അന്തരിച്ച സംഗീത സംവിധായകന് ജോണ്സണ് മാസ്റ്ററുടെ ഭാര്യ റാണി ജോണ്സണ് രക്താര്ബുദമാണെന്ന് വാര്ത്തകള് പ്രചരിച്ചിരുന്നു. വാര്ത്ത നിഷേധിച്ച് ജോണ്സന്റെ കുടുംബം രംഗത്ത്. റാണി ജോണ്സണ് രക്തത്തില് പ്ലേറ്റ്ലറ്റ് കുറയുന്ന അസുഖമാണെന്നും രക്താര്ബുദമല്ലെന്നും ജോണ്സന്റെ ഇളയ സഹോദരന് ജോര്ജിന്റെ ഭാര്യയായ മിനി ജോര്ജ് പറഞ്ഞു. ഓണലൈന് മാധ്യമത്തോട് സംസാരിക്കുകയായിരുന്നു അവര്.
ചേട്ടന്റേയും (ജോണ്സന്റെ) മകന് റെന്നിന്റേയും മരണം എല്ലാവരേയും തകര്ത്തു കളഞ്ഞിരുന്നു. അതിന് പിന്നാലെയാണ് മകള് ഷാനിന്റെ മരണം. ചേച്ചി ആകെ വിഷമത്തിലായി. വാര്ത്തകളില് പ്രചരിക്കുന്നത് പോലെ ചേച്ചിക്ക് രക്താര്ബുദമില്ല. രക്തത്തില് പ്ലേറ്റ്ലറ്റിന്റെ അളവ് കുറയുന്ന അസുഖമാണ്. അതുകൊണ്ട് തന്നെ തുടര്ച്ചയായി രക്തപരിശോധനയും ചികിത്സയും നടത്തണം. കുടാതെ ഷുഗറുമുണ്ട്. ഷാന്റെ മരണത്തോടെ ചേച്ചിയുടെ സ്ഥിര വരുമാനവും നിലച്ചു. ജോണ്സന്റെ സഹോദരന്മാരും കുടുംബവും ചേച്ചിക്കൊപ്പം തന്നെയുണ്ട്. പക്ഷേ നാളെ ഞങ്ങളുടെ കാര്യം എന്താകുമെന്ന് അറിയില്ലല്ലോ. കുടുംബത്തിലുണ്ടായ തുടര്ച്ചയായ മൂന്ന് മരണം അത്രമാത്രം ഉലച്ചു കളഞ്ഞു-മിനി ജോര്ജ് പറഞ്ഞു.
എല്ലാം കൂടി ആലോചിച്ച ശേഷമാണ് മുഖ്യമന്ത്രിയെ കാണാന് തീരുമാനിച്ചതെന്നും ഒരു വര്ഷം മുന്പാണ് മുഖ്യമന്ത്രിക്ക് അപേക്ഷ നല്കിയയെന്നും മിനി പറഞ്ഞു. അപേക്ഷ മുഖ്യമന്ത്രി സാംസ്കാരിക വകുപ്പിന് കൈമാറി. അപേക്ഷയില് നടപടി ഉണ്ടായെന്ന് ഇപ്പോള് വാര്ത്തകളില് നിന്നുമാണ് അറിഞ്ഞത്. ഔദ്യോഗിക അറിയിപ്പ് ലഭിച്ചിട്ടില്ല. അങ്ങനെ മറുപടി നല്കുന്ന പതിവുണ്ടോയെന്ന് അറിയില്ലെന്നും മിനി കൂട്ടിച്ചേര്ത്തു. ഒരു നിശ്ചിത പെന്ഷന് തുക ചേച്ചിയ്ക്ക് ലഭിക്കുന്നത് ആശ്വാസകരമായിരിക്കുമെന്നും മിനി പറഞ്ഞു.
റാണി ജോണ്സണ് രക്താര്ബുദമാണെന്ന വാര്ത്ത പ്രചരിച്ചതിന് പിന്നാലെ നിരവധി പേര് തങ്ങളെ ബന്ധപ്പെടുന്നുണ്ടെന്ന് മിനി പറഞ്ഞു. വാര്ത്തയുടെ നിജസ്ഥിതി അറിയാനാണ് പലരും വിളിക്കുന്നത്. വാര്ത്ത കൊടുക്കരുതെന്ന് പറയാനാകില്ലല്ലോ. പക്ഷേ ഇതെല്ലാം തങ്ങള്ക്ക് വേദന മാത്രമാണ് നല്കുന്നതെന്നും മിനി പറഞ്ഞു. ചികിത്സയുടെ സൗകര്യത്തിന് എറണാകുളത്ത് അമ്മയ്ക്കൊപ്പമാണ് റാണി ജോണ്സണ് താമസിക്കുന്നത്. വിഷമിപ്പിക്കുന്ന വാര്ത്തകര് നിന്നാല് മതിയെന്ന പ്രാര്ത്ഥനയിലാണ് തങ്ങളെന്നും മിനി പറഞ്ഞു.
Comments