ന്യൂഡല്ഹി: ഡല്ഹി ഐഐടിയിലെ ഹോസ്റ്റല് മുറിയില് വിദ്യാര്ത്ഥിയെ തൂങ്ങിമരിച്ച നിലയില് കണ്ടെത്തി. ചെറുപ്പത്തില് ലൈംഗിക അതിക്രമത്തിന് താന് ഇരയായെന്നും അതിലുള്ള മനോവിഷമമാണ് മരണകാരണമെന്നുമുള്ള ആത്മഹത്യ കുറിപ്പും ഇയാളില് നിന്ന് കണ്ടെത്തി. പശ്ചിമ ബംഗാളിലെ ഹൂഗ്ലി സ്വദേശിയായ ഗോപാല് മാലൂ (21) ആണ് മരിച്ചത്. ഐഐടിയില് മാസ്റ്റേഴ്സ് ഓഫ് കെമിസ്ട്രിയില് ഒന്നാം വര്ഷ വിദ്യാര്ത്ഥിയാണ്. നീലഗിരി ഹോസ്റ്റലിലെ സീലീംഗ് ഫാനിലാണ് വെള്ളിയാഴ്ച പുലര്ച്ചെ ഇയാള് തൂങ്ങിയത്.
കുട്ടികളെ പീഡിപ്പിക്കുന്നവര്ക്കെതിരെ കടുത്ത നടപടി വേണമെന്നും ആത്മഹത്യ കുറിപ്പില് പറയുന്നുണ്ട്. രണ്ടു ദിവസം മുന്പും ഇയാള് ആത്മഹത്യയ്ക്ക് ശ്രമിച്ചുവെങ്കിലും പരാജയപ്പെട്ടിരുന്നുവെന്ന് പോലീസ് പറയുന്നു. ചെറുപ്പത്തിലുണ്ടായ പീഡനത്തിന്റെ പശ്ചാത്തലത്തില് വിദ്യാര്ത്ഥിക്ക് കടുത്ത മാസനസിക സമ്മര്ദ്ദമുണ്ടായിരുന്നു. പീഡനത്തിന്റെ ആഘാതത്തില് നിന്ന് ഇയാള് മോചിതനായെങ്കിലും മുന്കാല അനുഭവങ്ങള് അയാളെ വേട്ടയാടിയിരുന്നുവെന്നും ഡി.സി.പി മിലിന്ദ് മഹാദ്യൂ ദുംബെരേ പറയുന്നു.
ചെറുപ്പത്തില് തന്റെ രണ്ട് ബന്ധുക്കളെ തന്നെ ചൂഷണം ചെയ്തിരുന്നു. ഇരുവരും തന്നേക്കാള് പ്രായമുള്ളവരാണ്. താന് ഡല്ഹിയിലേക്ക് വരുന്നത് വരെ ആ പീഡനം തുടര്ന്നിരുന്നുവെന്നും ഗോപാല് മാലുവിന്റെ ആത്മഹത്യ കുറിപ്പില് പറയുന്നു. ഡല്ഹിയില് എത്തിയ ശേഷവും പഴയ അനുഭവങ്ങള് തന്നെ വേട്ടയാടിയിരുന്നു. പീഡനത്തിന് ഇരയായതില് തനിക്ക് തന്നോടു തന്നെ വെറുപ്പായിരുന്നു. താന് ഏറെ നിരാശനാണെന്നും അത് മറികടക്കാന് മാറ്റ് മാര്ഗമൊന്നുമില്ലെന്നും കുടുംബത്തോട് മാപ്പുചോദിച്ചുകൊണ്ടുള്ള കത്തില് ഗോപാല് മാലു പറയുന്നു.
ചൊവ്വഴ്ചയും ഇയാള് അമിതമായി ഗുളിക കഴിച്ച് ആത്മഹത്യയ്ക്ക് ശ്രമിച്ചിരുന്നു. ഉടന്തന്നെ സഫ്ദര്ജംഗ് ആശുപത്രിയില് എത്തിച്ചതിനാലാണ് രക്ഷപ്പെട്ടത്.
