ഭോപ്പാല്: മാനഭംഗക്കേസിലെ നാലു പ്രതികളെ പോലീസ് തെരുവിലൂടെ നടത്തി. കണ്ടുനിന്നവര് രോഷം തീര്ക്കാന് പ്രതികളുടെ മുഖത്തടിച്ചു. ഭോപ്പാലില് ഞായറാഴ്ച ഉച്ചകഴിഞ്ഞാണ് സംഭവം. ഒരു യുവതിയെ ബലാത്സംഗം ചെയ്ത കേസില് അറസ്റ്റിലായ നാലു പ്രതികളെയാണ് പോലീസ് യാതൊരു സുരക്ഷയുമില്ലാതെ പൊതുനിരത്തിലൂടെ നടത്തിയത്.
സ്ത്രീകള്ക്കെതിരായ കുറ്റകൃത്യം തടയാന് കര്ശന നടപടി സ്വീകരിക്കണമെന്ന് മധ്യപ്രദേശ് മുഖ്യമന്ത്രി ശിവരാജ് സിംഗ് ചൗഹാന് പോലീസിന് നിര്ദേശം നല്കിയതിന പിന്നലെ ഇത്തരം നടപടികള് പതിവാണെന്ന് റിപ്പോര്ട്ടുണ്ട്. ബലാത്സംഗ കേസുകളില് പിടികൂടുന്ന പ്രതികളെ നാട്ടുകാരുടെ രോഷം തീര്ക്കാന് പോലീസ് തന്നെ വിട്ടുകൊടുക്കുകയാണ്.
ശനിയാഴ്ചയാണ് യുവതി മാനഭംഗത്തിന് ഇരയായത്. മുന്കാമുകനും അയാളുടെ സുഹൃത്തുക്കളും ചേര്ന്നാണ് യുവതിയെ പീഡിപ്പിച്ചത്. ചില കാര്യങ്ങള് സംസാരിക്കാനുണ്ടെന്ന് പറഞ്ഞ് ഒരു റെസ്റ്റോറന്റിലേക്ക് വിളിച്ചുവരുത്തിയ യുവതിയുടെ പക്കല് നിന്നും മുന് കാമുകന് മൊബൈല് ഫോണ് തട്ടിയെടുത്തിരുന്നു. തുടര്ന്ന് മൊബൈല് വേണമെങ്കില് തനിക്കൊപ്പം വരണമെന്ന് ആവശ്യപ്പെട്ട ഇയാള് അവരെ തന്റെ മുറിയില് എത്തിക്കുകയായിരുന്നു. അവിടെ കാത്തിരുന്ന മറ്റ് മൂന്നു പേര്ക്കൊപ്പം യുവതിയെ പീഡിപ്പിച്ചു. മുറിയില് നിന്നും പിന്നീട് രക്ഷപ്പെട്ട യുവതി ഞായാഴ്ച രാവിലെ പോലീസിന് പരാതി നല്കുകയായിരുന്നു.
