ബംഗളുരു: പ്രാവിനെ പിടിക്കുന്നതിനിടയില് ഇടയ്ക്ക് കയറി ബഹളം വെച്ച് തടസ്സമുണ്ടാക്കിയ രണ്ടു വയസുള്ള കുഞ്ഞിനെ 14 കാരന് ചവിട്ടിക്കൊന്നു. ബംഗളുരുവിലെ സൊളദേവനഹള്ളിയിലാണ് സംഭവം.
പ്രാവിനെ പിടിക്കുന്നതിനിടയില് ഇടയ്ക്കു കയറിയ കുഞ്ഞിന്റെ ബഹളത്തെ തുടര്ന്ന് പ്രാവ് പറന്നു പോയി. ഇതോടെ ക്ഷുഭിതനായ 14 കാരന് എടുത്ത് എറിഞ്ഞതിനുശേഷം ചവിട്ടിക്കൊലപ്പെടുത്തുകയായിരുന്നു. ബെംഗളുരു സ്വദേശിയായ ബസവരാജിന്റെ മൂന്നാമത്തെ കുട്ടിയാണ് മരിച്ചത്.
ബഗല്ക്കോട്ടയില്നിന്നുള്ള കൗമാരക്കാരനാണ് പ്രതിയെന്നും ഇയാള് വീട്ടില് പ്രാവുകളെ വളര്ത്തുന്നുണ്ടെന്നും പൊലീസ് പറഞ്ഞു. ബുധനാഴ്ച പ്രാവുകളിലൊന്ന് റോഡിലിരിക്കുന്നത് പ്രതിയായ കുട്ടി കാണുകയും അതിനെ പിടിക്കാന് ഒപ്പം ഓടുകയുമായിരുന്നു. ഇതിനിടെ അറിയാതെ രണ്ട് വയസ്സുകാരന് വന്ന് പെട്ടു. കുട്ടി തടസ്സമായതോടെ പ്രതിയ്ക്ക് പ്രാവിനെ പിടിക്കാന് ഒപ്പമെത്താനാകാതെ വരികയും പ്രാവ് പറന്ന് പോകുകയും ചെയ്തു.
പ്രാവ് നഷ്ടപ്പെട്ടതില് ക്ഷുഭിതനായ 14കാരന് കുഞ്ഞിനെ എടുത്ത് തൊട്ടടുത്തുള്ള പ്ലാന്റേഷനില് എത്തുകയും അവിടെ വച്ച് നിലത്തേക്കെറിഞ്ഞ കുഞ്ഞിനെ ചവിട്ടി കൊല്ലുകയുമായിരുന്നു. കുഞ്ഞിനെ കാണാതെ ബസവരാജും കുടുംബവും അന്വേഷിച്ചപ്പോഴാണ് പ്ലാന്റേഷനില് അബോധാവസ്ഥയില് കുഞ്ഞിനെ കണ്ടെത്തിയത്. ഉടന്തന്നെ ആശുപത്രിയിലെത്തിച്ചെങ്കിലും കുഞ്ഞിനെ രക്ഷിക്കാനായില്ല.
കുട്ടിയെ 14 കാരനൊപ്പം കണ്ടുവെന്ന മൊഴിയെ തുടര്ന്നാണ് ഇയാള്ക്കെതിരെ പോലീസ് കേസെടുത്തത്. പ്രാവിന്റെ പേരില് ഇരു കുടുംബങ്ങളും തമ്മില് വഴക്ക് നിലനിന്നിരുന്നുവെന്നും പോലീസ് പറഞ്ഞു.
