ന്യൂഡല്ഹി: സ്വതന്ത്ര ഇന്ത്യയില് കാര്യങ്ങള് ഭയാനകമായ നിലയിലേക്ക് നീങ്ങുന്നതായും രാജ്യം അരാജകത്വത്തിലേക്ക് വീണു പോകുന്നതായും രാജ്യത്തെ ഉന്നതോദ്യോഗസ്ഥരുടെ വിലയിരുത്തല്. കതുവ, ഉന്നാവ് ബലാത്സംഗക്കേസുകള് ഇന്ത്യ ഏറ്റവും അന്ധകാരമായ അവസ്ഥയിലാണെന്ന സൂചനകളാണെന്നും ഭരണഘടനാ മൂല്യങ്ങള് തന്നെ പ്രതിസന്ധിയിലായിരിക്കെ അടിയന്തിര പരിഹാര നടപടിയെടുക്കണമെന്ന് ആവശ്യപ്പെട്ട് 49 ഉന്നതോദ്യോഗസ്ഥര് പ്രധാനമന്ത്രിക്ക് കത്തയച്ചു.
ബലാത്സംഗക്കേസ് പ്രതികളെയും വിദ്വേഷ പ്രചാരണം നടത്തുന്നവരേയും കര്ശനമായി നേരിടണം. ജനങ്ങളോടുള്ള ഉത്തരവാദിത്വം നിറവേറ്റുന്നതില് ഉദ്യോഗസ്ഥരും സര്ക്കാരും പരാജയപ്പെട്ടു. കത്തുവയില് ബാലിക ബലാത്സംഗത്തിനിരയായി കൊലചെയ്യപ്പെട്ടത് നാം മുങ്ങിക്കൊണ്ടിരിക്കുന്ന ദുര്ഗന്ധത്തിന്റെ ആഴം വെളിവാക്കുന്നതാണ്. എട്ടുവയസ്സുകാരിക്ക് നേരെ നടന്ന കിരാതത്വത്തില് പ്രധാനമന്ത്രിയോ സര്ക്കാരോ രാഷ്ട്രീയ നേതാക്കളോ മതിയായ രീതിയില് പ്രതികരിച്ചില്ല. കത്തുവ, ഉന്നാവോ എന്നിവിടങ്ങളില് നടന്ന ഭീകരവൃത്തിക്ക് മറ്റാരേക്കാളും ഉത്തരവാദി പ്രധാനമന്ത്രി നരേന്ദ്രമോഡിയാണ്.
ബിജെപി ഭരിക്കുന്ന സംസ്ഥാനങ്ങളിലാണ് രണ്ടു സംഭവവും ഉണ്ടായത്. പാര്ട്ടിയില് പരമാധികാരമുള്ള നരേന്ദ്രമോഡി പൊതു സമൂഹത്തിന്റെ പ്രതിഷേധം ശക്തമായപ്പോള് മാത്രമാണ് മൗനം വെടിയാന് തയ്യാറായത്. എന്നിരുന്നാലും സംഭവത്തിന് പിന്നിലെ വര്ഗ്ഗീയ ലക്ഷണത്തെ അപലപിക്കാന് തയ്യാറായില്ല. നമ്മുടെ സാമൂഹിക ധാര്മ്മിക ക്രമത്തില് സംഭവങ്ങള് ഉണ്ടാക്കിയ മുറിവുകള് ചില്ലറയല്ല. ഈ ഘട്ടത്തില് പീഡനത്തിന് ഇരയായവരുടെ കുടുംബങ്ങളെ സന്ദര്ശിച്ച് മാപ്പ് പറയുകയും പ്രതികളെ അതിവേഗം വിചാരണ ചെയ്യാന് നടപടിയും കൈക്കൊള്ളുക.
രാജ്യത്തെ മുസ്ളീം , ദളിത്, ന്യൂനപക്ഷം, സ്ത്രീകള്, കുട്ടികള് എന്നിവര്ക്ക് പ്രത്യേക സുരക്ഷ നല്കുക. വിദ്വേഷ കുറ്റകൃത്യവുമായി ബന്ധമുള്ളവരെ സര്ക്കാരില് നിന്നും ഒഴിവാക്കുക, തുടങ്ങിയ ആവശ്യങ്ങളും ഇവര് കത്തില് ആവശ്യപ്പെട്ടിട്ടുണ്ട്.
കത്തുവയിലെ ക്രൂരതയുടെ മുറിവുണങ്ങും മുമ്പായിരുന്ന ഉത്തര്പ്രദേശിലെ ഇറ്റ ജില്ലയില് മറ്റൊരു എട്ടുവയസ്സുകാരി ക്രൂരതയ്ക്കിരയായി കൊല്ലപ്പെട്ടത്. മാതാപിതാക്കള്ക്കൊപ്പം വിവാഹചടങ്ങിനെത്തിയ എട്ടുവയസുകാരിയെയാണു തട്ടിക്കൊണ്ടുപോയി പീഡിപ്പിച്ചു കൊലപ്പെടുത്തിയത്. ഇറ്റ ജില്ലയിലെ ശീതല്പൂരില് ഞായറാഴ്ച രാത്രിയിലാണു പെണ്കുട്ടിയെ കാണാതായത്. തിങ്കളാഴ്ച രാവിലെയാണു മൃതദേഹം കണ്ടെത്തിയത്.
വിവാഹ പന്തലൊരുക്കാനെത്തിയ സോനു ജാതവ്(19) ആണു കുട്ടിയെ ബലാല്സംഗം ചെയ്തശേഷം കൊലപ്പെടുത്തിയതെന്നു ജില്ലാ എസ്.പി: അഖിലേഷ് ചൗരാസിയ അറിയിച്ചു. മദ്യലഹരിയിലാണ് ഇയാള് ആക്രമണം നടത്തിയതെന്നു പോലീസ് അറിയിച്ചു. വിവാഹസല്ക്കാരം നടന്ന സ്ഥലത്തുനിന്ന് ഇയാള് പെണ്കുട്ടിയെ തട്ടിക്കൊണ്ടുപോയി അടുത്തുള്ള ആളൊഴിഞ്ഞ കെട്ടിടത്തിനുള്ളില് വച്ച് പീഡിപ്പിക്കുകയായിരുന്നു. പിന്നീടു കല്ലുകൊണ്ടു തലയ്ക്കടിച്ചു കൊലപ്പെടുത്തി.
പ്രധാനമന്ത്രി നരേന്ദ്ര മോഡിയുടെ ബ്രിട്ടന് സന്ദര്ശനവും കത്തുവ പ്രതിഷേധത്തിന്റെ നിഴലിലായിരിക്കുകയാണ്. വെളുത്ത വസ്ത്രം അണിഞ്ഞു ഇന്ത്യന് വംശജരായ വനിതകളുടെ സംഘടന മോഡിക്കെതിരേ പാര്ലമെന്റ് ചത്വരത്തില് പ്രതിഷേധം നടത്തും. സ്വീഡനില് നോര്ഡിക് രാജ്യങ്ങളിലെ തലവന്മാരുമായുള്ള ഉച്ചകോടിയില് പങ്കെടുത്ത ശേഷം ബ്രിട്ടീഷ് സന്ദര്ശനത്തിനായി മോഡി ഇന്നലെ രാത്രിയിലാണു ലണ്ടനിലെത്തിയത്.
