ന്യൂഡല്ഹി: ദക്ഷിണാഫ്രിക്കയ്ക്കെതിരായ മൂന്നാം ക്രിക്കറ്റ് ടെസ്റ്റിനിടെ പന്തില് കൃത്രിമം കാണിച്ച ഓസീസ് താരങ്ങള്ക്ക് പിന്തുണയുമായി ഇന്ത്യന് ക്രിക്കറ്റ് താരം ആശിഷ് നെഹ്റ. ക്രിക്കറ്റ് കളത്തിലുണ്ടായ മാന്യതയ്ക്ക് നിരക്കാത്ത പ്രവൃത്തി സംഭവം വിവാദമായതോടെ ക്യാപ്റ്റന് സ്മിത്തും, കൃത്രിമം കാണിച്ച ബാന്ക്രോഫ്റ്റും ഏറ്റുപറഞ്ഞിരുന്നു. കുറ്റം സമ്മതിച്ചതിനു പിന്നാലെയാണ് താരങ്ങളെ അഭിനന്ദിച്ച് നെഹ്റ രംഗത്തെത്തിയത്.
ക്രിക്കറ്റ് കളത്തില് ഇതൊക്കെ മുമ്പും ഉണ്ടായിട്ടുണ്ടെന്നും, പക്ഷെ കുറ്റം ഏറ്റുപറഞ്ഞത് മഹത്തരമാണെന്നും ഓസീസ് താരങ്ങളെ അഭിനന്ദിച്ച് നെഹ്റ പറഞ്ഞു. സംഭവം വിവാദമായതോടെ സ്മിത്തും, ഉപനായകന് ഡേവിഡ് വാര്ണറും സ്ഥാനം ഒഴിഞ്ഞിരുന്നു.
സംഭവത്തില് കുറ്റക്കാരനാണെന്ന് തെളിഞ്ഞതോടെ ഐസിസി സ്മിത്തിനെ ഒരു മത്സരത്തില് നിന്ന് വിലക്കുകയും, മാച്ച് ഫീയുടെ 100 ശതമാനം പിഴ വിധിക്കുകയും ചെയ്തിരുന്നു. ഐസിസിയുടെ പെരുമാറ്റ ചട്ടപ്രകാരം ലെവല് 2 കുറ്റം ചെയ്തതിനു മൂന്നു ഡിമെരിറ്റ് പോയിന്റും സ്മിത്തിനു മേല് ചുമത്തിയിട്ടുണ്ട്.
