചു. ബാഴ്സ വിട്ട മെസി പാരീസ് സെയിന്റ ജെര്മെയ്നിലേക്കും പിന്നീട് ഇന്റര് മയാമിയിലേക്കു മാറാനും ഹോര്ഹെയാണു ചര്ച്ചകള് നടത്തിയത്.
ഹോര്ഹെയ്്ക്കും ഭാര്യ സെലിയ കുസിനിറ്റിക്കും മെസിയെ കൂടാതെ മൂന്ന് കുട്ടികള് കൂടിയുണ്ട്്. റോഡ്രിഗോ, മത്തിയാസ്, മരിയ സോള് എന്നിവരാണു മെസിയുടെ സഹോദരങ്ങള്. സ്പെയിനെതിരേ നടന്ന ലോകകപ്പ് ഫൈനല് കാണാന് മെസിയുടെ ജീവിത പങ്കാളി അന്റോണിയ റോകുസോ, മക്കളായ തിയാഗോ, മാറ്റിയോ, സിറോ എന്നിവരെത്തിയിരുന്നു. മെസിയുടെ മത്സരങ്ങള് കാണാന് സ്ഥിരമായെത്തിയിരുന്ന പിതാവിന്റെയും മറ്റുള്ളവരുടെയും അഭാവം അഭ്യൂഹങ്ങള്ക്കു വഴിയുമായി.
Comments