ഖൊരക്പൂര് ജില്ലാ ജയിലിലെ ഒരു സ്ത്രീയുള്പ്പെടെ 23 തടവുകാര്ക്ക് എയ്ഡ്സ്. കുറച്ചുദിവസം മുമ്പ് ജയില് അധികൃതര് സംഘടിപ്പിച്ച ഹെല്ത്ത് ക്യാമ്പില് നടത്തിയ പരിശോധനയിലാണ് 23 തടവുകാര്ക്ക് എച്ച് ഐ വി പോസിറ്റീവ് സ്ഥിരീകരിച്ചതെന്ന് ഇന്ത്യന് എക്സ്പ്രസ് റിപ്പോര്ട്ടില് പറയുന്നു. അസുഖബാധിതരായ തടവുകാര്ക്ക് ബിആര്ഡി മെഡിക്കല് കോളേജില്നിന്നും ആവശ്യമായ ബോധവത്കരണവും ചികിത്സയും നല്കിവരികയാണ്.
എന്നാല് എവിടെനിന്നാണ് ഇവര്ക്ക് വൈറസ് ബാധയുണ്ടായതെന്ന് അറിയില്ലെന്ന് പോലീസ് അധികൃതര് പറയുന്നു.
ഖൊരക്പൂര് ജയിലില് 1400 തടവുകാരാണ് ഉള്ളത്. ഇവരെയെല്ലാം ഹെല്ത്ത് ക്യാമ്പില് പരിശോധനയ്ക്ക് വിധേയമാക്കിയിരുന്നു. പ്രാഥമിക പരിശോധനകള്ക്ക് ശേഷം 400 തടവുകാരെ വിദഗ്ധ പരിശോധനയ്ക്കും വിധേയമാക്കിയിരുന്നു. 23 തടവുകാര്ക്കും ജയിലിനുള്ളില് നിന്നല്ല വൈറസ് ബാധയുണ്ടായതെന്ന നിഗമനത്തിലാണ് അധികൃതര്.
