കോട്ടയം: ബിരുദ സര്ട്ടിഫിക്കറ്റുകള് വേഗത്തില് ലഭ്യമാക്കാമെന്ന പേരില് എംജി സര്വകലാശാലയ്ക്കു മുന്നിലെ ഇന്റര്നെറ്റ് കഫേ ഉടമ നൂറുകണക്കിന് വിദ്യാര്ഥികളില് നിന്നും പണം വാങ്ങി പറ്റിച്ച സംഭവത്തില് അന്വേഷണം നടത്തണമെന്ന് ആവശ്യപ്പെട്ട് വൈസ് ചാന്സലര് ഡോ.ബാബു സെബാസ്റ്റിയന് രംഗത്ത്. ഇതുമായി ബന്ധപ്പെട്ട് വൈസ് ചാന്സലര് ഡിജിപിക്കു പരാതി നല്കി.
സര്വകലാശാലയ്ക്ക് മുന്നിലെ സോഫ്റ്റ് ലൈന് കംമ്പ്യൂട്ടേഴ്സ് ഇന്റ്ര്നെറ്റ് ക്ലബ് സ്ഥാപന ഉടമ വിജയനെതിരെ വിദ്യാര്ഥികള് കഴിഞ്ഞ ദിവസം ഗാന്ധിനഗര് പോലീസില് പരാതി നല്കിയിരുന്നു. ഇതിന് പിന്നാലെയാണ് വിസിയും അന്വേഷണം നടത്തണമെന്നാവശ്യപ്പെട്ട് ഇപ്പോള് രംഗത്തെത്തിയിരിക്കുന്നത്.
കബളിപ്പിക്കപ്പെട്ട വിദ്യാര്ഥികള് ഇയാളുടെ വീട്ടില് നടത്തിയ പരിശോധനയില് അപേക്ഷാ ഫോമുകളും മറ്റും കണ്ടെത്തിയിരുന്നു. ഇവ വിദ്യാര്ഥികള് വിസിക്കും പൊലീസിനും കൈമാറിയിരുന്നു. ബിരുദ സര്ട്ടിഫിക്കറ്റ് ലഭിക്കാനായി ഓണ്ലൈന് അപേക്ഷ സമര്പ്പിക്കാന് സ്ഥാപനത്തിലെത്തിയ വിദ്യാര്ഥികളെയാണ് ഇയാള് കബളിപ്പിച്ചത്.
സര്വകലാശാലയില് ഫീസ് നല്കേണ്ടതില്ലെന്നും അതിന്റെ കൂടെ കമ്മീഷന് നല്കിയാല് നാലുമാസം കൊണ്ട് ലഭിക്കേണ്ട സര്ട്ടിഫിക്കറ്റ് കേവലം ഒരു മാസം കൊണ്ട് നല്കാമെന്നു പറഞ്ഞാണ് ഇയാള് വിദ്യാര്ഥികളില് നിന്ന് പണം തട്ടിയതെന്നും പോലീസ് പറയുന്നു.
