പട്ന: മതപരമായ ഒരു ഘോഷയാത്രയ്ക്ക് പിന്നാലെ ഹിന്ദുത്വ തീവ്രവാദികള് ജുമാ മസ്ജിദിന് മുകളില് കാവിക്കൊടിയും ദേശീയപതാകയും ഉയര്ത്തിയതിനെ തുടര്ന്ന് ബീഹാറിലെ സമസ്തിപൂരില് വര്ഗ്ഗീയ സംഘര്ഷം പുകയുന്നു. പ്രതിഷേധക്കാര് പോലീസുമായി ഏറ്റുമുട്ടലുണ്ടാകുകയും പോലീസ് ലാത്തിവീശുകയും ആകാശത്തേക്ക് വെടിവെയ്ക്കുകയും ചെയ്തു. സംഘര്ഷ സാധ്യതയെ തുടര്ന്ന് സമസ്തിപൂരില് നിരോധനാജ്ഞയും കനത്ത പോലീസ് കാവലും ഏര്പ്പെടുത്തിയിട്ടുണ്ട്. സംഭവവുമായി ബന്ധപ്പെട്ട് ഏതാനും പേരെ കസ്റ്റഡിയില് എടുക്കുകയും ചെയ്തിട്ടുണ്ട്.
പ്രാദേശിക മാധ്യമമായ സിയാസാത്ത് ഡെയ്ലിയാണ് വാര്ത്ത പുറത്തു വിട്ടിരിക്കുന്നത്. റിപ്പോര്ട്ട് പ്രകാരം വിഗ്രഹ നിമഞ്ജനവുമായി ബന്ധപ്പെട്ട ഘോഷയാത്രയ്ക്ക് പിന്നാലെ ചിലര് ചേര്ന്ന് രോസദ ടൗണിലെ മസ്ജിദിന് മുകളിലായിരുന്നു കൊടികള് ഉയര്ത്തിയത്. വര്ഗ്ഗീയ സംഘര്ഷം ഉണ്ടാക്കാനുള്ള മനപ്പൂര്വ്വ ശ്രമമായിരുന്നെന്ന കണ്ടെത്തലിനെ തുടര്ന്ന് പോലീസ് കനത്ത കാവല് ഏര്പ്പെടുത്തിയിട്ടുണ്ട്. സ്ഥലത്ത് സംഘര്ഷാവസ്ഥ നില നില്ക്കുന്നതിനാല് കൂടുതല് പോലീസിനെ വിന്യസിപ്പിക്കുകയും ചെയ്തിട്ടുണ്ട്.
പള്ളിയുടെ മുകളില് കയറി മിനാരത്തിലാണ് കൊടി കെട്ടിയത്. പള്ളിയുടെ ഒരു ഭാഗം കത്തിക്കുകയും പള്ളിക്കുള്ളില് സൂക്ഷിച്ചിരുന്ന ഖുറാന് അടക്കമുള്ള ഗ്രന്ഥങ്ങള് അഗ്നിക്കിരയാക്കുകയും ചെയ്തു. ഇതിന്റെ വീഡിയോ പിന്നീട് സാമൂഹ്യ മാധ്യമങ്ങളിലൂടെ പ്രചരിപ്പിക്കുകയും ചെയ്തിട്ടുണ്ട്. മോസ്ക്കിന് മുകളിലേക്ക് ഒരാള് കയറുന്നതും കാവിക്കൊടി ഉയര്ത്തുന്നതുമെല്ലാം വീഡിയോയിലുണ്ട്.
മോസ്ക്കിന് പുറത്ത് തറയില് ഗ്രന്ഥങ്ങള് പിച്ചിച്ചീന്തിയ നിലയിലും പുസ്തകങ്ങള് വാരിയിട്ട് കത്തുന്നതിന്റെയും ചാരം കിടക്കുന്നതിന്റെയുമെല്ലാം ദൃശ്യങ്ങള് പുറത്തു വന്നിട്ടുണ്ട്. ഇതെല്ലാം സംഘര്ഷം സൃഷ്ടിക്കാനുള്ള ബോധപൂര്വ്വമായ ശ്രമമായിട്ടാണ് പോലീസ് വിലയിരുത്തുന്നത്. നഗരത്തില് പിന്നീട് പ്രതിഷേധക്കാരും പോലീസും തമ്മില് ഏറ്റുമുട്ടല് ഉണ്ടാകുകയും നിരോധനാജ്ഞ പുറപ്പെടുവിക്കുകയും ചെയ്തിട്ടുണ്ട്. ജില്ലയില് ഇന്റര്നെറ്റ് സംവിധാനങ്ങള് നിര്ത്തി വെയ്ക്കുകയും സ്കൂളുകള്ക്ക് അവധി നല്കുകയും ചെയ്തിട്ടുണ്ട്.
ഘോഷയാത്രയ്ക്ക് പിന്നാലെ രോസദ ടൗണില് ചിലര് സംശയാസ്പദമായി സംഘം ചേര്ന്നിരുന്നു. പക്ഷേ വിവരമറിഞ്ഞ് പോലീസ് എത്തിയപ്പോള് കാവിക്കൊടി എടുത്തു മാറ്റിയിരുന്നു. എന്നാല് ദേശീയപതാക അവിടെ തന്നെയുണ്ടായിരുന്നെന്നാണ് പോലീസ് പറയുന്നത്. സംഭവവുമായി ബന്ധപ്പെട്ട് ചിലരെ കസ്റ്റഡിയില് എടുത്തിട്ടുണ്ട്. പ്രതിഷേധത്തില് ചിലര് പോലീസിന് നേരെ കല്ലേറ് നടത്തിയത് സംഘര്ഷത്തിനും ലാത്തിച്ചാര്ജ്ജിനും കാരണമായി. പോലീസ് ആകാശത്തേക്ക് വെടിവെച്ച് പ്രതിഷേധക്കാരെ ചിതറി ഓടിക്കുകയായിരുന്നു.
