ഭോപ്പാല്: റിപ്പബ്ളിക്ക് ദിനത്തില് ആര്എസ്എസ് നേതാവ് മോഹന്ഭഗത് ദേശീയ പതാക ഉയര്ത്തിയതിന് കേരളത്തില് ഉണ്ടായ പുകില് ചില്ലറയല്ല. സര്ക്കാര് ഇതിനെതിരേ ഉത്തരവ് പുറപ്പെടുവിച്ചിട്ടും അക്കാര്യം നടക്കുക തന്നെ ചെയ്തു. എന്നാല് ഇതിന്റെ നേരെ എതിരായ കാര്യം ബിജെപി ഭരിക്കുന്ന പ്രധാന സംസ്ഥാനങ്ങളില് ഒന്നായ ഉത്തര്പ്രദേശില് റിപ്പബ്ളിക്ക് ദിനത്തില് അരങ്ങേറിയത് വന് വിവാദമാകുന്നു.
ബിജെപിയ്ക്ക് വോട്ട് ചെയ്യില്ല എന്ന് വിദ്യാര്ത്ഥികളെ കൊണ്ട് ടീച്ചര്മാര് പ്രതിജ്ഞ എടുപ്പിക്കുന്ന ദൃശ്യങ്ങളുടെ വീഡിയോ സോഷ്യല് മീഡിയയില് വൈറലാകുകയാണ്. ഞായറാഴ്ച ഇറ്റാര്സി ഐടിഐ യിലാണ് വിദ്യാര്ത്ഥികളെ കൊണ്ട് പ്രതിജ്ഞ ചെയ്യിച്ചത്. ഇതിനെതിരേ കോളേജിന് പുറത്ത് ബിജെപി പ്രതിഷേധം നടത്തുകയും ചെയ്തു. ഓണ്ലൈന് ടെസ്റ്റ് നിര്ത്തുന്നത് വരെ ബിജെപിയ്ക്ക് വോട്ടു ചെയ്യില്ലെന്നും പാര്ട്ടിക്ക് വേണ്ടി പ്രവര്ത്തിക്കില്ലെന്നും ആയിരുന്നു വിദ്യാര്ത്ഥികളെ കൊണ്ട് പ്രതിജ്ഞ ചെയ്യിച്ചത്.
ഇതിനൊപ്പം ബിജെപിയുടെ അഴിമതിക്കും അനീതിക്കും എതിരേ ജില്ലയില് പ്രചരണം നടത്തുമെന്നും പ്രതിജ്ഞയില് വിദ്യാര്ത്ഥികള് ഒരുമിച്ചു ചൊല്ലി. ജെയ് ഹിന്ദ് വിളിച്ചാണ് വീഡിയോ അവസാനിക്കുന്നത്. തെരഞ്ഞെടുപ്പിനെ അഭിമുഖീകരിക്കാനിരിക്കെ വീഡിയോ ബിജെപിയെ ശല്യപ്പെടുത്തുന്നുണ്ട്. അടുത്തിടെയാണ് ഒരാള് തന്റെ മകന്റെ വിവാഹ ക്ഷണക്കത്തില് 'ഹമാരി ഭൂല്, കമല്കാ ഫൂല്' എന്ന് രേഖപ്പെടുത്തിയത്. ഇതേ മുദ്രാവാക്യം തന്നെ ഒരു ഹോട്ടലുകാരന് തന്റെ ബില്ലിലും രേഖപ്പെടുത്തി ആള്ക്കാര്ക്ക് നല്കിയിരുന്നു.
