തിരുവനന്തപുരം: പാവങ്ങളുടെ പടത്തലവന് എകെജിയുടെ ജന്മഗ്രാമമായ പെരളശ്ശേരിയില് അദ്ദേഹത്തിന്റെ സ്മാരകം നിര്മ്മിക്കുന്നതിന് 10 കോടി. എകെജിയുടെ സംഭാവന പുതിയ തലമുറ അറിയണമെന്നും തോമസ് ഐസക് ബജറ്റ് അവതരണ വേളയില് വ്യക്തമാക്കി.
പുന്നപ്ര വയലാര് സ്മാരകത്തിനും പത്തുകോടി പ്രഖ്യാപിച്ചു. എകെജിയെക്കുറിച്ച് സുശീലാഗോപാലന്റെ കുറിപ്പുകള് അനുസ്മരിച്ച ശേഷമായിരുന്നു ധനമന്ത്രി സ്മാരകത്തെക്കുറിച്ച് പ്രഖ്യാപിച്ചത്. കലാ സാംസ്ക്കാരിക മേഖലയ്ക്ക് 144 കോടിയും വകയിരുത്തി.
കാര്ഷിക മേഖല തളര്ച്ചയിലെന്നും കൃഷിയും കൃഷിഭൂമിയും കര്ഷകനും വികസിക്കുന്നില്ലെന്നും മന്ത്രി വിലയിരുത്തി. 2018 മൂന്ന് കോടി മരങ്ങള് നടുമെന്നും വനാതിര്ത്തികള് വേര്തിരിച്ച് സംരക്ഷിക്കാന് 55 കോടിയും പ്രഖ്യാപിച്ചു.
വനം വന്യജീവി മേഖലയ്ക്ക 248 കോടി രൂപയാണ് പ്രഖ്യാപിച്ചത്. ബാംബൂ കോര്പ്പറേഷന് പത്തു കോടി വകയിരുത്തി. മൃഗസംരക്ഷണത്തിന് 330 കോടിയും ക്ഷീര വികസനത്തിന് 107 കോടിയും വിലയിരുത്തി. വനത്തിനുള്ളില് മൃഗങ്ങള്ക്ക് ജലം ഉറപ്പാക്കാനുള്ള പദ്ധതിക്ക് 50 കോടിയും വന്യജീവി ശല്യം തടയാനുള്ള പദ്ധതിക്ക് 100 കോടി രൂപയും വകയിരുത്തി.
ഇതര സംസ്ഥാന തൊഴിലാളികളെ അതിഥി തൊഴിലാളികളായി കാണുമെന്നും ഇവരുടെ ജീവിത നിലവാരവും ആരോഗ്യവും മെച്ചപ്പെടുത്തുന്നതിനും പദ്ധതി തയ്യാറാക്കുമെന്നും പ്രഖ്യാപിച്ചു. തരിശു പാടങ്ങള് പാടശേഖര സമിതികള്ക്കോ സ്വയം സഹായ സംഘങ്ങള്ക്കോ നല്കാന് നിയമം. നെല്വയലുകള് തരിശ്ശിടുന്നതിനെതിരേ കര്ശന നടപടിയെടുക്കും.
സഹകരണബാങ്കുകള് യോജിപ്പിച്ചുള്ള കേരളബാങ്കും ഈ വര്ഷം തുടങ്ങും. കേരളത്തിന് പുറത്ത വാഹനനികുതിയടച്ച് കേരളത്തില് ഓടുന്ന വാഹനങ്ങള്ക്ക് നികുതിയടച്ച് നടപടികളില് നിന്നും ഒഴിവാകാന് നിശ്ചിത കാലാവധിക്കുള്ളില് അവസരം നല്കും. ഇതിലൂടെ മൂന്ന് കോടി രൂപയാണ് അധിക വരുമാനം പ്രതീക്ഷിക്കുന്നത്.
