ന്യൂഡല്ഹി: കന്നുകാലികളെ കശാപ്പിനായി കാലിച്ചന്തകളില് വില്ക്കരുതെന്ന വിവാദവ്യവസ്ഥ ഒഴിവാക്കി കേന്ദ്രസര്ക്കാരിന്റെ മൃഗസംരക്ഷണനിയമത്തിന്റെ പുതിയ കരട് വിജ്ഞാപനം. കന്നുകാലികളെ കശാപ്പിനായി വില്ക്കുന്നതു തടഞ്ഞുകൊണ്ടു കഴിഞ്ഞ മേയില് കേന്ദ്രം പുറത്തിറക്കിയതും പിന്നീട് പിന്വലിച്ചതുമായ വിവാദവിജ്ഞാപനത്തിനു പകരമാണിത്. വ്യാപകപ്രതിഷേധത്തെത്തുടര്ന്നു മുന്തീരുമാനത്തില്നിന്നു മലക്കം മറിഞ്ഞാണു കേന്ദ്രസര്ക്കാര് നടപടി.
മൃഗങ്ങളോടുള്ള ക്രൂരത തടയല് നിയമം 2017 എന്ന പുതിയ കരടില് കശാപ്പ് നിയന്ത്രണം എന്ന പ്രയോഗം പൂര്ണമായി ഒഴിവാക്കിയെങ്കിലും ഗര്ഭിണികളായ കാലികളെയും കന്നുകുട്ടികളെയും കാലിച്ചന്തയില് വില്ക്കുന്നത് തടഞ്ഞിട്ടുണ്ട്. ആരോഗ്യമില്ലാത്ത കാലികളെ ചന്തകളില് വില്ക്കരുത്, ഗര്ഭാവസ്ഥയിലുള്ള കാലികളെ പ്രദര്ശിപ്പിക്കരുത്, കാലിച്ചന്തകളില് മൃഗങ്ങളെ വില്ക്കുന്നതിന്റെ രജിസ്റ്റര് സൂക്ഷിക്കണം എന്നിങ്ങനെയാണു പരിസ്ഥിതി മന്ത്രാലയം തയാറാക്കിയ പുതിയ വിജ്ഞാപനത്തിലെ നിബന്ധനകള്.
കരട് നിയമമന്ത്രാലയത്തിന്റെ പരിഗണനയിലാണ്. അംഗീകാരം കിട്ടിയാലുടന് വിജ്ഞാപനത്തിന്റെ കരട് പരിസ്ഥിതിമന്ത്രാലയം പരസ്യപ്പെടുത്തും. പൊതുജനങ്ങള്, മൃഗാവകാശപ്രവര്ത്തകര് എന്നിവരുടെ അഭിപ്രായമറിഞ്ഞശേഷം അന്തിമവിജ്ഞാപനം പുറത്തിറക്കും. പഴയ വിജ്ഞാപനത്തിലെ കാലിച്ചന്ത നിരീക്ഷണസമിതിക്കുപകരം മൃഗങ്ങള്ക്കെതിരായ ക്രൂരത തടയാന് പ്രാദേശിക തല സമിതി രൂപീകരിക്കാന് കരട് നിര്ദേശിക്കുന്നു. ജില്ലാ മജിസ്ട്രേറ്റ്, സംസ്ഥാന മൃഗക്ഷേമ ബോര്ഡ് പ്രതിനിധി, ജില്ലാ പോലീസ് മേധാവി എന്നിവരടങ്ങുന്നതാവും സമിതി. തങ്ങളുടെ അധികാരപരിധിയില് മൃഗങ്ങള് പീഡനങ്ങള് നേരിടുന്നില്ല എന്നുറപ്പുവരുത്തേണ്ടത് ഈ സമിതിയാണ്.
കാലിച്ചന്തയില്നിന്ന് കാലികളെ വാങ്ങുന്നവര്ക്ക് മാനദണ്ഡങ്ങള് പാലിച്ചു എന്ന സര്ട്ടിഫിക്കറ്റ് ഈ സമിതി നല്കണം. മൃഗങ്ങള്ക്കെതിരെയുള്ള ക്രൂരത തടയല് നിയമം 2017 എന്ന പേരില് കഴിഞ്ഞ മെയ് 23നാണ് പശു, കാള, പോത്ത്, എരുമ, ഒട്ടകം തുടങ്ങിയവയെ കശാപ്പിനായി വില്ക്കുന്നതും വിശ്വാസത്തിന്റെ ഭാഗമായി ബലിയറുക്കുന്നതും നിരോധിച്ച് കേന്ദ്ര വനം- പരിസ്ഥിതിമന്ത്രാലയം വിജ്ഞാപനം ഇറക്കിയത്.
മാട്ടിറച്ചി നിരോധനം ലക്ഷ്യമിട്ടാണു ബി.ജെ.പി. സര്ക്കാരിന്റെ നീക്കമെന്ന് ആരോപണമുയരുകയും രാജ്യവ്യാപക പ്രതിഷേധമുയരുകയും ചെയ്തു. മദ്രാസ് െഹെക്കോടതി വിജ്ഞാപനം സ്റ്റേ ചെയ്യുകയും ജൂെലെയില് സുപ്രീം കോടതി ഈ സ്റ്റേ രാജ്യത്തുടനീളം പ്രാബല്യത്തിലാക്കുകയും ചെയ്തു. വിജ്ഞാപനം ഭേദഗതിചെയ്യുമെന്ന് സുപ്രീം കോടതിയില് അറിയിച്ച സര്ക്കാര് വിജ്ഞാപനം പിന്നീടു പിന്വലിച്ചു. തുടര്ന്നു സംസ്ഥാനങ്ങളുടെ പ്രതികരണം തേടുന്നതിനായി കേന്ദ്രസര്ക്കാര് രണ്ട് സെറ്റ് കത്തുകളയച്ചിരുന്നു. മൃഗസംരക്ഷണ പ്രവര്ത്തകരുമായും കന്നുകാലി വ്യാപാരികളുമായും ചര്ച്ചയും നടത്തി. ഈ പ്രതികരണങ്ങളുടെയെല്ലാം അടിസ്ഥാനത്തിലാണ് പുതിയ കരട് തയ്യാറാക്കിയിരിക്കുന്നത്.
