''നിങ്ങള്ക്കൊരു സഹോദരിയുണ്ടെങ്കില് അവളെ ഇങ്ങിനെ ആരെങ്കിലും ചെയ്യാന് നിങ്ങള് സമ്മതിക്കുമോ?'' ആഫ്രിക്കന് രാജ്യമായ മൊറാക്കോയില് സാമൂഹ്യ മാധ്യമങ്ങളില് പ്രത്യക്ഷപ്പെട്ട ഏറ്റവും പുതിയ ബലാത്സംഗ വീഡിയോയില് കൊച്ചു പെണ്കുട്ടി തന്നെ ഇരയാക്കുന്നയാളോട് ചോദിക്കുന്ന ചോദ്യം ലോകം മുഴുവനുമുള്ള മനുഷ്യാവകാശ പ്രവര്ത്തകരുടെയും മനസ്സാക്ഷിയെ ഞെട്ടിക്കുകയാണ്.
കഴിഞ്ഞയാഴ്ച സാമൂഹ്യമാധ്യമങ്ങളിലൂടെ പുറത്തു വന്ന വീഡിയോയില് പ്രായപൂര്ത്തിയാകാത്ത പെണ്കുട്ടിയാണ് പീഡിപ്പിക്കപ്പെടുന്നത്. മൊറാക്കോയിലെ ഒരു തെരുവില് പട്ടാപ്പകല് നടന്ന സംഭവത്തില് ജനരോഷം പുകയുകയാണ്. വീഡിയോയില് പീഡകന് പെണ്കുട്ടിയുടെ വസ്ത്രങ്ങള് ബലമായി അഴിച്ചുമാറ്റിയ ശേഷം ശരീരഭാഗങ്ങളില് സ്പര്ശിക്കുമ്പോഴാണ് പെണ്കുട്ടി ഇങ്ങിനെ യാചിക്കുന്നത്. എന്നാല് പെണ്കുട്ടിയുടെ വാക്കുകള് ശ്രദ്ധിക്കുക പോലും ചെയ്യാതെ അയാള് തന്റെ നീചകൃത്യങ്ങള് തുടരുമ്പോള് മറ്റൊരാള് ഇതെല്ലാം വീഡിയോയില് പകര്ത്തുന്നുണ്ട്.
മൊറാക്കോയിലെ അജ്ഞാത പ്രദേശത്ത് വെച്ചാണ് സംഭവം. ഒടുവില് പെണ്കുട്ടി ഉപദ്രവിക്കരുതെന്ന് കരഞ്ഞു യാചിക്കുന്നിടത്താണ് വീഡിയോ അവസാനിക്കുന്നത്. വീഡിയോയില് മുഖം ഉള്പ്പെടെ കാണപ്പെടുന്നയാളെ നിയമപരമായി ശിക്ഷിക്കണം എന്നാവശ്യപ്പെട്ട് സാമൂഹ്യമാധ്യമങ്ങളില് വന് പ്രതികരണമാണ് വരുന്നത്. നിങ്ങള്ക്കുമില്ലേ സഹോദരി എന്ന ഹാഷ്ടാഗില് ഒരു പ്രചരണവും ആരംഭിച്ചിട്ടുണ്ട്. കഴിഞ്ഞ ആഗസ്റ്റില് സമാനമായ മറ്റൊരു സംഭവവും നടന്നിരുന്നു. 12 പേര് ചേര്ന്ന് മാനസീക വെല്ലുവിളി നേരിടുന്ന പെണ്കുട്ടിയെ ഒരു ബസിനുള്ളിലിട്ട് കൂട്ട ബലാത്സംഗം ചെയ്യുകയും രംഗങ്ങള് ക്യാമറയില് പകര്ത്തുകയുമായിരുന്നു. ഈ സംഭവത്തിന്റെ വീഡിയോയും പിന്നീട് സാമൂഹ്യമാധ്യമങ്ങളില് എത്തി.
ഇത്തരം സംഭവങ്ങള് പതിവായതോടെ രാജ്യത്തിന്റെ വിവിധ ഇടങ്ങളില് ബലാത്സംഗ സംസ്ക്കാരത്തിനെതിരേ പ്രതിഷേധവും ശക്തമായി. രാജ്യത്ത് ഇത്തരം സംഭവങ്ങള് പെരുകുന്നതിന് കാരണം രാജ്യത്തെ നിയമസംഹിതകള് തന്നെയാണെന്നും ഇത്തരം കുറ്റകൃത്യങ്ങളില് കുറ്റവാളികള്ക്ക് കിട്ടുന്ന ശിക്ഷ കുറവാണെന്നതുമാണ് കാരണം എന്ന് മൊറാക്കോ ചൈല്ഡ്ഹൂഡ് പ്രവര്ത്തകര് പറയുന്നത്. ഇത്തരം ദുര്ഭൂതങ്ങള്ക്കെതിരേ മറ്റുള്ളവര്ക്ക് കൂടി മാതൃകയാകുന്ന വിധത്തിലുള്ള കടുത്ത ശിക്ഷ തന്നെ നടപ്പാക്കണമെന്നാണ് മനുഷ്യാവകാശ പ്രവര്ത്തകരുടെ വാദം.
