തിരുവല്ല: സ്വവര്ഗാനുരാഗം ചികിത്സിച്ച് ഭേമാക്കാമെന്ന് ഡോക്ടറുടെ അവകാശവാദം. ഡോ. ടൈറ്റസ് പി. വര്ഗീസ് എന്നയാളാണ് അവകാശവാദം ഉന്നയിച്ച് രംഗത്ത് വന്നിരിക്കുന്നത്. സെക്സ് ആന്ഡ് ഹെല്ത്ത് എന്ന പേരില് ഡോക്ടര് ഒരു യൂട്യൂബ് ചാനല് നടത്തുന്നുണ്ട്. ചില ടെവിവിഷന് ഷോകളിലും ഇയാള് അതിഥിയായി എത്താറുണ്ട്. തന്റെ യൂട്യൂബ് ചാനലില് അപ്ലോഡ് ചെയ്ത വീഡിയോയിലാണ് സ്വവര്ഗാനുരാഗം ചികിത്സിച്ച് മാറ്റാമെന്ന് ഡോക്ടര് അവകാശപ്പെട്ടത്.
സ്വവര്ഗാനുരാഗം രോഗമല്ലെന്നും പെരുമാറ്റ വൈകല്യമാണെന്നും ഡോക്ടര് പറയുന്നു. ഇത് പൂര്ണ്ണമായും ചികിത്സിച്ച് മാറ്റാനാകുമെന്നും ടൈറ്റസ് അവകാശപ്പെട്ടു. കുട്ടിക്കാലത്ത് ഉണ്ടാകുന്ന ചില ദുരനുഭവങ്ങളാണ് സ്വവര്ഗാനുരാഗത്തിന് കാരണമെന്നും ഇയാള് പറയുന്നു. സെക്സോളജിസ്റ്റിനോ സൈക്കോളജിസ്റ്റിനോ സ്വവര്ഗാനുരാഗം പോലെ നിസാരമായ കാര്യം ചികിത്സിച്ച് ഭേമാക്കാന് കഴിയുന്നില്ലെങ്കില് പിന്നെ എന്ത് ഫലമെന്നും ഡോ. ടൈറ്റസ് പറഞ്ഞു.
പിതാവുമായി അധികം അടുപ്പം പുലര്ത്താത്ത മക്കളാണ് സ്വവര്ഗാനുരാഗികളാകുന്നതെന്നും മറ്റൊരു വീഡിയോയില് ഇയാള് അവകാശപ്പെടുന്നു. കുടുംബത്തിലെ ഇളയ മക്കളാണ് കൂടുതലും സ്വവര്ഗാനുരാഗികളാകുന്നത്. ഇവര്ക്ക് അച്ഛനോടുള്ളതിനേക്കാള് അടുപ്പം അമ്മയോടാണ്. ക്യാന്സറും എയ്ഡ്സും വരെ ഭേദപ്പെടുത്താന് സാധിക്കുമെങ്കില് എന്തുകൊണ്ട് സ്വവര്ഗാനുരാഗം ഭേദപ്പെടുത്താന് സാധിക്കില്ലെന്നും ഡോക്ടര് ചോദിക്കുന്നു.
അതേസമയം ഡോക്ടറുടെ അവകാശവാദത്തിനെതിരെ എല്.ജി.ബി.ടി.ക്യു കമ്മ്യൂണിറ്റി രംഗത്ത് വന്നു. ഡോക്ടര്ക്കെതിരെ ആരോഗ്യ മന്ത്രിക്കും സംസ്ഥാന മനുഷ്യാവകാശ കമ്മീഷനും പരാതി നല്കുമെന്നും എല്.ജി.ബി.ടി.ക്യൂ കമ്മ്യൂണിറ്റി പ്രതിനിധി വിഹാന് പീതാംബര് പറഞ്ഞു.
അതേസമയം സ്വവര്ഗ വിവാഹം ചികിത്സിക്കണമെന്ന് താന് പറഞ്ഞിട്ടില്ലെന്ന് ഡോ. ടൈറ്റസ് പറഞ്ഞു. വിവാദത്തിന്റെ പശ്ചാത്തലത്തില് ഇംഗ്ലീഷ് ദിനപത്രത്തോടാണ് അദ്ദേഹം പ്രതികരിച്ചത്. സ്വവര്ഗാനുരാഗം താന് ചികിത്സിച്ച് ഭേദമാക്കുമെന്ന് പറഞ്ഞിട്ടില്ല. എന്നാല് സ്വവര്ഗാനുരാഗം രോഗമാണെന്ന് താന് കരുതുന്നില്ല. കാരണം സ്വവര്ഗാനുരാഗത്തിലേക്ക് നയിക്കുന്ന ഹോര്മോണോ ജീനുകളോ കണ്ടെത്തിയിട്ടില്ല. സ്വവര്ഗാനുരാഗവും കുട്ടികളെ ലൈംഗികമായി പീഡിപ്പിക്കുന്ന മാനസികാവസ്ഥയും പെരുമാറ്റ വൈകല്യത്തിന്റെ ഭാഗമായി ഉണ്ടാകുന്നതാണ്. ചെറുപ്പകാലത്തെ ദുരനുഭവങ്ങള് ഇതിന് കാരണമാണെന്നും ഡോ. ടൈറ്റസ് പറഞ്ഞു.
