കോഴിക്കോട്: വെള്ളത്തുണിയില് പൊതിഞ്ഞ കാമുകിയുടെ ചേതനയറ്റ ശരീരം കണ്ടപ്പോള് ബ്രിജേഷിന് തേങ്ങലടക്കാന് കഴിഞ്ഞില്ല. കൊട്ടും കുരവയുമായി പ്രണയിനിയുടെ കഴുത്തില് താലികെട്ടേണ്ട നേരത്ത് ബ്രിജേഷിന് കാണേണ്ടി വന്നത് മെഡിക്കല്കോളേജ് മോര്ച്ചറിക്ക് മുന്നില് ആതിരയുടെ വെള്ളത്തുണിയില് പൊതിഞ്ഞ ശരീരമായിരുന്നു. താഴ്ന്ന ജാതിക്കാരനെ പ്രണയിച്ചതിന് പിതാവ് മകളെ കുത്തിക്കൊന്ന സംഭവത്തില് വെള്ളിയാഴ്ച ഉച്ചയ്ക്ക് ബ്രിജേഷിന് തേങ്ങലടക്കാന് കഴിഞ്ഞില്ല. ആതിരയ്ക്ക് പരിക്കേറ്റെന്നായിരുന്നു ബ്രിജേഷിന്റെ അറിവ്.
ആതിര പരിക്കേറ്റ് ആശുപത്രിയില് കിടക്കുന്ന വിവരം അറിഞ്ഞപ്പോള് താലിമാലയും സാരിയുമെടുത്തായിരുന്നു ബ്രിജേഷ് ആശുപത്രിയിലേക്ക് ഓടിയത്. അവിടെയെത്തിയപ്പോള് കേട്ട വാര്ത്ത താങ്ങാന് കഴിയുന്നതായിരുന്നില്ല. മോര്ച്ചറിക്ക് മുന്നില് കുത്തിയിരുന്ന് പൊട്ടിക്കരയുകയായിരുന്നു ബ്രിജേഷ്. ആതിര പരിക്കേറ്റു കിടക്കുകയാണെന്നായിരുന്നു ബ്രിജേഷ് ആദ്യം അറിഞ്ഞത്. ഒരുമിച്ച് ജീവിക്കാന് കഴിയുമോയെന്ന് ആശങ്കപ്പെട്ടും രക്ഷപ്പെടുത്തണമെന്ന് ആവശ്യപ്പെട്ടും തലേദിവസവും ആതിര ബ്രിജേഷിനെ വിളിച്ചു പറഞ്ഞിരുന്നു.
വ്യാഴാഴ്ച സംഭവം നടക്കുമ്പോള് ബ്രിജേഷ് കല്യാണത്തിനുള്ള താലിമാല വാങ്ങാന് പോയിരിക്കുകയായിരുന്നു. രാത്രി ആതിര കുത്തേറ്റ് മരിച്ച വിവരം ടെലിവിഷനില് വാര്ത്ത വന്നെങ്കിലും അത് കണ്ട ബന്ധുക്കള് വിവരം ബ്രിജേഷിനെ അറിയിച്ചില്ല. ബ്രിജേഷിന്റെ വീട്ടില് വിവാഹത്തിനായി തകൃതിയായി ഒരുക്കങ്ങള് നടക്കുമ്പോള് ആതിരയുടെ വീട്ടില് വിവാഹത്തിന് ധരിക്കാനായി ആതിരയ്ക്ക് വാങ്ങിയ സാരി പിതാവ് കൂട്ടിയിട്ട് തീയിട്ടു. പന്തികേട് തോന്നിയ രാജന്റെ സഹോദരിയാണ് ആതിരയെ കൈപിടിച്ച് തൊട്ടടുത്ത വീട്ടില് കൊണ്ടുപോയി ഒളിപ്പിച്ചത്. മരുമകനായി താഴ്ന്ന ജാതിക്കാരനെ സ്വീകരിക്കേണ്ടി വരുന്നതിന്റെ ദേഷ്യമാണ് അയല്ക്കാരന്റെ വീട്ടില് ഒളിച്ചിരുന്ന ആതിരയെ പിതാവ് അവിടെ ചെന്ന് കുത്തിക്കൊലപ്പെടുത്താന് കാരണമായത്. വാതില് ചവുട്ടിത്തുറന്ന് കറിക്കത്തിക്ക് കുത്തുകയായിരുന്നു.
ശ്വാസകോശത്തില് ആഴത്തിലുള്ള മുറിവേറ്റാണ് ആതിര മരണമടഞ്ഞതെന്നാണ് പോസ്റ്റുമാര്ട്ടം റിപ്പോര്ട്ടില് പറഞ്ഞിരിക്കുന്നത്. മറ്റുള്ളവര് പരിഹസിക്കുമെന്ന അപമാനചിന്തയെ തുടര്ന്നാണ് മകളെ പിതാവ് കുത്തിക്കൊലപ്പെടുത്തിയത്. പട്ടികജാതി വിഭാഗത്തില് പെടുന്ന ബ്രിജേഷും തീയ്യജാതിക്കാരിയായ ആതിരയും തമ്മിലുള്ള പ്രണയം പിതാവ് രാജന് അംഗീകരിക്കാന് കഴിയുന്നതായിരുന്നില്ല. ഇതേ തുടര്ന്ന് പ്രശ്നം പോലീസ് സ്റ്റേഷന് വരെ നീളുകയും പോലീസിന്റെ തര്ക്ക പരിഹാരത്തില് വിവാഹത്തിന് സമ്മതിക്കുകയുമായിരുന്നു.
കൊയിലാണ്ടി സ്വദേശി ബ്രിജേഷുമായി പ്രണയത്തിലായിരുന്ന ആതിരയുടെ വിവാഹം വെള്ളിയാഴ്ച പുത്തലം സാളിഗ്രാമ ക്ഷേത്രത്തില് നടക്കാനിരിക്കെയാണ് വ്യാഴാഴ്ച പിതാവ് രാജന് മകളെ കുത്തിക്കൊന്നത്. കൊയിലാണ്ടി കോതമംഗലത്തെ ക്ഷേത്രത്തില് ഇവര് തമ്മിലുള്ള വിവാഹത്തിന് ഒരുക്കം നടത്തിയെങ്കിലും വീടിനടുത്തുള്ള ക്ഷേത്രത്തില് വെച്ച വിവാഹം നടത്തിക്കൊടുക്കാമെന്ന ഉറപ്പിന്മേല് അത് മാറ്റുകയായിരുന്നു. വെള്ളിയാഴ്ച നടക്കാനിരിക്കുന്ന വിവാഹത്തിനായി ആതിരയുടെ വീട്ടിലും പന്തലിട്ട് സദ്യയ്ക്ക് വേണ്ട ഒരുക്കങ്ങളും നടത്തിയിരിക്കെയായിരുന്നു രാജന് മകളെ അയല്വീട്ടിലിട്ട് കുത്തിക്കൊന്നത്.
