വാഷിങ്ടണ് : സ്കൂളില് തോക്കുമായി വരുമെന്നും അധ്യാപകരെയും വിദ്യാര്ത്ഥികളെയും വെടിവെച്ച് കൊല്ലുമെന്നും ഭീഷണിപ്പെടുത്തിയ ആറാം ക്ലാസ് വിദ്യാര്ത്ഥിനിയെ പോലീസ് അറസ്റ്റു ചെയ്തു. ഫ്ളോറിഡയിലെ ഡേയ്വിയിലാണ് സംഭവം. നോവ മിഡില് സ്കൂളിലെ 11 വയസ്സുകാരിയാണ് പിടിയിലായത്.
അസിസ്റ്റന്റ് പ്രിന്സിപ്പാളിന്റെ മുറിയുടെ വാതിലിന് അടിയില് വിദ്യാര്ത്ഥിനി കത്ത് കൊണ്ടുപോയി വയ്ക്കുകയായിരുന്നു എന്നാണ് പോലീസ് പറയുന്നത്. ഇതിന്റെ ദൃശ്യങ്ങള് സിസി ടിവി കാമറയില് നിന്നും കണ്ടെടുത്തിട്ടുണ്ട്.
സ്കൂളില് ഒരു തോക്ക് കൊണ്ടു വരുമെന്നും അധ്യാപകരെയും വിദ്യാര്ത്ഥികളെയും കൊല്ലുമെന്നും വിദ്യാര്ത്ഥി സ്വന്തം കൈപ്പടയില് എഴുതിയ കത്തില് വ്യക്തമാക്കുന്നു. ഫെബ്രുവരി 16, 18 തീയതികളില് തോക്ക് കൊണ്ടു വരുമെന്നാണ് എഴുതിയിരിക്കുന്നത്. 'തയ്യാറായി ഇരുന്നോളൂ' എന്നും വിദ്യാര്ത്ഥിനി കത്തില് പറയുന്നുണ്ട്.
പിടിക്കപ്പെട്ടതോടെ തെറ്റ് സമ്മതിച്ചുകൊണ്ടുള്ള കത്ത് വിദ്യാര്ത്ഥിനി എഴുതി നല്കിയതായി പോലീസ് പറഞ്ഞു. കത്ത് അസിസ്റ്റന്റ് പ്രിന്സിപ്പാളിന്റെ വാതിലിന് അടിയില് വയ്ക്കാന് ആവശ്യപ്പെട്ടത് മറ്റൊരു വിദ്യാര്ത്ഥിനിയാണെന്നും കത്തില് പറയുന്നുണ്ട്.
